Epesas 2 - Tataroha Diana

Kie Mauri Tararuru Peꞌie A Kraes

¹ Oto wau i naꞌo, omu iiꞌo mola mala uri omu mae oto, aena aana omu lae peꞌi heitohea God na omu talei deu taꞌewau oto mola.

² Aana maholona, omu lae oto mola i sulie mo tolahai ola aaela aana walumalau ienini. Omu lulu i sulie oto mola a Pwelu Eero-eero, nge ko aalaha haahie mo liꞌoa aaela, na ko auꞌesu i laona saena ahutana mo iini kire ko hei-heitohea a God.

³ Oto wau i naꞌo, ahutaka kie mani oꞌoꞌo taane noꞌone mala mwala ngeena. Kie talei lae-lae oto mola i sulie saeka aani deu i sulilana nga taa sapeka na loꞌongaꞌinge ikie e saetoꞌo aana. Oto e malisine mola uri a God ke haꞌaloikie mala e sai esuie aana taꞌena nga iinoni.

⁴ Taꞌe a God e aamasikie, na manata-diananga ingeie hunikie e tohungei peine liutaa.

⁵ Na aena mei olana maholo kie mae kaꞌu i tehulaꞌana mo heitohenga ikie, ingeie e si da kie ke mauri tararuru peꞌie a Kraes. Oto niinge a God mone e haꞌa-uuriꞌomu,

⁶ na aena aana kie lado peꞌie a Jisas Kraes, a God e taꞌekie noꞌone peꞌie a Kraes hunie kie ke aalaha tararuru noꞌone peꞌie taꞌau i Lengi.

⁷ A God e asuie leune urine hunie uri mwala nge kire kei lae mai puri, kire ke lio saie uri manatana e tohungei diana oto liutaa, aana kire kei leesie manata-diananga ingeie hunikie aana a Jisas Kraes.

⁸ Aena aana maholo kie hiiwalaimoli aana a Jisas, a God mone e haꞌa-uurikie, na e asuie mola urine aena aana a God ko ilenimwaꞌe huni deu diana aaka maꞌalana kie kaꞌa malisine nga mei ola diana mwaanie.

⁹ Haꞌa-uuringe ikie e kaꞌa rau ike i tehulaꞌana nga mei ola kie asuie aana aꞌailaꞌanga ikie maraaka. !Haꞌike! A God ni e nii mwaakule aana, mwaanie uri nga iini e toohaꞌinie maraana haahie.

¹⁰ Aana ikie mo iinoni aana soihaadaꞌinge, ikie oto mo naꞌohai haꞌaholanga a God. E uusungeꞌinie mai a Jisas Kraes huni haꞌahaalukie, hunie kie ke asuie walu ola diana nge e oalaꞌiniꞌi oto waite, hunie kie ke asuiꞌi.

Ahutaka Kie Mani Neꞌie E Taꞌa-taꞌa Iinoni Aana Kraes

¹¹ Waite, mo Jiu kire sai lio toli aamiu mo Aapoloa Aaopa na kire sai ere aaelasiꞌomu uri iꞌomu mo puꞌo. Kire ko ere aaelasiꞌomu urine aena aana omu kaꞌa lae ike peꞌi torihesiꞌo mala ikire kire sai esuie torihesiꞌonga aana mo mwela mwane ikire huni esuie haꞌa-ara aana sapeda uri ikire mo iinoni a God.

¹² Na holaꞌinaꞌo iꞌomu mo puꞌo toꞌohuu taane, aana omu tohungei haꞌataulie a Kraes oto hiitoꞌo, na iꞌomu haꞌike aana poꞌo ni iinoni nge a God e lio hilisie nana maraana. Aana maholona, omu iiꞌo mola poꞌoi sinaha mwaanie mo heiholotaꞌinge nge a God e unuꞌi mei hunie mwala ingeie. Na omu iiꞌo oto mola mwaakule aana walumalau ienini, na omu kaꞌa toꞌo aana ike loꞌu nga mei ola diana huni maaꞌoohie, na hule aana omu kaꞌa saie ike noꞌone a God.

¹³ Holaꞌinaꞌo, omu iiꞌo haꞌataulie a God, taꞌe a Kraes e mae honotamiu mala nga uuraaꞌinge, na urine e tooleꞌomu oto mai i saana a God.

¹⁴ Aana a Kraes maraana oto e asuie hanuelamanga i matolana mo Jiu na mo Aapoloa Aaopa, na e asuie uri kire ke mani neꞌie taꞌa-taꞌa iinoni mola. E oho aasie oto para aani maelonga nge ko oopara aana e ro poꞌo ni iinoni.

¹⁵ Maenga ingeie e haꞌamangoa oto tolaha ni lulu i sulilana ahutana mo Haꞌatolanga mo Jiu. Na urine nge e si da hunie e ro taungei iinoni ngeena ke neꞌie taꞌa-taꞌa taungei iinoni haalu aani iiꞌo-rurunge ni henuelama peꞌie.

¹⁶ Maholo a Jisas e mae i lengine poꞌu-poꞌu, e taꞌaasie oto maelonganga i matolana e ro pulitaa ngeena, na e ladoa e ro taungei iinoni ngeena aana e taꞌa-taꞌa mei sape na e toolera mai eelihoꞌi takoie a God.

¹⁷ Oto a Kraes e lae oto mai huni tarohaꞌinie Tataroha Diana i sulie hanuelamanga hunie taꞌena nga iinoni, huniꞌomu mo Aapoloa Aaopa nge omu iiꞌo haꞌataulie a God, na noꞌone huniꞌemi mo Jiu nge emi iiꞌo karaꞌinie.

¹⁸ Na aena aana nga taa a Kraes e asuie, iꞌemi mo Jiu oto peꞌiꞌomu mo Aapoloa Aaopa, kie sai meni lae oto mai i saana Aamaka mola aana nanamanga aana e taꞌa-taꞌa Liꞌoa.

¹⁹ Oto iꞌomu mo iini nge iꞌomu nga mo Jiu haꞌike, omu kaꞌa neꞌi awataa ike loꞌu mwaanie ngaeta hanue aaopa. !Haꞌike! Omu neꞌie oto e taꞌa-taꞌa komu ni iinoni a God, na omu neꞌie oto ngaeta mo iinoni aana uluhe ingeie.

²⁰ Iꞌomu, omu urihana oto noꞌone nume a God ko esuie. Nume ngeena, mo hurulaꞌaa na mo propet kire neꞌi poo-poota aana, na a Jisas Kraes oto tohungana haususu aana.

²¹ Na a Kraes oto e hele maꞌutaꞌa aana ahutana nume ngeena loko-loko, na ko da nume ngeena ko si peine na ko neꞌi nume maaꞌi nana Aalaha.

²² Aena aana omu iiꞌo ruru oto peꞌie a Kraes, a God e asuie oto hunie omu ke iiꞌo ruru peꞌie ahutana mo iinoni kire hiiwalaimoli aana a Kraes, na omu meni neꞌie ngaeta nume maaꞌi nge Liꞌoa Maaꞌi a God e iiꞌo aana.