2 Korinit 8 - Tataroha Diana

Kie Ke Peꞌie Kira Siꞌohaꞌa Aani Niinge

¹ Oto ienini, maeni eesiku maaꞌi, melu ko sare haꞌarongoꞌomu aana haꞌadianaꞌanga a God hunie mo iini kire hiiwalaimoli aana a Jisas oto mai aana poꞌo ni henue i Masedonia. Aana manata-diananga ingeie e paine hunire mone, a God e tohungei haꞌadianaꞌara aana mei ola diana.

² Oohongilada e lae kaꞌu aana mo aasanga oto paine e hite aada, na kire maitale oto hiitoꞌo. Taꞌe maꞌalana e urine, ilenimwaꞌenga ikire e paine oto liutaa hule aana kire ko sare nii huni peꞌie ngaeta mwala.

³ Ineu maraaku nou sai ere haꞌawalaimoliꞌaa uri kire kaꞌa nii ike mola hule aana leu e malisine kire ke niie, taꞌe kire tohungei liue oto leune, aana niinge ikire e paine loꞌu liutaa aana nga taa taꞌena nga iini ke loꞌongaꞌinie kire sai niie. Na kire asuie oto urine mola i sulie hari-huninge ikire maraada.

⁴ Ikire maraada nge kire lae peꞌi eitanaiꞌemeelu uri hunie melu ke toliꞌaasie hunire uri ikire noꞌone kire ke peꞌie mo iinoni a God taꞌau i Jerusalem.

⁵ Na niinge ikire ngeena, e lae liutaa aana loꞌu nga taa melu loꞌo-loꞌongaꞌinie, aana kire tohungei deu i sulie saena God aana kire holaꞌi toliꞌaasire maraada huni tola i sulie walana a Aalaha, oto loꞌu kire heꞌi toliꞌaasire maraada huni tola i sulie walameelu.

⁶ Oto aena aana a Taetas e da omu aehotaa tolahai niinge, nge melu eitanaie hunie ke ooli loꞌu i seemiu huni ere haꞌasusuꞌomu hunie omu ke haꞌamangoa mo niinge iꞌomu.

⁷ Iꞌomu, omu ko hele diana aana oto ahutana tolahai ola diana. Hiiwalaimolinge iꞌomu e susu oto, na omu tohungei saenanau i sulie tolahana a Jisas, na omu sai haꞌa-uusuli aana mo ola urine. Oto tarau omu mwaꞌe-mwaꞌe huni peꞌi-peꞌie mo iinoni, na manata-diananga iꞌomu huniꞌemeelu e paine. Oto melu saetoꞌo aana uri omu ke aꞌailaꞌa noꞌone aana tolaha ni niinge peꞌie manata-diananga.

⁸ Maholo no ko ere urine, nou kaꞌa neꞌie ike nga haꞌatolanga huniꞌomu. Taꞌe no ko ere urine mola aana nou leesie uri ngaeta mo soihaadaꞌinge kire ko tohungei mwaꞌe-mwaꞌe huni peꞌi-peꞌi, na mala uri omu ke peꞌi-peꞌi noꞌone urine, nge e haataꞌinie uri manata-diananga iꞌomu nga ola toꞌohuu taane.

⁹ Aana saeku hunie omu ke haimaanie hahuꞌana manata-diananga Aalaha ikie a Jisas Kraes. Omu saie mola uri e tohungei toꞌo-toꞌo kaꞌu oto taꞌau i Lengi, taꞌe e si lae mai neꞌi iinoni meitale mola i tehulaꞌamiu, uri hunie omu ke neꞌi iinoni toꞌo-toꞌo i tehulaꞌana maitalenga ingeie ngeena.

¹⁰ Oto loꞌongaꞌinge ineu uri e lae oto i diana hunie omu ke haꞌamangoa oto nga taa nge omu aehotaa aana halisi e mango haona. Aana iꞌomu oto eetana nga mwala huni loꞌongaꞌinie leune, na iꞌomu oto noꞌone nge omu holaꞌi aehotaa niinge.

¹¹ Aena urine, omu ke haꞌamangoa oto mei esunge diana omu aehotaa ngeena. Mei mwaꞌe-mwaꞌenga nge omu aehotaa asunge ngeena aana, nge omu ke lae taraꞌasi oto peꞌie hule aana haꞌamangolana. Na omu ke nii oto mola mwaanie nga taa nge omu toꞌo aana.

¹² Mala uri omu ko mwaꞌe-mwaꞌe toꞌohuu huni niie nga mei ola, nge a God kei tohungei ilenimwaꞌe haahie leune. Na mwaanie omu tolahiꞌe mala uri niinge e kaꞌa paine ike, aana e kaꞌa unue ike uri kie ke niie mo ola kie kaꞌa toꞌo aani ike.

