2 Tesalonaeka 3 - Tataroha Diana

Kie Ke Aarengaꞌi Talana Mo Iini Nge Kire Ko Tarohaꞌinie Walana God

¹ Oto maeni eesiku maaꞌi, omu ke aarengaꞌi talameelu hunie uri melu ke sai tarohaꞌinie walana a Aalaha oto hailiu hunie taꞌena nga hanue, na hunie uri mwala ke rongo peꞌi haꞌamaꞌunge aana oto mala iꞌomu omu esuie aana maholo omu rongoa.

² Na omu ke aarengaꞌi noꞌone hunie a God ke kinetaꞌiniꞌemeelu mwaanie nimana mwala aaela nge tolahada e tataꞌala. Aana ahutana mwala saꞌa mani hiiwalaimoli ike aana Tataroha Diana.

³ Taꞌe a Aalaha mone kei deu i sulie walana, na ingeie kei haꞌa-aꞌailaꞌaꞌomu na kei lio i suli diana aamiu mwaanie uri nanamanga a Satan e waeliꞌomu.

⁴ Na Aalaha ikie oto e da hunie melu ke norutoꞌo aamiu, kaꞌu omu ko lulu i sulie oto nga taa nge melu ko unu-unue huniꞌomu. Na melu saie noꞌone uri omu kei lae taraꞌasi tarau.

⁵ Oto melu ko eitanaie Aalaha ikie uri ingeie ke haꞌasusue mo loꞌongaꞌinge iꞌomu hunie omu ke saenanau diana aana manata-diananga a God huniꞌomu, na aana tolahana a Kraes hunie omu ke uure aꞌailaꞌa taraꞌasi.

Kie Ke Asu Aꞌailaꞌa Na Mwaanie Kie Lalawasie Asunge

⁶ Maeni eesiku maaꞌi, melu ko eitanaiꞌomu aana satana a Jisas Kraes Aalaha ikie, uri omu ke suꞌuri hikusie mo eesike nge kire ko lalawa huni esu, na kire kaꞌa tola i sulie ike mo ola melu ko unu-unuꞌi huniꞌomu.

⁷ Iꞌomu maraamiu na omu saie oto uri omu ke lulu i sulie oto tolahameelu. Aana maholo melu oꞌoꞌo peꞌiꞌomu, melu kaꞌa lalawa ike huni esu.

⁸ Na melu kaꞌa totola mwaakule ike aana nga mei ngeulaa mwaanie mwala, taꞌe melu haro holi-holiꞌi mola. Oto melu esu susue mola aatowaa na rodo mwaanie nga iini eemiu e tolahiꞌe loꞌu aana nga mei ola.

⁹ Maholo melu ko lae peꞌi esu urine, e kaꞌa ike i sulie uri melu kaꞌa toꞌo aana nga nanamanga huni da peꞌinge mwaaniꞌomu. !Haꞌike! Taꞌe melu sare haataꞌinie mola aamiu uri tohungei tala diana hunie uri omu ke lae i sulie ni otona.

¹⁰ Maholo melu oꞌoꞌo ue peꞌiꞌomu, melu haataꞌinie oto haꞌatolanga aamiu uuri, “Mala nga iini ko lalawaꞌa huni esu, omu ke suꞌuri nii ngeulaa ana.”

¹¹ Melu ko ere urine, aena aana melu rongoa oto uri ngaeta mo iini eemiu kire tohungei lalawaꞌa ni esu. Kire iiꞌo oto mola na kire kaꞌa da ike nga mei ola, taꞌe kire ko talei lae hailiu mola i matolana mwala huni oho dauhe mola aana mo asunge diana ikire.

¹² Oto aana satana Jisas Kraes Aalaha ikie, melu ko unue oto hunie mwala ngeena uri kire ke iiꞌo oto aana tolahai ola diana, na kire ke asu aꞌailaꞌa talai ngeulaa aada maraada.

¹³ Taꞌe iꞌomu, maeni eesiku maaꞌi, mwaanie omu poo-poosuaꞌa huni esuie mo esunge diana.

¹⁴ Mala uri nga mo iini eemiu kire kaꞌa tola i sulie ike mo wala melu ko uusuꞌi weu huniꞌomu ngeena, nge e lae oto i diana hunie omu ke lee-leesie uri kira tei, na omu ke oopa mwaanire hunie kire ke masa mola i sulie tolahada maraada.

¹⁵ Taꞌe omu ke suꞌuri talei deu aada mala uri mo maelonga iꞌomu. Kei lae oto i diana hunie uri omu ke haꞌapasulire mola, aana ikire mo eesimiu maaꞌi taane ni ngeena.

Mei Wala Ooreta A Pol Hunie Mo Tesalonaeka

¹⁶ No ko eitanaie a Aalaha aana ingeie maraana oto aahuꞌine hanuelamanga uri ke iiꞌo peꞌiꞌomu na ke niie hanuelamanga ingeie huniꞌomu tarau maꞌalana nga taa ke rau loꞌu.

¹⁷ Mei wala ni saediananga huniꞌomu ienini, ineu a Pol ni no ko uusue oto maraaku mala no ko euꞌesuie tarau huni haataꞌinie uri ineu toꞌohuu ni oto no ko uusu-uusu ie.

¹⁸ No ko eitanaie Aalaha ikie a Jisas Kraes uri hahuꞌana manata-diananga ingeie ke iiꞌo peꞌiꞌomu.