2 Korinit 2 - Tataroha Diana

¹ Maholo nou oꞌoꞌo kaꞌu peꞌiꞌomu oto i naꞌo, nou ere aamiu hiitoꞌo na nou da omu hii aaela. Oto aena leune nou heꞌi loꞌongaꞌinie loꞌu uri nou saꞌa ooli ike loꞌu hao i seemiu lau-leu, mwaanie omu hii aaela loꞌu mola.

² ?Aana uri ne kei da omu ke hii aaela, haꞌalaa a tei loꞌu nge ke si da ne ke ilenimwaꞌe? Aena aana iꞌomu mola nge omu sai da hunie uri ne ke ilenimwaꞌe. ?Taꞌe omu sai deu urine loꞌu uri taa na hule aana iꞌomu na omu ko saehuu noꞌone mola? !E aasa!

³ Ineu nou kaꞌa ere ike mola i sulie ilenimwaꞌenga ineu maraaku, taꞌe ilenimwaꞌenga ineu e uure mola aana ilenimwaꞌenga iꞌomu, aana kolu sai ilenimwaꞌe mola tararuru. Aena urinena, nge nou holaꞌi uusu-uusu mola hao huni ere aamiu haahie mo ola omu deu aaelasiꞌi, hunie uri maholo ne kei hule loꞌu hao i seemiu, na mo ola ngeena kire oodo oto. Iau, nou esuie mola urine mwaanie uri mo iini hunie omu ke da ne ke ilenimwaꞌe, omu si da loꞌu mola ne ke saehuu.

⁴ Maholo nou uusue eetana nga uusu-uusu ngeena, saeku e tohungei makaka oto, na nou uusu-uusu oto mola peꞌie saehuunge na peꞌie ngaranga. Ineu nou tohungei saehuu haahie nga taa nou uusue kaꞌu huniꞌomu, taꞌe nou kaꞌa ere aamiu ike urine hunie omu ke saehuu loꞌu, taꞌe saeku hunie omu ke lio saie uri nou manata diana oto liutaa hunie ahutemiu mango.

Mo Korinit Ke Saeꞌaasi Hunie Mwane E Oonisae Mwaanie Aaelanga E Asuie Kaꞌu

⁵ Nou sereꞌi ere hiitoꞌo huniꞌomu haahie nga taa nge ngaeta mwane aamiu e dau aaelasie ngeena. Taꞌe mei roroꞌanga oto paine ni ngeena, na e kaꞌa asuie ike mola saehuunge hunieu, taꞌe oto liutaa, e da hunie ahutemiu mango.

⁶ Oto mo iini hunge aamiu, omu leie a mwaena na omu haꞌaloie oto. Na haꞌaloinge omu esuie ngeena e ado oto.

⁷ Oto ienini e malisine uri omu ke saeꞌaasi oto hunie, na omu ke ere haꞌasusue hunie ke hii diana loꞌu. A mwaena e saehuu oto, na mwaanie uri e tohungei saehuu loꞌu hiitoꞌo na saehuunge paine ingeie e waelie oto taꞌingelu.

⁸ Aena ngeena no ko eitanaiꞌomu uri omu ke peꞌie a mwaena hunie uri ke saie oto uri omu manata diana hunie toꞌohuu.

⁹ Maholo nou uusue uusu-uusu ngeena huniꞌomu oto i naꞌo, nou kaꞌa loꞌongaꞌinie mola haꞌa-oodohilana a mwaena, taꞌe nou sare manataꞌinie noꞌone uri ohe omu kei mwaꞌe-mwaꞌe taane huni tola i sulie walu ola no ko unu-unuꞌi huniꞌomu, wa haꞌike.

