2 Pita 1 - Tataroha Diana

Mei Wala Ni Saediananga

¹ Saediananga mwaanieu a Saemon Pita, koni-konihe na hurulaꞌaa a Jisas Kraes, huniꞌomu mo iini nge omu hiiwalaimoli noꞌone aana a Jisas Kraes mala iꞌemeelu. Ingeie oto a God na a Haꞌa-uuritaka, na aena aana e tohungei oodotaꞌi na ko sare dau diana mola hunie ahutaka, nge hiiwalaimolinge e niie mai huniꞌomu ngeena e sada mola peꞌie hiiwalaimolinge iꞌemeelu mo hurulaꞌaa.

² No ko eitanaie a God uri hahuꞌana manata-diananga na hanuelamanga ingeie ke iiꞌo peꞌiꞌomu maholo omu ko pei-peine i lalo aana sai-olanga a God na Aalaha ikie a Jisas.

Kie Helesie Oto Walu Ola E Adona Iiꞌonga Oodotaꞌi

³ A God e niie taꞌe-taꞌena nga ola e ado hunikie hunie kie ke malisine iiꞌonga oodotaꞌi oto mala e saetoꞌo aana. Nanamanga a God e da ahutana walu ola ngeena hunikie aana e soikie mai i saana hunie kie ke tohungei sai diana aana, na hunie kie ke toꞌo aana noꞌone manikuluhaꞌana na mauringe diana ingeie.

⁴ Oto aena urine, e niie oto mo tohungei niinge paine e lae oto i diana nge e haiholotaꞌiniꞌi hunikie. Na aena aana mo olana mone, kie ko si toꞌo aana nanamanga huni tehisie taꞌena nga tolahai ola aaela aana walumalau, na kie sai lado oto peꞌie a God hunie kie ke toꞌo aana maurihe diana peꞌie.

⁵ Oto i tehulaꞌana walu ola a God e asuiꞌi huniꞌomu ngeena, iꞌomu noꞌone omu ke ariꞌapasie omu ke hele diana aana ahutana mo ola ienini. Omu ke hele maꞌutaꞌa oto aana hiiwalaimolinge iꞌomu, na omu ke sapeie loꞌu iiꞌonga oodotaꞌi, na omu ke sapeie loꞌu saenanaunge diana,

⁶ na omu ke sapeie loꞌu kinetaꞌinge aana tolahamiu, na omu ke sapeie loꞌu mei tolahai esunge taraꞌasi aani hiiwalaimolinge, na omu ke sapeie loꞌu iiꞌonga maaꞌi,

⁷ na omu ke sapeie loꞌu manata-diananga hunie mo eesimiu aana hiiwalaimolinge, na omu ke heꞌi sapeie loꞌu noꞌone manata-diananga hunie ahutana mo iinoni.

⁸ Mala uri mo tolahai ola diana urine ke pai-peine i lalo aana mau-meuringe iꞌomu, nge omu ke si lae diana eena. Na omu sai eehu eeni hue-huei ola diana i lalo aana mau-meuringe iꞌomu aana omu manataꞌinie oto a Jisas Kraes Aalaha ikie.

⁹ Taꞌe mala uri nga iini nge e kaꞌa toꞌo aana ike mo tolahai ola ngeena i lalo aana mau-meuringe ingeie, iinoni ngeena e urihana mola iinoni e kaꞌa sai lio kohi ike, wa maana e ulu toꞌohuu. E pulongosie oto uri a God ni e hoda rereꞌa aana mwaanie mo oorahaꞌaanga ingeie i naꞌo.

¹⁰ Oto e lae otoi diana, maeni eesiku maaꞌi, uri hunie omu ke asu aꞌailaꞌa loꞌu hunie omu ke haataꞌinie uri a God e tohungei lio hilisiꞌomu oto nana maraana. Omu ke haataꞌinie uri e soiꞌomu mei i saana toꞌohuu aana mo tolahai ola diana aana mau-meuringe iꞌomu. Na mala uri omu kei esu urine, omu saꞌa heꞌi lae takalo loꞌu mwaanie tala oodo, wa omu ke tataro aana laenga i sulie.

