Epesas 3 - Tataroha Diana

Asunge A Pol Huni Peꞌie Mo Aapoloa Aaopa

¹ Aena mei olana, nge ineu a Pol nou iiꞌo oto i nume ni hoꞌo ie, aena aana ineu iinoni a Jisas Kraes na nou esu talamiu mo iini nge iꞌomu nga mo Jiu haꞌike.

² Saꞌa mola omu rongoa taane oto uri i laona aamasinge a God, e niie mei esunge ngeena hunieu uri hunie ne ke peꞌiꞌomu aana.

³ Iau, omu saie oto, aana nou kele uusu-uusu kaꞌu oto i sulie i laona uusu-uusu ienini. Oto waite mei oalaꞌinge a God e oꞌoꞌo mumuni, taꞌe e haataꞌinie oto aaku uri hunie ne ke saie.

⁴ Na mala uri omu kei saai kohie loꞌu uusu-uusu ienini, nge omu kei lio saie mola uri nou sai diana aana mei oalaꞌinge a Kraes nge e oꞌoꞌo mumuni kaꞌu waite.

⁵ Uure oto mai naꞌo, a God e kaꞌa unu-unue ike mei oalaꞌinge nge e iiꞌo mumuni ngeena oodoie mwala. Taꞌe maholo ienini, Liꞌoa Maaꞌi a God e haataꞌinie oto mei olana aana mo hurulaꞌaa maaꞌi na mo propet maaꞌi ingeie.

⁶ Mei oalaꞌinge mumuni ngeena e unue uri iꞌomu mo Aapoloa Aaopa nge iꞌomu nga mo Jiu haꞌike, omu sai neꞌie taꞌa-taꞌa komu na e taꞌa-taꞌa mei sape peꞌiꞌemi mo Jiu, aana omu hiiwalaimoli noꞌone aana Tataroha Diana. Na urine nga taa nge a God e haiholotaꞌinie uri kei niie mai huniꞌemi i tehulaꞌana a Jisas Kraes, iꞌomu omu kei toꞌo aana noꞌone.

⁷ Oto aena aana hahuꞌana manata-diananga paine a God hunieu mone, nge e niie nanamanga ingeie hunieu hunie uri ne ke tarohaꞌinie Tataroha Diana mala iinoni euꞌesu ingeie.

⁸ Maꞌalana uri nou mwai-mwei loꞌu mwaanie ahutana mwala a God, a God e tohungei diana oto hunieu, hule aana e niie mei esunge ngeena hunieu. E uusungeꞌinieu weu i saana mwala nge ikire nga mo Jiu haꞌike, huni tarohaꞌinie Tataroha Diana i sulie mo tohungei ola diana nge a Kraes e niiꞌi hunikie—mo ola nge kire diana oto liutaa mwaanie taꞌena nga ola kie sai loꞌongaꞌiniꞌi.

⁹ Na iini nge e haꞌaholaa walu ola, e asuie uri hunie ne ke peꞌie ahutana mwala hunie kire ke lio saie loꞌongaꞌinge a God i sulie mei oalaꞌinge ingeie ngeena nge e iiꞌo mumuni.

¹⁰ Na a God e asuie oto urine aana maholo ienini hunie soihaadaꞌinge ke si haataꞌinie taꞌe-taꞌena nga loꞌongaꞌinge diana a God hunie mo ensel na mo liꞌoa na mo aakalo na taꞌena nga iini nanama urine.

¹¹ A God e asuie oto mei olana i sulie oalaꞌinge ingeie uure oto mai naꞌo, na e haꞌa-oaie leune oto aana asunge Aalaha ikie a Jisas Kraes.

¹² Aena aana kie hiiwalaimoli oto aana, na kie lado oto peꞌie, saeka e susu oto na kie saꞌa maꞌuteꞌinie ike loꞌu laenga mai saana God.

¹³ Oto no ko sare ere haꞌasusuꞌomu mola mwaanie omu aakohe aana maholo omu ko leesie uri no ko sapesalu haahiꞌomu, aana no ko esuie urine uri hunie omu ke iiꞌo ni menikuluꞌe taꞌau i Lengi ni ngeena.

Hahuꞌana Manata-diananga A Kraes Hunikie E Liue Saenanaunge Mo Iinoni

¹⁴ Maholo no ko aamasitoꞌo aana saenanaunge a God e paine oto urine, no ko pouruuru i naꞌona aani haꞌamaꞌunge na no ko eitanaie a God Aamaka,

¹⁵ nge e niie mauringe hunie taꞌena nga ola taꞌau i Lengi na mai aano i leu.

¹⁶ No ko eitanaie a God nge e tohungei menikuluꞌe na e nanama oto liutaa, uri hunie Liꞌoa ingeie ke niie mai nanamanga huniꞌomu, hunie omu ke aꞌailaꞌa i laona saemiu,

¹⁷ na hunie a Kraes ke iiꞌo susu i laona manatamiu aani hiiwalaimolinge aana. No ko eitanai talamiu uri manata-diananga a Kraes huniꞌomu ke neꞌi imi-imine mauringe iꞌomu hunie omu ke uure maꞌutaꞌa.

¹⁸ Na no ko eitanaie a God hunie uri ahutemiu loko-loko peꞌie ahutana mo iinoni a God, omu ke mani toꞌo aana nanamanga huni sai diana aana manata-diananga a Kraes, uri e tohungei peine, na e tohungei tewa, na e lae i lengi oto hiitoꞌo, na e tohungei kokoro.

¹⁹ Nga iini e saꞌa sai diana aana ike ahutana walu ola i sulie manata-diananga a Kraes hunie, taꞌe no ko eitanai talamiu uri omu ke sai diana aana manata-diananga a Kraes huniꞌomu. Urine nge omu kei honu aana nanamanga na tolahana a God.

²⁰ Peꞌie nanamanga a God i lalo aaka, a God e sai esuie walu ola e liutaa loꞌu aana taꞌena nga ola kie sai sukaa wa loꞌongaꞌinie.

²¹ Oto no ko eitanai uri mwala ke haꞌamanikuluꞌaa God haahie soihaadaꞌinge ingeie na aena aana a Jisas Kraes oto di, oto di. Ke urine oto.