1 Pita 5 - Tataroha Diana

Kie Ke Suꞌuri Toohaꞌinikie, Taꞌe Kie Ke Norutoꞌo Mola Aana Nanamanga A God

¹ Oto no ko sare unue ngaeta mei wala ni haꞌananaunge huniꞌomu mo naꞌohai mwane aana soihaadaꞌinge. Ineu ngaeta naꞌohai mwane aana soihaadaꞌinge noꞌone mala iꞌomu, na hule aana nou sai ere haꞌawalaimoliꞌaa uri Tataroha Diana i sulie a Kraes e toꞌohuu aana ineu maraaku nou leesie kaꞌu sapesalunge a Kraes. Na nou saie uri ineu noꞌone ne kei toꞌo aana manikuluꞌanga a God aana maholo a Kraes kei ooli loꞌu mei.

² Oto no ko sare haꞌananauꞌomu uri omu ke lio i suli diana aana mo iinoni nge a God e neꞌire i laona nimemiu huni lio i suli diana aada mala kakali sipu ko lio i sulie amaa ni sipu ingeie. Oto omu ke lio i suli diana aana soihaadaꞌinge a God oto aani mwaꞌe-mwaꞌenga mala e saetoꞌo aana omu ke asuie. E kaꞌa diana ike uri omu ke asu mola mala omu ko esu uei waaite. !Haꞌike! Omu ke asu oto aena aana omu tohungei mwaꞌe-mwaꞌe toꞌohuu huni peꞌire.

³ Na mwaanie omu haꞌapainaꞌaꞌomu maraamiu mala mo aalaha. Urine e kaꞌa kohi ike, taꞌe e diana oto liutaa uri omu ke haataꞌinie nga tala diana hunire aana iiꞌonga diana iꞌomu, hunie kire ke sai lae i suliꞌomu mala mo sipu e sai lae i sulie kakali sipu nge ko lio i sulire.

⁴ Na maholo nge Naꞌohai Kakalihe haahie mo sipu kei ooli mei, nge ingeie ke si niie waaite e tohungei menikuluꞌe huniꞌomu, na mei waaite ngeena e saꞌa mango ike loꞌu aana nga maholo.

⁵ Oto loꞌu huniꞌomu mo saanau, omu ke totola i sulie mo rato. Na oto ahutemiu, omu ke mani haꞌamwai-mweiꞌaꞌomu na omu ke peꞌi-peꞌiꞌomu heiliu. Aana mo Uusu-uusu Maaꞌi e unue uri, A God e kaꞌa saetoꞌo aana ike iini ko too-toohaꞌinie maraana, taꞌe ko haa-haataꞌinie manata-diananga ingeie hunie mo iini ko haꞌamwai-mweiꞌara. Provebs 3:34

⁶ Oto omu ke haꞌamwai-mweiꞌaꞌomu na omu ke iiꞌo i mamalutana God Hahuꞌana Nanama, na ingeie kei haro haꞌapainaꞌaꞌomu taane aana tohungana maholo hunie.

⁷ Oto omu ke neꞌie ahutana mo tolahiꞌanga iꞌomu i laona nimana, aena aana ingeie oto ko lio i suli diana aamiu.

⁸ Taꞌe maelonga paine iꞌomu ngeena, a Pwelu Eero-eero, ko talei lae kali-keliꞌomu oto mola tarau huni waeliꞌomu. Ingeie ngeena domana oto nga laeon ko lae peꞌi tea paine aana ko lio hunie nga iini huni oonomie. Oto omu ke lio-lio diana talamiu, na omu ke kinetaꞌinie tolahamiu mwaanie aaelanga.

⁹ Omu ke haꞌa-aꞌailaꞌaa hiiwalaimolinge iꞌomu na omu ke uure maꞌutaꞌa honosie mo malaahonga aana aaelanga na ahutana mo esunge aaela a Satan. Aana omu saie uri taꞌa-taꞌa taungei aasanga nge ko hite aamiu ngeena ko lae noꞌone hunie ahutana mo iinoni nge kire hiiwalaimoli aana taꞌe-taꞌena nga leu kire iiꞌo aana i laona walumalau.

¹⁰ Maholo ienini, omu ko sapesalu mola hunie kele maholo oꞌoruꞌe, taꞌe a God e manata diana huniꞌomu oto liutaa. Ingeie ni oto e soiꞌomu huni lado peꞌie a Kraes na huni iiꞌo peꞌie aana manikuluhaꞌana nge e saꞌa mango ike loꞌu aana taꞌena nga maholo. Oto a God maraana kei haꞌasusue taane hiiwalaimolinge iꞌomu na kei niie nanamanga huniꞌomu hunie omu ke uure maꞌutaꞌa tarau mala iini e neꞌi rato oto aana oodo-oodonga.

¹¹ Kie ke paalahea God haahie nanamanga ingeie e saꞌa mango loꞌu. Iau, ke urine oto.

Mei Wala Ni Saediananga Ooreta A Pita

¹² Ngaeta aasikaelu aana hiiwalaimolinge nge nou sai norutoꞌo aana liutaa, nge a Saelas, na ingeie ni oto e peꞌieu huni uusue kele uusu-uusu oꞌoruꞌe ie huniꞌomu. Uusu-uusu ie nou uusue mola huni haꞌananauꞌomu na huni ere haꞌasusuꞌomu uri hahuꞌana manata-diananga a God huniꞌomu ke iiꞌo oto tarau peꞌiꞌomu maꞌalana nga taa ke rau-reu loꞌu eemiu. Oto omu ke iiꞌo susu oto aana.

¹³ Mo iini a God e lio hilisire hunie soihaadaꞌinge mai i Rom kire ko niie noꞌone saediananga ikire wau huniꞌomu. Na a Mak iini domana oto nga kaleku, ko niie noꞌone wau saediananga ingeie huniꞌomu.

¹⁴ Oto saeku hunie omu ke mani hele kiꞌi heiliu mala mo heꞌimalahune maaꞌi. No ko aarengaꞌi talamiu mo iinoni a Kraes uri hanuelamanga ingeie ke iiꞌo peꞌie ahutemiu mango.