¹¹ Oto a God ke si tohungei tola koniꞌomu oto taꞌau i Lengi aana walumalau haalu nge e saꞌa mango loꞌu. Walumalau ngeena, a Jisas Kraes Aalaha ikie na a Haꞌa-uuritaka, nge e aalaha haahie.

¹² Nou saie uri omu saenanau taane oto aana walu ola ngeena, na omu ko uure maꞌutaꞌa noꞌone peꞌie mo wala toꞌohuu nge haꞌa-uusulilemiu e lae aani. Taꞌe maꞌalana ke urine, ne kei lae peꞌi haꞌa-haꞌa-aamasitoꞌoꞌomu loꞌu eeni suli maholo.

¹³ Aana no ko loꞌongaꞌi uri e lae oto i diana hunie ne ke haꞌa-haꞌa-aamasitoꞌoꞌomu aana walu ola ngeena maholo no ko meu-meuri ue, mwaanie omu pulongosiꞌi mola.

¹⁴ A Jisas Kraes Aalaha ikie e haataꞌinie oto hunieu uri pongiku mai aano i leu e kaꞌa tewa oto.

¹⁵ Oto ne kei eriꞌapasie uri omu ke suꞌuri pulongosie walu ola ngeena i puriku aana ne kei mae mwaaniꞌomu.

Mo Hurulaꞌaa Kire Tarohaꞌinie Mola Tataroha Toꞌohuu

¹⁶ Maholo iꞌemeelu mo hurulaꞌaa melu haꞌarongoꞌomu aana uri a Jisas Kraes Aalaha ikie kei ooli loꞌu mei peꞌie nanamanga paine, melu kaꞌa talei ere ike mola i sulie mo laladonga taꞌewau. !Haꞌike! Melu leesie oto aana maameelu uri a Kraes e toꞌo aana painehaꞌana nanamanga a God.

¹⁷ A God Mamaꞌa e tohungei haꞌapainaꞌaa satana Kraes, aana walana Iini E Paine Liutaa e soi haꞌamanikuluꞌaa a Kraes aana e teꞌuri, “A kaleku ni oto ienini, iini nou tohungei saetoꞌo aana oto liutaa.”

¹⁸ Iꞌemeelu maraameelu oto, melu rongoa mei wala ngeena e lae mai uure taꞌau i Lengi maholo melu iiꞌo peꞌie a Jisas taꞌau i lengine toloi henue maaꞌi.

¹⁹ Aena mo olana, nge melu si tohungei hiiwalaimoli oto liutaa aana nga moi taa nge mo propet kire unu-unuꞌi. Oto kei tohungei diana loꞌu liutaa uri hunie iꞌomu noꞌone omu ke pwaarongo i sulie mo ere-erenga mo propet, aena aana mo ere-erenga ngeena domana oto nga raa-raa ko raangie lehu e tohungei rodohono. Oto omu ke pwaarongo i sulie mo ere-erenga ikire ngeena lae hule i waꞌalie aana hai dinge a Kraes kei hule loꞌu na rarangana ke si raangie saemiu.

²⁰ Na e tohungei roroꞌa oto liutaa hunie omu ke lio saie uri nga taꞌa-taꞌa mei wala nge mo propet kire uusue i laona Uusu-uusu Maaꞌi, e kaꞌa uusue ike i sulie nga mei neꞌisaenga ingeie mola maraana.

²¹ Aana mo propet ngeena, kire kaꞌa unue ike nga taꞌa-taꞌa mei wala tohude, taꞌe a Liꞌoa Maaꞌi nge ko da kire ko unu tahangaꞌinie neꞌisaenga a God.