2 Pita 3 - Tataroha Diana

A Jisas Kei Ooli Taane Loꞌu Mei

¹ Maeni eesiku maaꞌi, ruana nga uusu-uusu ineu huniꞌomu oto ie. Nou saie uri saemiu e manola mola, oto aana e ro uusu-uusu ineu ienini, no ko haꞌa-aamasitoꞌoꞌomu mola uri hunie omu ke tohungei loꞌo-loꞌongaꞌi diana.

² Saeku uri omu ke aama-aamasitoꞌo aana mo wala nge mo propet maaꞌi kire unuꞌi oto wau i naꞌo, na loꞌu aana haꞌa-uusulinge iꞌemeelu mo hurulaꞌaa i sulie haꞌatolanga Aalaha ikie, a Haꞌa-uuritaka.

³ Oto e tohungei roroꞌa hunie omu ke saenanau diana aana uri maholo hunie walumalau ie kei mango e kaꞌa tewa ike loꞌu, na ngaeta mwala kei mwesi mwaaniꞌomu. Kire sai lae mola peꞌi haꞌa-eero aana walu ola diana,

⁴ na kire kei unue uuri, “?A Jisas oto i tei? ?Mwane nge e unue uri kei ooli loꞌu mei, ingeie oto i tei? Mo naꞌohai mwane iꞌomu weu i naꞌo ngeena, kire mani mae oto, taꞌe ahutana walu ola ngeena kire mani sada mola mala maholo a God e haꞌaholaa walumalau.”

⁵ Taꞌe mwala nge kire ko ere urine ngeena, nga taꞌa-taꞌa mei ola kire kaꞌa sare aamasitoꞌo aana. Kire sare pulongosie mola uri wau i naꞌo, a God e unue mola mei wala, na salo na aano huu e maau oto. A God e haꞌaholaa aano huu hunie ke maau i matolana mo wei, na mo wei kire ke iiꞌo mola ahuie aano huu.

⁶ Na aana wai loꞌu mola, nge a God e waelie walumalau wau i naꞌo, aana e da hunie wai aana lue-lue ke hane i lengi na ke aaluhie aano huu.

⁷ Oto aana taꞌa-taꞌa mei wala a God noꞌone mola, nge salo na aano huu kire iiꞌo siꞌiri, na nanamanga aana walana mola nge ko hele aadarue loosie Dinge Ni Leinge. Aana maholona dunge kei lae mai huni weru suuheꞌinie walumalau na ahutana mo iinoni nge kire kaꞌa manataꞌinie ike a God.

⁸ Oto iꞌomu, maeni eesiku maaꞌi, taꞌa-taꞌa mei ola mola omu ke aamasitoꞌo aana loꞌu. Omu ke saie uri Aalaha ikie e kaꞌa loꞌongaꞌinie ike uri taꞌa-taꞌa hai dinge nga maholo oꞌoruꞌe, wa uri sinolai helisi nga maholo tewa. !Haꞌike! Taꞌe kire tewa sada mola i maana.

⁹ Ngaeta mwala kire ko loꞌo-loꞌongaꞌinie uri Aalaha ikie ko tohungei haꞌahiru huni haꞌa-oaie mo heiholotaꞌinge ingeie i sulie oolinge mai ingeie. Taꞌe kire kaꞌa lio saie ike loꞌongaꞌinge ingeie, aana a God ko maaꞌoohi mola hunie mwala kire ke oonisae na kire ke aaliꞌu loꞌu i saana mwaanie kire aiꞌaa aana leilada kei lae.

¹⁰ Taꞌe hai dinge Aalaha ikie kei ooli loꞌu mei, hai dinge ngeena kei lae mai mola mala iinoni peli-peli aana kie saꞌa manataꞌinie ike maholo kei lae mai wa kie ke loꞌongaꞌinie. Na aana hai dingena, painehaꞌana kou-kouhaꞌa oto paine kei reu uure mai taꞌau i Lengi na salo kei eiꞌaa oto. Na dunge oto paine kei ngaa oto ahutana walu ola taꞌau i salo hule aana kire kei meni aaela mango oto. Na walumalau ngeena oto peꞌie walu ola aana, kire kei meni eiꞌaa oto.

