2 Timoti 2 - Tataroha Diana

O Ke Neꞌi Ramo Toꞌohuu Nana Jisas Kraes

¹ Oto iꞌoe, kaleku, o ke aꞌailaꞌa aana asunge nana a Aalaha, na ingeie oto ke si peꞌiꞌo aana saena mone hunie ke peꞌikie.

² O rorongoa oto mo haꞌa-uusulinge ineu hunie mwala. Oto saeku uri taꞌa-taꞌa taungei olana loꞌu mola nge iꞌoe noꞌone o ke haꞌa-uusulie mwala aani. Na oto liutaa, o ke haꞌa-uusuli aana mo ola ngeena hunie mo mwane ni nou-norue nge o saie uri ikire noꞌone kire sai haꞌa-uusulie ngaeta mwala loꞌu eeni.

³ Na mala nga ramo e kaꞌa sai aapwasu ike aana sapesalunge taꞌe ko esu taraꞌasi mola, nge iꞌoe noꞌone o ke asu aꞌailaꞌa urine loꞌu mala nga ramo diana a Jisas Kraes maꞌalana sapesalunge nge ko reꞌusieu ie ke rau noꞌone aamu urine.

⁴ Na loꞌu, o ke haimaanie noꞌone tolahana mo ramo, aana ramo nge ko sare da hunie uri aalaha ingeie ke ilenimwaꞌe peꞌie, e saꞌa asuie ike nga kele mei esunge ingeie maraana. Taꞌe ramo diana ngeena ko esu tarau mola i sulie asunge nana aalaha ingeie.

⁵ Na ne ke haꞌamalaa asunge iꞌoe loꞌu mala nga iini ko sare naꞌo aana nga halinge. Iinonine e saꞌa hahuꞌei toolea ike nga waaite na e kaꞌa lae ike i sulie mo haꞌatolanga aana halinge ngeena.

⁶ Na asunge iꞌoe ke urihana noꞌone iinoni nge ko esu waaꞌiniꞌini aana hohola ingeie. Iinonine e malisine oto uri ingeie ni kei holaꞌi ngeue mo ngeulaa aana hohola ngeena.

⁷ O ke loꞌongaꞌi diana i sulie nga taa nge no ko unue huniꞌo ienini, na a Aalaha kei peꞌiꞌo taane aani haataꞌinilana saenanaunge i sulie ahutana walu ola ngeena.

⁸ O ke loꞌo-loꞌongaꞌinie mola a Jisas, aana ingeie a Kraes, iini a God e haiholotaꞌinie kei haꞌa-uurie mo iinoni ingeie. E haꞌa-oaie walana mo propet aana e uure mwaanie komu a Deved Inemauri. Na e taꞌelaꞌi mwaanie maenga mala no ko unu-unue oto tarau maholo no ko laengaꞌinie Tataroha Diana

⁹ Na i tehulaꞌana Tataroha Diana ngeena mola nge hoꞌosileku e lae aani iieliheu ie. Taꞌe haꞌa-uusulinge a God nga walo hoꞌo-hoꞌo haꞌike aana.

¹⁰ Aena urine kaꞌu, maꞌalana mwala ko haꞌaloieu mala ie, taꞌe no ko iiꞌo susu mola. Aana tala urine nge no ko peꞌie mwala nge a God e lio hilisire oto, hunie kire ke toꞌo aana maurihe peꞌie a Jisas Kraes na kire ke iiꞌo peꞌie aana manikuluhaꞌana oto di.

¹¹ Mei wala toꞌohuu oto ienini. Mala uri kie ko mae tararuru peꞌie a Kraes, nge kie kei meuri tararuru noꞌone peꞌie.

¹² Mala uri kie ko iiꞌo susuleꞌi mola aana hiiwalaimolinge maꞌalana kie ko sapesalu, nge kie sai aalaha noꞌone mola peꞌie. Taꞌe mala uri kie ko taateingeꞌinie uri kie kaꞌa saie ike a Kraes, nge ingeie kei taateingeꞌinikie noꞌone uri e kaꞌa saikie.

¹³ Maꞌalana uri kie kaꞌa sai hele i sulie mo heiholotaꞌinge ikie, taꞌe ingeie kei hele maꞌutaꞌa mola aana mo heiholotaꞌinge ingeie tarau, aana tolahana maraana e kaꞌa toliꞌaasie ike hunie ke eero, wa huni lae aaopa mwaanie haiholotaꞌinge ingeie.

O Ke Neꞌi Mwane Auꞌesu Diana Nge E Toꞌohie Saena A God

¹⁴ O ke lae peꞌi haꞌa-haꞌa-aamasitoꞌoa kira hiiwalaimoli aana mo ola ngeena. O ke ere hiitoꞌo hunire aana nanamanga a God uri kire ke suꞌuri ere haitelili aana mo ola kire kaꞌa roroꞌa ike. Aana tala urine e tohungei aaela oto hiitoꞌo, na e sai waelie mola mo iini ko pwaarongoa mo erenga haitelili urine.

