1 Pita 4 - Tataroha Diana

Mau-meuringe Ikie Ke Aaopa Mwaanie Mau-meuringe Mo Puꞌo

¹ Maholo a Kraes e iiꞌo ue mai laona walumalau, e sapesalu oto liutaa i tehulaꞌamiu. Oto aena ngeena, iꞌomu noꞌone omu ke haꞌa-aꞌailaꞌaa neꞌisaenga iꞌomu na omu ke iiꞌo aakau mola tarau huni sapesalu noꞌone mala ingeie. Aena aana nga iini ko sapesalu aana sapena i tehulaꞌana a Kraes ko haataꞌinie uri e aaliꞌu oto toꞌohuu mwaanie oorahaꞌaa.

² Oto maholo omu iiꞌo ue mai i laona walumalau ie, omu ke suꞌuri lulu i sulie walu ola aaela mola mala saemiu. !Suꞌuri! Omu ke lulu i sulie mola nga taa a God e saetoꞌo aana.

³ Holaꞌinaꞌo, omu tohungei lae tewa aani lulu i sulilana tolahana mo puꞌo aana omu mai-mesi kaꞌu peꞌie taꞌena nga iini, na omu heri-heri hunie kaꞌu mola aaelanga. Omu mehiri kaꞌu tarau aani inu wei ni pweunge, na omu euꞌesuie kaꞌu mo houlaa paine huni inu-inu ni pweu na huni deu aaela mola aani. Na omu lae noꞌone peꞌie tolahai ola e lio mamaꞌelaꞌa ngeena aana omu palo-paloa kaꞌu mo god eero-eero.

⁴ Taꞌe maholo ienini mo malahumiu oto i naꞌo kire ko tohungei pangataꞌiniꞌomu aana omu kaꞌa sare lae loꞌu peꞌire huni deu i sulie mo tolahai ola aaela ngeena. Oto kire ko ere tataaꞌiniꞌomu oto.

⁵ Taꞌe mwaanie omu rongo hunire, aana a God kei haro leire taane haahie leune. Aana a God kei leie taane ahutana mwala, mo iini e mauri ue na mo iini e mae oto.

⁶ Aena leune kaꞌu laeliwalanga aana Tataroha Diana e haro lae hunie mwala oto waite nge kire aiꞌaa oto mwaanikolu siꞌiri. Aana maholo kire mau-meuri ue, leilada e lae oto, na sapeda e mae oto. Taꞌe maꞌalana kire mae oto aana sape, kire toꞌo aana oto maurihe huu peꞌie a God taꞌau i Lengi.

⁷ Maholo ie ko karaꞌinie oto haꞌamangolana ahutana walu ola. Oto omu ke loꞌo-loꞌongaꞌi diana na omu ke kinetaꞌinie tolahamiu mwaanie nga mei ola e waelie aarengaꞌinge iꞌomu.

⁸ Mei naꞌohai ola e malisine omu ke asuie oto uri omu ke mana-manata diana toꞌohuu huniꞌomu heiliu, sulie tolahai ola urine nge e sai da omu ke saeꞌaasie mo roroꞌanga iꞌomu heiliu noꞌone huniꞌomu.

⁹ Na mala uri nga iini e hiiwalaimoli ko saetoꞌo aana nga mei ngeulaa wa nga leu ni iiꞌo, nge omu ke tolakonie aana mo nume iꞌomu peꞌi ilenimwaꞌenga.

¹⁰ Iau, omu ke peꞌiꞌomu heiliu, aana a God e niie oto hunie taꞌena nga iini eemiu mei nanamanga huni deu esunge nana. Oto taꞌena nga iini eemiu ke asu diana aana taungei nanamanga a God e niie oto nana, hunie mo niinge hai aaopaꞌi nge a God e niiꞌi nana soihaadaꞌinge ke mani eehu diana.

¹¹ Taꞌena nga iini eemiu nge a God e niie oto nanamanga nana huni laeliwala, nge ke laeliwala oto mola i sulie mo wala nge a God e niiꞌi mei hunie. Na taꞌena nga iini eemiu nge a God e niie nanamanga huni peꞌie mwala, nge ke peꞌie mwala oto toꞌohuu aana nanamanga nge a God e niie hunie. Oto i tehulaꞌana mo esunge diana urine, mwala e sai paalahea God aana satana Jisas Kraes. Na ingeie oto e toꞌo aana ahutana manikuluꞌanga na sakanga oto di, oto di. Iau, ke urine oto.

Kie Kei Sapesalu Mala A Kraes

¹² Maeni iinoni maaꞌi ineu, maholo ienini omu ko tohungei sapesalu oto hiitoꞌo aana mo ola ko lae peꞌi hite aamiu. Mwaanie omu pangataꞌinie walu ola urine na omu loꞌongaꞌinie uri walu ola ngeena ke suꞌuri hite aamiu. !Haꞌike!

¹³ E diana uri hunie omu ke ile-ilenimwaꞌe mola, aana omu ko sapesalu oto noꞌone mala a Kraes e sapesalu keꞌu. Aena leune omu kei ilenimwaꞌe noꞌone aana maholo a Kraes kei lae mai peꞌie manikuluhaꞌana God.

¹⁴ Oto mala uri mwala ko haꞌasapesaluꞌaꞌomu i tehulaꞌana omu ko lulu i sulie a Kraes, omu ke ile-ilenimwaꞌe mola haahie. Omu ke ilenimwaꞌe mola aena aana mei tolahai sapesalunge i tehulaꞌana a Kraes nge ko haataꞌinie uri Liꞌoa Maaꞌi a God e iiꞌo oto aamiu toꞌohuu na kei haro niie manikuluꞌanga huniꞌomu.

¹⁵ Taꞌe nga iini ke suꞌuri loꞌongaꞌi uri a God ke haꞌadianaꞌaa aana ko sapesalu haahie mei ola aaela e asuie. Oto omu ke kinetaꞌinie tolahamiu mwaanie taꞌena nga aaelanga mala horonga wa pelinge wa laenga hailiu i saana mwala huni waelie mo esunge ikire, wa taꞌena nga ola nge ko deu huꞌisie mo haꞌatolanga.

¹⁶ Taꞌe mala uri nga iini ko sapesalu i tehulaꞌana ko lulu i sulie a Kraes, nge ke suꞌuri masa haahie leune, taꞌe ke paalahea mola a God aena aana mwala kire lio saie oto uri ingeie ngaeta iini a Kraes.

¹⁷ Maholo e hule oto hunie leinge a God kei aehota, na kei aehota oto peꞌie mwala aana uluhe ni iinoni ingeie. Na aana leinge ngeena ko aehota peꞌikie mwala ingeie, nge kie saie oto uri leinge a God kei aaela oto liutaa hunie mo iini nge kire kaꞌa hiiwalaimoli ike aana Tataroha Diana.

¹⁸ Aana mo Uusu-uusu Maaꞌi e unue uuri, ?Mala uri haꞌa-uurilana kira oodotaꞌi e kaꞌa mwadaꞌu ike, nge kei uri taa hunie kira oorahaꞌaa nge kire kaꞌa manataꞌinie ike a God? Provebs 11:31

¹⁹ Oto maholo omu ko sapesalu aena aana oalaꞌinge a God mone e lae oto urine, nge omu ko sapesalu i sulie oalaꞌinge ingeie, na omu ke suꞌuri aakohe mwaanie asunge diana, taꞌe omu ke toliꞌaasie maurihaꞌamiu i nimana God. Ingeie oto e haꞌaholaꞌomu, na e saꞌa pulongosie ike mo heiholotaꞌinge ingeie huni lio i suliꞌomu.