¹¹ Oto aena aana ahutana walu ola kei meni aaela mango oto urine, omu ke lio-lio diana aana mau-meuringe iꞌomu. Omu ke iiꞌo maaꞌi na omu ke lae peꞌi iiꞌo oodotaꞌi mola i sulie saena God.

¹² Na maholo omu ko lae peꞌi maaꞌoohie hai dinge paine a God ngeena, omu ke asu waaꞌiniꞌini hunie hai dingena ke hule lau-leu. Aana hai dinge ngeena, dunge kei ngaa salo lai hule aana kei aano talihu oto, na walu ola aana haꞌaholanga dunge kei madorohiꞌi hule aana kire kei aahe mango.

¹³ Taꞌe a God e haiholotaꞌi oto hunikie uri kei esuie loꞌu aano huu haalu peꞌie salo haalu naka, na aana walumalau haalu ngeena, taꞌe ikie mo iinoni oodotaꞌi haꞌalaa kie kei iiꞌo i leune.

¹⁴ Maeni eesiku maaꞌi, aena aana omu ko iiꞌo peꞌi maaꞌoohilana mone walu ola urine kei reu, nge omu ke tohungei esu waaꞌiniꞌini hunie omu ke toꞌo aana hanuelamanga toꞌohuu peꞌie a God. Mau-meuringe iꞌomu ke diana, na omu ke iiꞌo oodotaꞌi oto i maana.

¹⁵ Aalaha ikie ko niie maholo huniꞌomu ni ngeena, kaꞌu e kaꞌa lae-lae ue mai lau-leu. Oto omu ke toꞌo maaie mala uri nga maholo oto hunie haꞌa-uurilemiu kei lae ni ngeena. Taꞌa-taꞌa mei neꞌisaenga urine a God e niie noꞌone hunie aasikaelu maaꞌi a Pol, mala e uusue kaꞌu taꞌa-taꞌa taungei erenga ngeena noꞌone huniꞌomu.

¹⁶ Na i laona ahutana mo uusu-uusu ingeie e ere urine oto tarau maholo e uusu-uusu i sulie mei ola ngeena. I laona mo uusu-uusu a Pol ngeena, ngaeta mo wala kire kaꞌa tohungei matapwa diana ike huni rongo saiꞌi. Na ngaeta mwala nge kire kaꞌa saenanau na loꞌongaꞌinge ikire kaꞌa oodo, kire ko lae peꞌi oolisie mola loꞌongaꞌinge aana mo wala ngeena na kire ko lae huꞌisiꞌi oto. Na kire ko lae peꞌi teꞌurine noꞌone mola aana taꞌena nga mo wala i laona mo Uusu-uusu Maaꞌi i naꞌo. Taꞌe aana tolahai ola urine, kire ko si tohungei da oto haꞌamotaahinge ikire maraada kei aaela oto liutaa ni ngeena.

¹⁷ Taꞌe iꞌomu, maeni eesiku maaꞌi, omu saie oto mo wala ngeena. Oto omu ke lio talamiu maraamiu, mwaanie omu lae takalo i sulie mo haꞌa-uusulinge mo iinoni tataꞌala. Nou sereꞌinie omu ke domu mwaanie leu diana omu uure puu oto aana karaꞌinie a God.

¹⁸ Taꞌe omu ke pai-peine taraꞌasi mola i lalo aana manata-diananga na sai-olanga hunie Aalaha ikie na a Haꞌa-uuritaka, a Jisas Kraes. Nge manikuluꞌanga ingeie e saꞌa mango oto ooꞌoo. Ke urine oto.