2 Jon 1 - Tataroha Diana

Mei Wala Ni Saediananga

¹ Saediananga mwaanieu Rato ni mwane aana soihaadaꞌinge, huniꞌo tohungei keni diana a God peꞌie maeni kalemu. Ineu peꞌie ahutana oto mo iini e manataꞌinie walaimolinge ko manata diana huniꞌomu,

² aena aana walaimolinge a God ko iiꞌo oto i lalo aana ahutaka mango na kei iiꞌo huu oto peꞌikie.

³ Oto hahuꞌana manata-diananga, na aamasinge, na hanuelamanga a God Aamaka na a Kalena a Jisas Kraes, ke lae mai hunie ahutaka nge kie ko iiꞌo aana walaimolinge na manata-diananga.

Mwaanie Kie Peꞌie Mo Haꞌa-uusuli Eero-Eero

⁴ No ko tohungei ilenimwaꞌe oto liutaa aana nou si lio saie uri ngaeta mo iini aana mo kalemu kire ko lulu i sulie tolahai walaimolinge oto mala a Mamaꞌa e unue hunikie aana haꞌatolanga ingeie.

⁵ Mei wala no ko unue huniꞌomu ienini, keni diana ineu, nga mei ola haalu haꞌike, taꞌe mei haꞌatolanga kie rongoa oto i naꞌo uure aana maholo kie holaꞌi hiiwalaimoli aana Jisas, uri kie ke manata diana hunikie hailiu.

⁶ Na taꞌena nga iini ko iiꞌo aana manata-diananga, nge ke iiꞌo peꞌie tola i sulilana nga taa a God e unue. Na uure i aehotalana omu rongoa oto uri e unue uri omu ke mani iiꞌo aani manata-diananga.

⁷ No ko haꞌa-aamasitoꞌoꞌomu mola aana leune, aena aana mo haꞌa-uusuli eero-eero hunge kire lae hailiu oto i laona walumalau. Ikire ngeena kire ko haꞌa-uusuli aana uri a Jisas Kraes e kaꞌa neꞌi iinoni ike. Mo iini urine ikire mwala eero-eero, na ikire mo maelonga a Kraes.

⁸ Oto omu ke lio talamiu mwaanie omu deu tekelaꞌinie tolahai iinoni diana iꞌomu nge melu esu oto hiitoꞌo hunie omu ke toꞌo aana. Taꞌe omu ke lae taraꞌasi peꞌie hunie omu ke hele haꞌamangoa oto waaitemiu.

⁹ Taꞌena nga iini nge e kaꞌa iiꞌo susu aana mo haꞌa-uusulinge a Kraes taꞌe ko sapeie loꞌu mola mo neꞌisaenga ingeie, iini urine, a God e kaꞌa iiꞌo ike i lalo aana. Taꞌe iini nge ko iiꞌo susu peꞌie lulu i sulilana mo haꞌa-uusulinge a Kraes, iini urine, a Mamaꞌa na a Kale kire mani iiꞌo oto i lalo aana.

¹⁰ Mala uri nga haꞌa-uusuli ko hule i seemiu na haꞌa-uusulinge ingeie ko lae aaopa mwaanie haꞌa-uusulinge a Kraes ienini, nge omu ke suꞌuri tola konie i nume iꞌomu, na hule aana omu ke suꞌuri unue loꞌu nga mei wala ni saediananga hunie.

¹¹ Aana omu kei ere ni saediananga peꞌie iini urine, nge omu ko peꞌie asunge aaela ingeie eena.

Mei Wala Ni Saediananga Ooreta

¹² Mo ola hunge taane huni haꞌarongoꞌomu eeni, taꞌe nou kaꞌa sare ere ike aani uusu-uusunge. Taꞌe nou norutoꞌo mola aana uri nga maholo ne kei haro lae wau huni leesiꞌomu na huni ere peꞌiꞌomu maraaku, hunie uri ilenimwaꞌenga ikolu ke paine.

¹³ Mei wala ni saediananga noꞌone huniꞌo mwaanie mo kalena a keni eesimu, tohungei keni diana a God noꞌone mala iꞌoe.