Epesas 4 - Tataroha Diana

Soihaadaꞌinge E Iiꞌo Ruru Toꞌohuu Aena Aana A Kraes

¹ Ineu mwane nge nou iiꞌo i laona nume ni hoꞌo haahie uri no ko esu nana Aalaha, no ko unue oto huniꞌomu uuri. Omu ke iiꞌo oodotaꞌi i sulie tolahai iinoni nge e malisine mo iini nge a God e soire hunie kire ke neꞌie mo iinoni ingeie.

² Omu ke haꞌamwai-mweiꞌaꞌomu tarau, na omu ke toli rako peꞌie mwala. Omu ke saemamae mola, na omu ke haataꞌinie manata-diananga iꞌomu huniꞌomu heiliu aani saeꞌaasilana nga moi taa kire dau huꞌisiꞌomu eeni.

³ Omu ke asu aꞌailaꞌa aani eriꞌapasilana mola uri omu ke mani neꞌie mola taꞌa-taꞌa mei sae, oto mala Liꞌoa Maaꞌi e asuie kaꞌu eemiu oto aana maholo e niie hanuelamanga huniꞌomu uri hunie omu ke iiꞌo ruru diana.

⁴ Ikie taꞌa-taꞌa mei sape mola, na kie mani toꞌo aana mola taꞌa-taꞌa Liꞌoa Maaꞌi i lalo aaka, na kie ko meni maaꞌoohi susutoꞌo mola hunie taꞌa-taꞌa haiholotaꞌinge, nge a God e haiholotaꞌinie hunie ahutaka maholo e soikie mai i saana.

⁵ Kie mani toꞌo aana mola e taꞌa-taꞌa Aalaha, na e taꞌa-taꞌa tala mola aani hiiwalaimolinge, na e taꞌa-taꞌa loto-maaꞌinge mola.

⁶ Kie ko meni paalahea mola e taꞌa-taꞌa God, aana ingeie oto Aamana ahutaka. Ingeie e paine haahie ahutaka, na ko meu-meuri i lalo aaka huni esuie nga taa ko sare asuie mai i laona walumalau.

⁷ Na hunie ahutaka oto taꞌingelu a Kraes e haꞌa-adokie oto aani niinge i sulie manata-diananga ingeie hunikie.

⁸ Mo Uusu-uusu Maaꞌi e unue uuri, E tapolie mo maelonga ingeie, e si tola mauri aada maholo e tahelaꞌi taꞌau aana leu e lae oto i Lengi, nge e si haꞌa-adoa mo iinoni ingeie aani niinge. Sam 68:18

⁹ ?Haꞌalaa, nga taa ni loꞌongaꞌinge aana “E tahelaꞌi”? Loꞌongaꞌinge aana mola uri holaꞌinaꞌo e siho mai laona walumalau aaela ienini.

¹⁰ Oto iini nge e siho mai ngeena, e tahelaꞌi loꞌu mola taꞌau i Lengi. E tahelaꞌi taꞌau loꞌu liutaa aana taꞌena nga leu taꞌau i Lengi, na ko iiꞌo oto taꞌau uri hunie ke aalaha haahie taꞌena nga ola.

¹¹ Na ingeie oto e niie mo niinge hunie soihaadaꞌinge ingeie, aana e lio hilisie nga mo iini huni neꞌi hurulaꞌaa, na nga mo iini huni neꞌi propet, na nga mo iini huni tarohaꞌinie Tataroha Diana, na nga mo iini huni lio i sulie soihaadaꞌinge, na nga mo iini huni haꞌa-uusulie mwala.

¹² E asuie urine hunie ahutana mwala maaꞌi ingeie ke mani iiꞌo aakau huni peꞌi-peꞌire hailiu, na hunie sapena Kraes ke aꞌailaꞌa.

¹³ Aana saena hunie kie ke neꞌie taꞌa-taꞌa iinoni aena aana kie mani hiiwalaimoli aana Kalena God, na kie mani sai diana aana. Na hunie kie ke neꞌi rato aana tolahana Kraes, na hunie kie ke haꞌa-ahue taꞌena nga tolaha nge kire kaꞌa sada ue i sulie tolahana.

¹⁴ Oto kie saꞌa iiꞌo ike loꞌu mala mo mwela nge kire sai oolisie hiiwalaimolinge ikire tarau aana kire ko pwaarongo i sulie taꞌena nga haꞌa-uusuli nge ko eeroa mwala peꞌie mo pwelonga ikire takoie mo tala aaela. Mo mwela urine, kire urihana mo naho nge ooru ko ooruheꞌiniꞌi heiliu.

