3 Jon 1 - Tataroha Diana

Mei Wala Ni Saediananga Hunie A Kaeas

¹ Saediananga mwaanieu Rato ni mwane aana soihaadaꞌinge, huniꞌo Kaeas. Nou tohungei manata diana huniꞌo, malahuku diana ineu,

² na aarengaꞌinge ineu talamu, uri hunie ahutana walu ola ke mwadaꞌusiꞌo na o ke iiꞌo-iiꞌo awaa mola, oto mala nou saie uri iiꞌonga iꞌoe peꞌie a God e aꞌailaꞌa.

³ Nou tohungei ilenimwaꞌe aana maholo ngaeta mo mwaasine e hule mai na kire haꞌarongoau aana mauringe iꞌoe e tohungei aꞌailaꞌa na uri o ko lulu i sulie ue walaimolinge toꞌohuu.

⁴ Nga mei ola aaopa hunie ne ke ilenimwaꞌe liutaa haahie haꞌike loꞌu, taꞌe mwaanie no ko rongoa mo kaleku ko lulu i sulie walaimolinge.

Kie Ke Peꞌie Mo Haꞌa-uusuli Toꞌohuu

^5-6 Nou saie, malahuku, uri o kaꞌa sai mou-mou ike mwaanie tohungei esunge diana nana God, aana kira hiiwalaimoli nge kire ko liu weu i seemu, kire ko haꞌa-haꞌarongoa oto soihaadaꞌinge mai leu aana manata-diananga iꞌoe hunire. Suli maholo kire ko unue uri o ko tohungei lio i suli diana aada, na o sai peꞌire loꞌu aana nga mo ola huni haꞌamwadaꞌue mo laenga ikire. Maꞌalana o kaꞌa manataꞌinie ike ngaeta mo iini kire hule aamu ngeena, taꞌe o tohungei peꞌi diana aada aana tolahai ola diana nge e malisine mo koni-konihe a God.

⁷ E diana aana o ko peꞌire urine aena aana maholo kire aehota peꞌie mei esunge ienini huni tarohaꞌinie a Jisas Kraes, kire oalaꞌinie uri kire saꞌa toolea ike nga mei niinge mwaanie mo iini kire kaꞌa hiiwalaimoli ike aana a Jisas.

⁸ Oto ikie, mo iini kie ko hiiwalaimoli aana a Jisas, leu i sapeka oto hunie kie ke peꞌie mo mwane urine, uri hunie kie ke mani esu tararuru peꞌire, hunie mwala hunge ke manataꞌinie walaimolinge.

⁹ Nou uusu-uusu keꞌu hunie soihaadaꞌinge i sulie leune, taꞌe a Daeotrepis, iini nge ko sare neꞌi naꞌohai mwane aana soihaadaꞌinge, e kaꞌa sare rongo ike hunie nga taa nou unue.

¹⁰ Oto mala uri no ko lae wau, ne ke si haataꞌinie taane aamiu ahutana walu ola aaela nge ko esuiꞌi, na mo eeronga taꞌewau nge ko talei unuꞌi mola i suliꞌemeelu. Na aena aana mo aaelanga ngeena kire kaꞌa paine ue i sulie saena, nge ko sare asuie loꞌu nga mo aaelanga paine. Oto e kaꞌa sare tola konie ike mo mwaasine, na hule aana ko uure honosie mo iini ko sare tola konie mo mwaasine ngeena, na ko neꞌire i sinaha mwaanie soihaadaꞌinge.

¹¹ Oto o ke suꞌuri heimaanie mo tolahai iinoni aaela urine, malahuku, taꞌe o ke lae mola i sulie tolahai iinoni diana. Aana iini nge ko lae i sulie tolahai iinoni diana, nge ingeie iinoni a God otona. Taꞌe iini nge ko lae i sulie tolahai iinoni aaela, nge e kaꞌa manataꞌinie ike a God.

¹² Oto o ke peꞌie a Demitrias maholo kei hule wau i seemiu, aana ahutana mwala ko meni unue uri ingeie mwane diana, na walu ola ko esuiꞌi e oodotaꞌi na ko haataꞌinie uri e toꞌohuu oto. Ineu na nou unue noꞌone urine, na iꞌoe, o saie mola no ko ere toꞌohuu.

Mei Wala Ni Saediananga Ooreta

¹³ Mo ola hunge nou sare unuꞌi taane huniꞌo, taꞌe nou kaꞌa sare uusuꞌi ike,

¹⁴ aana nou norutoꞌo mola uri karaꞌinie oto ne kei leesiꞌo, na maholona kure ke si meni ere-ere loꞌu.

¹⁵ Hanuelamanga ke iiꞌo peꞌiꞌo. Mo malahukarue mai i leu kire ko niie saediananga ikire huniꞌo, na saeku uri o ke niie noꞌone ilenimwaꞌenga na saediananga ineu hunie ahutana mo malahukaelu nge kire iiꞌo wau peꞌiꞌomu.