2 Korinit 1 - Tataroha Diana

Mei Wala Ni Saediananga

¹ Saediananga mwaanieu a Pol, iini nge a God maraana e lio hilisieu uri hunie ne ke neꞌi hurulaꞌaa nana a Jisas Kraes. Iꞌemereꞌi aasikaelu a Timoti, nge ni mere ko uusu-uusu hao huniꞌomu mwala aana soihaadaꞌinge a God hao i Korinit, na noꞌone hunie ahutana mo iinoni maaꞌi a God aana taꞌena nga leu hao i laona poꞌo ni henue iꞌomu i Akaea.

² Mere ko eitanaie a God Aamaka na a Jisas Kraes Aalaha ikie, uri kire ke haataꞌinie hahuꞌana manata-diananga huniꞌomu, na uri kire ke niie hanuelamanga huniꞌomu.

A God Ko Haꞌadodoa Saeka Hunie Kie Ke Haꞌadodoa Saena Mo Iini Kire Ko Lae Oodoie Aasanga

³ Kie ke mani paalahea God, Aamana Jisas Kraes Aalaha ikie, aana a Mamaꞌa oto aahuꞌine aamasinge na iini ni haꞌadodoa saeka mo iinoni.

⁴ Ingeie oto ko haꞌadodoa saemeelu i suli maholo melu ko lae oodoie mo aasanga, uri hunie iꞌemeelu noꞌone melu ke haꞌadodoa saena mo iini kire ko lae oodoie noꞌone mo aasanga, na melu ke asu urine aana taꞌa-taꞌa mei peꞌinge nge a God e haꞌadodoa saemeelu aana.

⁵ Iꞌemeelu, melu ko sapesalu oto hiitoꞌo i tehulaꞌana melu ko lulu i sulie a Kraes, taꞌe maholo ko lae urine, nge a God ko si haꞌadodoa saemeelu oto hiitoꞌo i tehulaꞌana a Kraes.

⁶ Oto maholo melu ko sapesalu, nge sapesalunge ngeena ko heꞌi peꞌiꞌomu loꞌu hunie omu ke hele aana maurihe huu. E toꞌohuu oto, i sulie a God ko haꞌadodoa saemeelu hunie iꞌemeelu noꞌone melu ke haꞌadodoa loꞌu saemiu. Oto urine omu ke uure aꞌailaꞌa taraꞌasi mola maholo omu ko sapesalu loꞌu mala iꞌemeelu ienini.

⁷ Oto melu hiiwalaimoli toꞌohuu uri omu sai uure maꞌutaꞌa taane, aena aana melu saie mola uri omu ko sapesalu noꞌone mola aana taꞌa-taꞌa taungei ola nge melu ko sapesalu aana, na a God ko haꞌadodoa loꞌu saemiu noꞌone mala ko haꞌadodoa saemeelu ie.

⁸ Maeni eesiku maaꞌi, melu saetoꞌo aana uri omu ke sai diana aana mei siꞌohaꞌanga nge e hite kaꞌu aameelu weu aana poꞌo ni henue i Esia uri e hiꞌeiꞌemeelu oto liutaa, na e tohungei aasa oto hiitoꞌo huniꞌemeelu hule aana melu loꞌo-loꞌongaꞌinie oto uri melu ke maesie mola.

⁹ Na melu saie uri melu ke tohungei mae toꞌohuu oto. Taꞌe leune e rau urine, uri hunie melu ke suꞌuri norutoꞌo mola aameelu maraameelu, taꞌe hunie melu ke norutoꞌo mola aana God, iini e sai taꞌea mo iini e mae oto.

¹⁰ Na maholo melu karaꞌi mae ngeena, a God e haꞌa-uuriꞌemeelu oto toꞌohuu, na kei haro haꞌa-uuriꞌemeelu taane ue. Melu maaꞌoohi susutoꞌo peꞌie hiiwalaimolinge aana uri kei haro haꞌa-uuriꞌemeelu taane mola ue.

¹¹ Na omu sai peꞌiꞌemeelu noꞌone aani aarengaꞌinge talameelu. Urine mwala oto hunge ke si paalahea a God, aena aana kire kei meni leesie uri a God e sai rongo hunie aarengaꞌinge mo iini hunge na e sai haꞌadianaꞌaꞌemeelu i tehulaꞌana mo aarengaꞌinge ikire ngeena.

Neꞌisaenga A Pol E Oodo Mola Maholo E Oolisie Laenga Ingeie

¹² Maeni eesiku, manataku e taha mola aana nou saie uri melu kaꞌa eeroa ike nga iini aana nga maholo, taꞌe melu ko lulu i sulie mola oodo-oodonga nge a God e saetoꞌo aana. Walu ola melu ko euꞌesuiꞌi e uure mola aana hahuꞌana manata-diananga a God, na melu kaꞌa asuie ike nga mei ola i sulie saenanaunge ni iinoni. Tolahameelu e diana oto urine tarau peꞌie ahutana mo iinoni, na oto liutaa maholo melu oꞌoꞌo peꞌiꞌomu.

