Epesas 1 - Tataroha Diana

Mei Wala Ni Saediananga Hunie Mo Epesas

¹ Saediananga mwaanieu a Pol, iini nge a God maraana e lio hilisieu uri hunie ne ke neꞌi hurulaꞌaa nana a Jisas Kraes. No ko uusu-uusu weu huniꞌomu mo iinoni a God wau aana huilume i Epesas, nge omu ko lulu i sulie a Jisas Kraes toꞌohuu na omu lado oto peꞌie.

² No ko eitanaie a God Aamaka na Aalaha ikie a Jisas Kraes uri hahuꞌana manata-diananga na hanuelamanga ingeie ke iiꞌo peꞌiꞌomu.

A God E Haꞌadianaꞌakie I Tehulaꞌana A Jisas Kraes

³ Kie ke paalahea Aamana a Jisas Kraes Aalaha ikie, aana a God e haꞌadianaꞌakie aana mo niinge ni Liꞌoa ingeie uure i Lengi i tehulaꞌana iiꞌo-rurunge ikie peꞌie a Jisas Kraes.

⁴ I naꞌo aana maholo a God e kaꞌa haꞌaholaa ue walumalau, e lio hilisikie oto huni neꞌi iinoni ingeie na huni iiꞌo ruru peꞌie a Kraes uri hunie kie ke iiꞌo maaꞌi na kie ke suꞌuri toꞌo aana nga mei ola aaela i maana.

⁵ Aana a God e manata diana hunikie na e lio hilisikie oto wau i naꞌo hunie kie ke neꞌi kalena i tehulaꞌana a Jisas Kraes. Na e tohungei toꞌohie oto saena a God huni esuie urine.

⁶ Oto kie ke lahea God haahie niinge ingeie e manikuluꞌe nge e nii mwaakule aana hunikie i tehulaꞌana a Kalena, iini e tohungei manata diana hunie.

⁷ Na i tehulaꞌana a Kraes e tapa oolisikie aana maelana, nge a God e taꞌaasie noꞌone mo oorahaꞌaanga ikie. A Kraes e tohungei haꞌadianaꞌakie aana mo hahuꞌei niinge diana ingeie

⁸ nge e sai nii peine aani oto hunikie. Oto i sulie saenanaunge na lio sai-olanga a God,

⁹ nge e haataꞌinie oalaꞌinge ingeie oto hunikie. Wau i naꞌo, oalaꞌinge ngeena e oꞌoꞌo mumuni mola, aana a God e loꞌongaꞌi aakau oto aana mai naꞌo hunie uri a Kraes ke si haꞌa-oaie.

¹⁰ Na haꞌa-oalaꞌinge a God ngeena ke si oa aana tohungei maholo hunie, huni tarakonie mai i saana Kraes taꞌe-taꞌena nga ola i laona haꞌaholanga, maꞌalana mo ola taꞌau i Lengi na mo ola mai aano i leu. Na a Kraes oto kei peine haahiꞌi.

¹¹ Na loꞌu, i tehulaꞌana a Kraes e lio hilisikie, nge kie neꞌi iinoni oto ingeie. Na leune a God e asuie oto, mala oto ko esuie walu ola i sulie oalaꞌinge na loꞌongaꞌinge ingeie.

¹² Oto neꞌisaenga a God hunie iꞌemeelu mo Jiu kaꞌu melu ke holaꞌi hiiwalaimoli aana a Kraes, na melu ke lahea manikuluhaꞌana God i naꞌona walumalau.

¹³ Oto iꞌomu mo Aapoloa Aaopa noꞌone, omu neꞌi iinoni a God aana maholo omu rongoa mei wala toꞌohuu aana Tataroha Diana uri a God ko sare haꞌa-uuriꞌomu. Omu hiiwalaimoli oto aana Kraes ni ngeena, na huni haataꞌinie uri a God oto e toꞌo aamiu, e niie Liꞌoa Maaꞌi nge e haiholotaꞌinie oto huniꞌomu.

¹⁴ Aana kie toꞌo aana oto Liꞌoa Maaꞌi, kie sai diana aana uri kie kei toꞌo aana oto walu ola nge a God e haiholotaꞌiniꞌi oto mai naꞌo huni niiꞌi naka. Aana e urine kaꞌu a God kei da noꞌone hunie kie ke tohungei iiꞌo luhetaꞌi oto toꞌohuu peꞌie, na ahutana mwala ke lahea God, iini e hahuꞌei diana liutaa.

A Pol E Aarengaꞌi Talana Mo Epesas Hunie Kire Ke Saenanau Aana Tolahana A God

¹⁵ Aena urinena, uure oto aana maholo nou rongoa uri omu hiiwalaimoli aana Aalaha ikie a Jisas, na uri omu tohungei manata diana hunie mo iinoni a God,

¹⁶ nou kaꞌa pupulongo ike huni paalahea God haahiꞌomu. Nou sai loꞌongaꞌiniꞌomu mola tarau i laona mo aarengaꞌinge ineu.

¹⁷ Na no ko eitanaie a God nge ingeie hahuꞌana Aamana Aalaha ikie a Jisas Kraes, uri a Liꞌoa Maaꞌi ke haataꞌinie mo ola i sulie a God huniꞌomu, na omu ke saenanau diana aani.

¹⁸ Nge no ko eitanaie a God hunie ke tahanie saemiu, hunie omu ke lio saie taꞌena nga ola diana nge e haiholotaꞌi huni niiꞌi hunikie, mwala ingeie. Na kie ko maaꞌoohi susutoꞌo peꞌi norutoꞌonga aana God hunie walu ola ngeena.

¹⁹ Na no ko eitanaie a God loꞌu hunie omu ke lio saie noꞌone nanamanga paine ingeie nge ko esu i laona manataka, mo iini kie hiiwalaimoli aana. Nanamanga nge ko esu oto aana maurihaꞌaka,

²⁰ kaꞌu a God e asu aana maholo e taꞌea a Kraes hunie ke mauri eelihoꞌi loꞌu mwaanie maenga na hunie ke iiꞌo aana naꞌohai iiꞌo-iiꞌoha i pwalo-pwalona taꞌau i Lengi.

²¹ A Kraes e iiꞌo oto taꞌau i Lengi na e nanama oto liutaa aana taꞌe-taꞌena nga aalaha, na mo aakalo, na mo inemauri, na mo liꞌoa aaela, na taꞌena nga iini nanama urine. A Kraes e nanama oto haahire mango-mango, mo iini aana walumalau ie na noꞌone aana walumalau kei lae ue mai.

²² Taꞌe-taꞌena nga ola aana haꞌaholanga kei iiꞌo i mamalutana nanamanga a Kraes, na e asuie oto urine huni peꞌie soihaadaꞌinge.

²³ Soihaadaꞌinge oto sapena Kraes, na ingeie oto ko esuie soihaadaꞌinge ke neꞌi iinoni haꞌileku, mala a Kraes e asuie taꞌena nga ola aana haꞌaholanga ke neꞌi ola haꞌileku.