2 Timoti 3 - Tataroha Diana

Mwala Kei Aaela Oto Liutaa Aana Mo Dinge Ooreta

¹ O ke sai diana aana uri, aana mo dinge ooreta ahutana walu ola kei meni deu aasa oto hiitoꞌo.

² Mwala kei loꞌo-loꞌongaꞌinire oto mola maraada. Kire kei neꞌi-neꞌisae paine oto hiitoꞌo aana toꞌoha, na kire kei lae-lahera maraada, na kire kei too-toohaꞌinire oto hiitoꞌo. Kire kei talei ere-ere aaela mola, na kire saꞌa totola i sulie ike mo nikada na mo aamada. Kire saꞌa paa-paalahea ike nga iini haahie nga mei ola nge niilana e lae oto hunie, na kire saꞌa loꞌo-loꞌongaꞌinie ike loꞌu a God.

³ Kire saꞌa saie ike loꞌu manata-diananga, na kire saꞌa sae-sae aasi ike loꞌu hunie nga iinoni. Kire kei eero-eerotaꞌinie mola mwala, na kire saꞌa kinetaꞌinie ike tolahada mwaanie aaelanga. Kire saꞌa aama-aamasie ike nga iini, na kire kei leledie mola taꞌena nga ola diana.

⁴ Maꞌalana mo malahude, taꞌe kire kei pwelora mola, na kire saꞌa holaꞌi loꞌongaꞌi keꞌu i sulie taꞌena nga ola kire ko sare asuie, na kire kei too-toohaꞌinire oto e pulo. Kire kei saetoꞌo aana mola mo ola nge ko da kire ke hii diana, taꞌe kire kaꞌa saetoꞌo aana ike a God.

⁵ Kire kei lupweꞌi esu taane huni haataꞌinie uri ikire mo iinoni maaꞌi, taꞌe e kaꞌa toꞌohuu ike, na hule aana kire kaꞌa kele saetoꞌo aana ike nanamanga a God ke lio i sulie maurihaꞌada. Mwala urine, o ke suꞌuri lae i sulire, taꞌe o ke iiꞌo haꞌataulire mola.

⁶ Ngaeta mo iini aana mwala ngeena kire sai walo liu i matolana mo nume peꞌie haꞌa-uusulinge takalo, na kire ko haꞌa-olaa mo huꞌe nge kire ko neꞌi-neꞌisae rue-ruaꞌa. Mo huꞌe ngeena kire oorahaꞌaala na kire ko lae mola i sulie taꞌena nga saehanalinge ikire.

⁷ Kire ko eriꞌapasie taane uri kire ke sai diana aana mo ola oto hunge, taꞌe kire kaꞌa sai deu oodoie ike tohungana saenanaunge aana walaimolinge.

⁸ Mwala nge kire ko lae hailiu i sulie mo huꞌe urine, kire ko ere aaelasie tohungana walaimolinge, mala a Janis na a Jambris kirerue ere aaelasie a Mosis wau i naꞌo. Kire kaꞌa toꞌo aana ike nga mei loꞌongaꞌinge ke oodo, na hiiwalaimolinge ikire pweai ola mola ni ngeena.

⁹ Taꞌe kire saꞌa lae haꞌatau ike peꞌie tolahai iinoni aaela ikire ngeena. Aana e saꞌa tewa na mwala kei lio saie oto puꞌonga ikire, mala kaꞌu lio sailana a Janis na a Jambris e lae lau-leu mola wau i naꞌo.

A Timoti Ke Haimaanie A Pol Aana Tarohaꞌinilana Walana God

¹⁰ Taꞌe iꞌoe, kaleku, o saie oto mo haꞌa-uusulinge ineu na iiꞌolaku e uri taa, na nga moi taa no ko sare asuiꞌi. O lio saie kaꞌu oto hiiwalaimolinge ineu, na toli-rakonga ineu, na manata-diananga ineu hunie ahutana mwala, na toli-susuleꞌinge ineu aana maholo e aasa oto hiitoꞌo.

¹¹ O saie kaꞌu mola haꞌaloileku e lae na nou sapesalu oto hiitoꞌo mala o leesie aana mo huilume i Antiok, na i Aekoniam, na i Listra. Nou tohungei sapesalu oto hiitoꞌo, taꞌe no ko paalahea a Aalaha oto liutaa aana e haꞌa-uurieu mola mwaanie walu olana.

¹² Na e toꞌohuu oto uri taꞌe-taꞌena nga iini ko lado peꞌie a Jisas Kraes na ko sare iiꞌo maaꞌi nana, nge mwala kei haꞌaloie oto urine.

¹³ Taꞌe mwala tataꞌala nge kire ko haꞌapweue mola mwala, kire kei hunge oto loꞌu liutaa. Kire kei aaela oto loꞌu, na kire kei lae peꞌi eeroa mwala oto hiitoꞌo, taꞌe lae-lae na mwala kei haro pwelora loꞌu noꞌone.

¹⁴ Taꞌe iꞌoe, kaleku, o ke hele susuleꞌi mola aana nga taa nge haꞌa-uusulilemu e lae oto aana na o hiiwalaimoli oto noꞌone aana, aena aana o sai diana aameelu oto mo iini melu haꞌa-uusuliꞌo.

¹⁵ O sai diana aana kaꞌu oto mo Uusu-uusu Maaꞌi na hule aana o neꞌi mwela ue. Na mo haꞌa-uusulinge aana kire sai peꞌikie aani loꞌongaꞌinge diana na aani hiiwalaimolinge aana a Jisas Kraes hunie uri a God ke haꞌa-uurikie.

¹⁶ Taꞌe-taꞌena nga ola i laona mo Uusu-uusu Maaꞌi, walana God ni ngeena. Na ingeie ni e unue hunie mwala ke uusu-uusu oto i sulie loꞌongaꞌinge ingeie maraana. Oto Uusu-uusu Maaꞌi e tohungei diana huni haꞌananaukie, na huni haataꞌinie mo oorahaꞌaanga ikie aaka, na huni haꞌa-oodohie tolahaka, na huni haꞌa-uusulikie aana mau-meuringe nge e oodo i maana God.

¹⁷ Aana ko urine haꞌalaa ikie mo iinoni a God kie sai deu diana aani lulu i sulilana mo tolahai ola diana na kei tohungei melisine oto uri kie ke asuie mo tohungei esunge diana.