¹⁰ Oto ie aana nou leesie uri omu sai tola i sulie walaku toꞌohuu, oto mala uri omu ko saeꞌaasie nga mei aaelanga nga iini e dau huꞌisiꞌomu aana, nge ineu e urine noꞌone. Na mala iinonine e dau huꞌisie noꞌone mei olana hunieu, nge ineu noꞌone ne ke saeꞌaasie mei olana hunie. A Kraes e saie oto uri no ko deu-deu urine, aana saeku mola hunie ne ke peꞌiꞌomu.

¹¹ Na aena aana saeꞌaasinge hailiu urine, nge a Pwelu Eero-eero e saꞌa roroꞌa tari mwadaꞌu ike aakaelu huni waelikolu, aena aana kolu saie oto mo loꞌongaꞌinge aaela ingeie.

A Pol E Lae Mwaanie Asunge Diana I Troas Aana Ko Tolahiꞌe I Sulie Mo Korinit

¹² Maholo nou hule wau aana huilume i Troas huni laeliwala aana Tataroha Diana i sulie a Kraes, nou deu oodoie uri a Aalaha e tahanie oto maa talana asunge ngeena hunie ke lae diana i leune.

¹³ Taꞌe nou tohungei tolahiꞌe mola aena aana nou kaꞌa rongoa ike nga mei wala i suliꞌomu aana nou kaꞌa oodoie ike aasikaelu a Taetas hunie ke haꞌarongoau. Oto nou ere ni saediananga mola peꞌie mwala i leune, nge nou si toliꞌaasire, na nou aatoholo mai hunie poꞌo ni henue i Masedonia aana nou heitalea nga mei wala diana i suliꞌomu.

A Pol Ko Esu Mala Koni-konihe Hunie Uri Mwala Hunge Ke Tola I Sulie Haiholotaꞌinge Haalu A God

¹⁴ Oto no ko paalahea God oto liutaa, aana a Kraes e aꞌailaꞌasie oohotaa, na oto ie melu lado oto peꞌie a Kraes na melu ko lae-lae oto i sulie mala mo koni-konihe ingeie. A God e asu i lalo aameelu hunie tataroha i sulie a Kraes ke lai hule oto aana ahutana mo henue, mala wasuhaꞌana dango wau-wesu nge e tohungei wesu mangoni oto hiitoꞌo e sai hule aana taꞌena nga leu i laona nume.

¹⁵ Na melu urihana dango wau-wesu i maana God, aana a God ko ilenimwaꞌe haahie asunge melu ko euꞌesuie aana tarohaꞌinilana a Kraes hunie ahutana mo iinoni, mo iini nge haꞌa-uurilada kei lae, na loꞌu mo iini nge kire kei eiꞌaa mwaanie a God.

¹⁶ Hunie mo iini nge a God ko haꞌa-uurire, tataroha ngeena e tohungei rongo diana hunire, aana ko naꞌoda hunie maurihe, na kire ko ilenimwaꞌe haahie mala mwala nge ko nonowasune dango wau-wesu. Taꞌe mo iini nge kire kei eiꞌaa mwaanie a God, kire kei sereꞌi rongoa tataroha ngeena, aana ko da kire ko loꞌongaꞌi mola i sulie leinge na maenga, mala mo iini nge kire ko nonowasune kasuhaꞌana rae. Mei esunge aana tarohaꞌinilana a Kraes urine hunie mwala e tohungei aasa. ?Oto a tei keꞌu ke si melisine asunge ngeena?

¹⁷ Mo iini oto hunge ko lupweꞌi tarohaꞌinie walana God, taꞌe kire kaꞌa asu toꞌohuu ike, aena aana saeda mola hunie kire ke tari toꞌoha aana. Taꞌe iꞌemeelu, melu aaopa oto mwaanire aana melu ko tarohaꞌinie walana God aani sae manola peꞌie nanamanga a Kraes. Na melu saie uri a God nge e uusungeꞌiniꞌemeelu mala mo koni-konihe ingeie, na ko toꞌo-toꞌomaaie taane nga taa melu ko euꞌesuie.