^13-14 Mo ola melu ko uusu-uusuꞌi huniꞌomu, mo ola omu sai saenanau eeni taane, na mwaanie omu heitalea loꞌu nga neꞌisaenga e aasa wa e iiꞌo mumuni i laona uusu-uusu ienini. !Haꞌike! Taꞌe omu ke saa-saaie mola mo uusu-uusu ineu, na maꞌalana uri omu kaꞌa sai diana aameelu ue, taꞌe melu loꞌongaꞌinie uri omu kei sai diana aameelu taane. Oto aana maholo Aalaha ikie a Jisas kei ooli mei, nge omu ke si toohaꞌiniꞌomu haahie omu lado peꞌiꞌemeelu, mala iꞌemeelu noꞌone melu ko toohaꞌiniꞌemeelu aena aana melu lado peꞌiꞌomu.

¹⁵ Oto aena aana nou tohungei hiiwalaimoli uri omu ko saediana hunieu urine, nge nou loꞌongaꞌinie kaꞌu uri ne ke holaꞌi lae oto hao i leesiꞌomu, hunie uri ne ke leesiꞌomu aana e ro maholo na urine nge omu kei ilenimwaꞌe haꞌarue.

¹⁶ Oto nou oalaꞌi keꞌu huni lae hao i leesiꞌomu aana maholo nou neꞌisae huni lae mai hunie poꞌo ni henue i Masedonia, na uri ne ke si leesiꞌomu loꞌu aana maholo ne kei uure mwaanie i leu, aana ne ke lae loꞌu hunie i Jiudia. Urine nou loꞌongaꞌi uri omu ke si peꞌieu aana laenga ngeena.

¹⁷ Saꞌa mola omu ko loꞌo-loꞌongaꞌinie uri no ko eero wa no ko ere-ere mwaakule mola, aena aana nou kaꞌa lae ike i sulie oalaꞌinge ineu ngeena. !Taꞌe haꞌike! Ineu, nou kaꞌa asuie ike mo oalaꞌinge mala mo iinoni ni welumalau ko euꞌesuiꞌi. Ineu nou kaꞌa sai unue ike, “Iau, ne kei teꞌurine” maholo no ko loꞌongaꞌinie, “Haꞌike, nou saꞌa teꞌurine ike.”

¹⁸ Maholo no ko unue, “Iau,” no ko neꞌisae oto toꞌohuu huni esuie urine, na nou saꞌa talei unue mola “Haꞌike” mai puri. Mala a God ko ere-ere toꞌohuu oto tarau, ineu noꞌone no ko ere toꞌohuu,

¹⁹ aena aana no ko lulu i sulie tolahana a Jisas Kraes. Ingeie oto Kalena God, nge iꞌemeelu a Saelas na a Timoti, melu tarohaꞌinie huniꞌomu, na omu meni saie oto uri ingeie e kaꞌa unue “Iau” hunikie, na ko tolana unue loꞌu “Haꞌike.” Taꞌe i tehulaꞌana a Kraes mone, a God ko unu-unue “Iau” hunikie mo iinoni,

²⁰ aana a Jisas oto ko haꞌa-oaie ahutana mo heiholotaꞌinge a God hunikie mo iinoni. Oto loꞌu mola i tehulaꞌana a Kraes, ikie noꞌone kie sai haꞌamanikuluꞌaa God uuri, “Iau, ke urine oto mala o ko unuena.”

²¹ A God maraana ni ko haꞌamaꞌutaꞌaa hiiwalaimolinge ikie aana a Kraes. Na ingeie maraana noꞌone nge e lio hilisikie,

²² na e niie Liꞌoa Maaꞌi ingeie ke iiꞌo huu oto i lalo aaka mala haꞌa-ara a God. Liꞌoa Maaꞌi ko haataꞌinie uri ikie mo iinoni a God, na ahutana mo heiholotaꞌinge a God kei oa oto hunikie.

²³ Oto ne ke unue oodoiꞌomu aana e ue kaꞌu nou kaꞌa ooli ike mai i seemiu mala nou unue. A God e saie mola manataku, na e saie taane uri nga taa no ko unue e toꞌohuu. Nou kaꞌa lae ike ue hao i Korinit, i sulie nou kaꞌa sare ere aamiu loꞌu na urine kei aasa loꞌu huniꞌomu.

²⁴ Iau, e toꞌohuu oto aana melu ko sare asu loko-loko mola peꞌiꞌomu hunie omu ke ilenimwaꞌe, na melu kaꞌa sare paine ike haahiꞌomu huni deu rarahiꞌomu hunie omu ke hiiwalaimoli, aana melu saie uri omu uure maꞌutaꞌa oto aana hiiwalaimolinge aana God.