2 Timoti 4 - Tataroha Diana

¹ Maholo a Jisas Kraes kei ooli loꞌu mei mala inemauri, nge ke si leie ahutana mo iinoni, mo iini e mauri ue na mo iini e mae oto. Oto no ko unu tahangaꞌinie oto huniꞌo i maana a God na a Jisas Kraes

² uri o ke lae taraꞌasi oto peꞌie tarohaꞌinilana walana God. O ke laeliwala hunie mwala oto tarau, maꞌalana mwala kaꞌa sare rongo huniꞌo. O ke haꞌa-oodohie tolahada maholo kire ko lae takalo, na o ke haataꞌinie mo oorahaꞌaa ikire hunire hunie kire ke aaliꞌu mwaaniꞌi, na o ke ere haꞌasusure noꞌone. Walu ola ngeena o ke asuiꞌi peꞌi toli-rakonga, na peꞌi haꞌananaunge diana.

³ O ke asu urine, aena aana maholo kei lae ue mai nge mwala e saꞌa sare rongo ike hunie mo haꞌa-uusulinge toꞌohuu, na kire kei lae mola i sulie saeda maraada. Kire kei loꞌohi haꞌa-uusuli taꞌewau mola hunie uri kire ke sai rongoa haꞌa-uusulinge nge kire ko sasare rongoa.

⁴ Na kire kei eeliꞌu mola mwaanie walaimolinge huni rongo i sulie mo laladonga eero-eero.

⁵ Taꞌe iꞌoe oto o ke loꞌo-loꞌongaꞌi diana tarau, na o ke uure aꞌailaꞌa mola maꞌalana uri o ko lae oodoie loꞌu aasanga. O ke lae taraꞌasi mola peꞌie tarohaꞌinilana Tataroha Diana, na o ke asuie toꞌohuu mei esunge a God e niie huniꞌo ngeena.

⁶ Oto aana ineu maraaku, o saie taane uri mauringe ineu nou niie kaꞌu oto i naꞌo mala uuraaꞌinge hunie a God, na oto ie e hule oto aana leu ooreta, aana e hule oto aana maholo ineu huni mae.

⁷ Na mauringe ineu e urihana noꞌone halinge. Na nou huru diana aana halinge ngeena, aana maꞌalana nga taa e raꞌusieu, taꞌe nou esu diana mola nana a Aalaha. Oto maholo ie nou hule oto aana haꞌamangolana halinge ngeena, aana nou haꞌamangoa oto asunge e niie mai hunieu. Nou hele maꞌutaꞌa aana hiiwalaimolinge toꞌohuu, na nou lae-lae peꞌi haꞌa-uusulilana mwala aana.

⁸ Na waaite nge ne kei toolea i maana halinge ngeena e iiꞌo aakau loosieu oto, aana ineu nou iiꞌo oodotaꞌi oto i maana God. A Aalaha kei lei oodotaꞌi aana ahutana mwala, na aana Dinge Ooreta ke si waaieu taane. E saꞌa da ike leune hunieu haliꞌite, taꞌe hunie ahutana mo iini kire manata diana hunie na kire ko maaꞌoohie oolinge ingeie mai.

A Pol E Unue A Timoti Ke Lae Mai Saana

⁹ Kaleku, saeku hunie o ke dau aahonga oto huni lae mai seeku lau-leu.

¹⁰ A Dimas e toliꞌaasieu aana ko tohungei saetoꞌo aana mo ola aana walumalau ie, na e lae oto aana huilume i Tesalonaeka. A Kresens e lae huni esu nana God aana poꞌo ni henue i Kalesia, na a Taetas e lae urine noꞌone hunie poꞌo ni henue i Dalmesia.

^11-12 A Luk mola e si oore mai peꞌieu ie, aana a Tikikas nou uusungeꞌinie oto wau i seemiu aana huilume i Epesas. Maholo o ko lae mai, o ke toolea oto mai a Mak, aena aana ingeie e sai peꞌi diana aana asunge ineu.

¹³ Na o ke toolea mai mei sala tetewa mwaanie wawai nge nou haꞌa-oorea peꞌie a Kapas wau aana huilume i Troas. Na o ke toolea noꞌone mai mo uusu-uusu hio-hio ineu, oto liutaa mo iini nou tohungei saetoꞌo aani nge uusuleni e lae aani teꞌe-teꞌei nanikot.

^14-15 O ke lio talamu mwaanie ngaeta mwane satana a Aleksanda. Ingeie ngaeta mwane nge e sai esuie taꞌena nga ola oto mola aani aean. E tohungei waelieu aana e tohungei sereꞌinie haꞌa-uusulinge ikolu. A Aalaha ke si haꞌaletehie taane haahie nga taa e asuie ngeena.

¹⁶ Eetana nga maholo leileku e lae, nga taꞌa-taꞌa iini e kaꞌa lae ike mai huni ere ooliteku. !Haꞌike! Ahutana mwala kire mani toliꞌaasieu mola, taꞌe no ko aarengaꞌi mola talada, hunie a God ke pulongosie mola takalonga ikire ngeena.

¹⁷ Taꞌe a Aalaha e lae peꞌi haꞌa-uurieu na e niie nanamanga hunieu uri hunie ne ke tarohaꞌinie Tataroha Diana hunie mo Aapoloa Aaopa kire ke rongoa. Na e peꞌieu noꞌone aana maholona hunie kira lei-lei ke suꞌuri lei mae aaku.

¹⁸ Nou tohungei norutoꞌo mola aana uri a Aalaha kei lio i suli diana aaku maꞌalana mei aaelanga uri taa ke rau loꞌu eeku, na ingeie kei tola konieu taane oto taꞌau i laona aalahanga ingeie taꞌau i Lengi. !Iau! Kie ke haꞌamanikuluꞌaa taraureꞌi oto di. Ke urine oto.

Mei Wala Ni Saediananga Ooreta

¹⁹ O ke niie mei wala ni saediananga ineu hunie a Prisila na poro ingeie a Akuila, na noꞌone hunie uluhe ni iinoni a Onesiporas.

²⁰ Mwane oamu a Erastas e kaꞌa lae ike mai peꞌieu, taꞌe e oore mola wau aana huilume i Korinit. Na ngaeta mwane oamu loꞌu, a Tropimas, nou lae mwaanie mola wau aana huilume i Maelitas aana mweitaꞌaa ko mataꞌi hiitoꞌo.

²¹ O ke dau aahonga huni hule mai seeku i naꞌona mo waro-waro wawai aana iihiꞌure mwaanie aasi e mawa honosiꞌo. A Iubiulas, na a Piudens, na a Laenas, na keni aasikaelu a Klodia, kire ko meni niie noꞌone mei wala ni saediananga huniꞌo na hunie kira hiiwalaimoli wau i leune.

²² No ko eitanaie Aalaha ikie ke iiꞌo i laona manatamu, na hahuꞌana manata-diananga ingeie ke iiꞌo peꞌiꞌo.