¹⁵ Taꞌe ikie, aana kie manata diana hunie mwala, kie ke ere mola aana walaimolinge. Urine kie ke paine mola peꞌie taꞌe-taꞌena nga tolaha diana, na kie ke lado toꞌohuu peꞌie a Kraes. Ingeie oto pwauke nge kie mani lado aana,

¹⁶ na ingeie oto ko konie taꞌena nga sasarai ola aana tohungana leu talana, na ko hele maꞌutaꞌa aana mei sape ngeena. Oto maholo mo sasarai ola aana ko esu diana aana mo euꞌesunge hai aaopaꞌi ikire, nge mo ladoha kei aꞌailaꞌa na kire sai peꞌie loꞌu ngaeta mo sasarai ola. Oto ahutana mei sape laku ngeena kei awaa, na kei lae peꞌi peine loꞌu, na kei honu mola aana manata-diananga.

Mauringe Haalu Aana Kraes E Aaopa Loꞌu Liutaa Mwaanie Mauringe Lalahuꞌe

¹⁷ Aana satana Aalaha, no ko unue oto huniꞌomu uri omu ke suꞌuri iiꞌo loꞌu mala mwala nge kire kaꞌa hiiwalaimoli ike aana God. Mo loꞌongaꞌinge ikire mo ola mwaakule mola.

¹⁸ Saeda e rodohono oto toꞌohuu, na kire kaꞌa saie ike nga taꞌa-taꞌa mei ola. Kire iiꞌo haꞌataulie mau-meuringe toꞌohuu nge a God e niie, aena aana kire tohungei puꞌo, na kire iiꞌo ni saehaunge oto mola.

¹⁹ Kire kaꞌa tohungei sai masa ike, na kire ko talei deu taꞌewau mola, na kire saetoꞌo aana mola taꞌena nga mo tolahai ola aaela.

²⁰ Taꞌe haꞌananaulemiu i sulie a Kraes e kaꞌa lae ike aana mo tolahai ola urine.

²¹ A Jisas oto walaimolinge, na omu rongo diana aana oto mo laladonga i sulie, na haꞌananaulemiu e lae oto aana mo ola toꞌohuu i sulie.

²² Oto omu ke toliꞌaasie oto tolahai ola aaela lalahuꞌe nge omu lae-lae i sulie kaꞌu aana mau-meuringe lalahuꞌe iꞌomu. Aana tolahai ola ngeena e sai waeliꞌomu mola, aana ko heri hunie mola aaelanga, na mo heri-huninge ngeena kire ko haꞌapweuꞌomu oto toꞌohuu.

²³ Loꞌongaꞌinge iꞌomu na manatamiu ke tohungei neꞌi ola haalu oto.

²⁴ Na omu ke iiꞌo oto aana tolaha haalu nge a God e asuie huni lae i sulie tolahana maraana. Omu kei iiꞌo urine, nge omu ke si haataꞌinie mau-meuringe toꞌohuu nge e oodotaꞌi na e maaꞌi.

²⁵ Oto omu ke toliꞌaasie tolahai ola ni eeronga, na omu ke mani ere toꞌohuu mola huniꞌomu heiliu, aena aana ahutaka kie mani neꞌi sasarai ola mola aana taꞌa-taꞌa mei sape.

²⁶ Mala uri o ko saewasu, mwaanie o toitoliꞌaasie saewasunge iꞌoe e da o esuie nga mei ola aaela. Na mwaanie omu sae-saewasu lae hule aana sato kei suu aana hai dinge ngeena.

²⁷ Mala uri o ko saewasu tewa urine, nge o ko taha maa hunie a Pwelu Eero-eero ke waelie mau-meuringe iꞌoe.

²⁸ A tei iinoni ko peli-peli, ke toliꞌaasie oto tolahai ola aaela ngeena na ke aehotaa loꞌu asunge diana. Ke asuie nga mo ola diana aana nimana, hunie ke toꞌo aana mo ola huni peꞌie mo iini kire maitale.

²⁹ Omu ke suꞌuri unu-unue mo wala aaela, taꞌe omu ke unu-unue mo wala nge kire malisine maholo ngeena huni peꞌie mwala. Aana taungei erenga urine, e sai haꞌadianaꞌaa mo iini nge kire ko rongoa.

³⁰ Omu ke suꞌuri haꞌasaehuuꞌaa Liꞌoa Maaꞌi a God, iini nge a God e niie namiu domana uri nga haꞌa-ara huni haataꞌinie uri ingeie e toꞌo aamiu, na uri aana Dinge Ooreta kei luhesiꞌomu taꞌingelu mwaanie oorahaꞌaa.

³¹ Omu ke toliꞌaasie taꞌe-taꞌena nga tolahai ola ni loohaꞌi roroꞌanga, na ni ngiduupunge, na ni saewasunge. Na omu ke toliꞌaasie taꞌena nga teanga aaela, na ni eeronga huni waelie nga iini, na omu ke toliꞌaasie noꞌone taꞌena nga mei hiinge huni waelie ngaeta iinoni.

³² Taꞌe omu ke toꞌo aana mei saemamae na omu ke aamasiꞌomu heiliu, na omu ke saeꞌaasi hunie taꞌena nga iinoni mala a God ko sae-saeꞌaasi huniꞌomu i tehulaꞌana a Kraes.