¹⁵ O ke ariꞌapasie o ke neꞌi iinoni auꞌesu diana, hunie a God ke saemango haahie asunge iꞌoe. O ke haꞌa-uusuli toꞌohuu aana walana God, hunie o ke suꞌuri hii masanga i maana.

¹⁶ O ke neꞌi aasie taꞌena nga erenga aaela na mo wala mwaakule i purimu, aena aana mwala ko ere-ere urine, kire ko si oohea oto mwala haꞌataulie a God ni ngeena.

¹⁷ Mo erenga ikire ngeena e urihana mola ho osa nge e kaꞌa sai mola ike. Ere-erenga e ro mwane, a Haemeneas na a Pilitas, na e urine oto.

¹⁸ Kirerue toliꞌaasie oto mo erenga toꞌohuu, na kirerue ko si lae peꞌi unu heiliu mola aana uri taꞌelaꞌinge kira hiiwalaimoli mwaanie maenga e rau oto. Na peꞌie mo wala takalo urine, kirerue ko waelie mola hiiwalaimolinge ngaeta mwala.

¹⁹ Taꞌe maꞌalana ngaeta mo iini ko neꞌisae rue-ruaꞌa urine, soihaadaꞌinge e saꞌa rongo ike hunire aena aana soihaadaꞌinge e toꞌo aana taane poo-pootana nge e kaꞌa sai esuleꞌi ike. Na a God e uusue mo wala i sulie soihaadaꞌinge ingeie uuri, “A Aalaha e manataꞌinie taane mo iini ingeie,” na loꞌu uuri, “Ahutana mo iini ko unue uri kire hiiwalaimoli aana a Aalaha, kire ke mani toliꞌaasie oto mo tolahai ola aaela ikire.”

²⁰ E Timoti, o saie taane uri mo nume paine kira toꞌo-toꞌo kire toꞌo aana mo nime ikire nge kire asuiꞌi aani kol na aani siliva, na ngaeta mo iini kire asuiꞌi mola aani ei wa aani mwakano. Ngaeta mo iini aana mo nime ngeena kire malisine mo maholo roroꞌa na mo maholo ni haꞌamaꞌunge, taꞌe ngaeta mo iini kire kaꞌa malisine ike mo maholo paine ngeena, aana taungei nime urine mo nime taꞌewau mola.

²¹ E urine noꞌone mola aana mo iinoni. Mo iini nge kire ko toliꞌaasie mo tolahai ola aaela ngeena oto taꞌingelu mwaanire, nge kire kei iiꞌo maaꞌi oto i maana Aalaha ikire. Mauringe ikire kei toꞌohie saena a Aalaha, na kire sai esuie taꞌena nga mei esunge diana oto mola nana.

²² Oto o ke lio talamu mwaanie mo saehanalinge nge ko too-toolea mo saanau, taꞌe o ke dau diana mola tarau. Na o ke ariꞌapasie mola lulu i sulilana oodotaꞌinge, na hiiwalaimolinge iꞌoe ke susu, na o ke manata diana hunie ahutana mwala, na o ke iiꞌo ni henuelama mola peꞌie taꞌena nga iinoni. Na o ke hikusie mo iini ko palo-paloa a God toꞌohuu aani sae manola.

²³ O ke kinetaꞌiniꞌo mwaanie taꞌena nga haꞌa-erenga takalo na mo erenga taꞌewau. Aana o saie oto uri mo erenga urine kire sai esuie mola haꞌa-erenga ke paine i matolana mwala,

²⁴ na iinoni euꞌesu a God ke suꞌuri neꞌi iinoni haꞌa-haꞌa-ere. Urine haꞌike, taꞌe ke toli rako mola peꞌie mwala, na ke saenanau diana aana tolaha ni haꞌa-uusulinge, na ke suꞌuri sae-saewasu lau-leu.

²⁵ Na iinoni euꞌesu a God ke haro kele lae rako mola maholo ko haꞌa-oodohie mwala nge kire ko leledie haꞌa-uusulinge ingeie. Aana ko urine, ohe a God kei peꞌie mwalana hunie kire ke oolisie loꞌongaꞌinge ikire, na hunie kire ke sai diana aana mo haꞌa-uusulinge toꞌohuu.

²⁶ A Pwelu Eero-eero ni mola e tapolie mwala ngeena aana lolosilana hune ingeie hunire, na ingeie ni mola ko si deu rarahire uri hunie kire ke dau aaela i sulie nga taa e saetoꞌo aana. Taꞌe mala uri kire kei aehota lio saie mo haꞌa-uusulinge toꞌohuu, nge luhesilada e sai lae taane mola, na kire sai tehisie mola a Pwelu Eero-eero.