¹³ Nou kaꞌa sare da ike nga mei hiꞌelaa huniꞌomu na uri hunie ngaeta mwala kire ke tola mwa-mwate, taꞌe saeku uri ahutana mwala kire ke mani tola sada.

¹⁴ Oto maholo omu toꞌo aana mo ola hunge mala ngeena, e tohungei diana oto liutaa uri hunie omu ke peꞌie mo iini nge kire kaꞌa toꞌo aana ike nga mei ola. Hunie loꞌu mei i puri, mala uri omu kaꞌa toꞌo aana nga taa e adongamiu na uri kire toꞌo aana nga mo ola hunge, nge kire sai peꞌiꞌomu noꞌone urine. Oto urine omu kei meni tola sada eena.

¹⁵ Oto aana peꞌinge huniꞌomu heiliu urine, mei wala nge uusulana e lae i laona mo Uusu-uusu Maaꞌi kei toꞌohuu noꞌone huniꞌomu, aana uusulana e lae uuri, Iini nge e soꞌokonie mo ola hunge, e kaꞌa loohaꞌinie loꞌu nga mei ola, na iini e soꞌokonie mo kele ola mwai-mwei mola, taꞌe e adona taane mola. Eksodas 16:18

Mo Mwane Diana Ke Lio I Sulie Mo Niinge

¹⁶ Melu ko paalahea God oto liutaa haahie e niie mei neꞌisaenga ngeena hunie a Taetas huni peꞌilemiu oto mala iꞌemeelu noꞌone, melu ko peꞌiꞌomu.

¹⁷ Aana e kaꞌa mwaꞌe-mwaꞌe ike mola aana uri melu haaraie, taꞌe aena aana e tohungei sare peꞌiꞌomu oto noꞌone, na ingeie oto maraana nge e loꞌongaꞌinie uri ke lai hule oto hao i seemiu.

¹⁸ Na melu ko uusungeꞌinie ngaeta aasikaelu loꞌu oto noꞌone hao peꞌie a Taetas. Ahutana mwala aana ahutana mo soihaadaꞌinge hailiu kire haꞌamaꞌu aana aasikaelu ienini haahie asunge ingeie aani tarohaꞌinilana Tataroha Diana.

¹⁹ Na loꞌu sapeitana leune, mo soihaadaꞌinge kire lio hilisie a porona huni lae peꞌiꞌemeelu aana melu ko toolea niinge ni saediananga ngeena hunire kira hiiwalaimoli i Jerusalem. Melu ko toolea niinge ngeena huni haꞌamanikuluꞌaa Aalaha ikie, na huni haataꞌinie uri kie neꞌisae mouteꞌi toꞌohuu huni peꞌie kira hiiwalaimoli.

²⁰ Na maholo melu ko toolea niinge ngeena, melu ko tohungei hei kinetaꞌi mwaanie uri nga mo iini e upwesiꞌemeelu haahie lio i sulilana toꞌoha oto paine nge niilana e lae ienini.

²¹ Aana saemeelu uri hunie melu ke asuie hunie ke oodo i maana Aalaha ikie, na noꞌone i maana mo iinoni.

²² Na melu ko uusungeꞌinie ngaeta aasikaelu loꞌu noꞌone hao peꞌirerue. Aana mo maholo oto hunge oolune nga aasikaelu ienini e haataꞌinie huniꞌemeelu uri e mwaꞌe-mwaꞌe toꞌohuu huni peꞌi-peꞌi aana taꞌena nga ola. Na oto ienini ko si mwaꞌe-mwaꞌe loꞌu liutaa huni peꞌi, aena aana e norutoꞌo oto aamiu uri iꞌomu noꞌone omu ke nii-nii peꞌi saediananga.

²³ Omu saie mola uri a Taetas, ingeie a oaku ni ngeena na ko esu tararuru peꞌieu hunie peꞌilemiu. Na ngaeta ro aasikaelu nge kirerue ko lae-lae peꞌie, ikirerue oto e ro hurulaꞌaa mo soihaadaꞌinge ni ngeena, na asunge ikirerue ko haꞌamanikuluꞌaa satana Kraes.

²⁴ Oto aena urinena, omu ke tohungei haataꞌinie oto manata-diananga iꞌomu aana e oolu mwane ngeena, hunie mo soihaadaꞌinge mai leu kire ke rongoa oto tolahamiu, na hunie kire ke saie oto uri e tohungei melisine oto melu ke toohaꞌiniꞌomu mala melu ko esuie ienini.