1 Korinit 9 - Tataroha Diana

A Pol E Nanama Noꞌone Mala Ngaeta Mo Hurulaꞌaa

¹ ?Oto e ue maeni eesiku? ?Uri omu kaꞌa saie ike uri ineu nou sai esuie noꞌone taꞌena nga ola a God e toliꞌaasie hunikie mo iinoni? !Omu saie taane! Na hule aana omu saie taane noꞌone oto uri ineu nga hurulaꞌaa ni ienini. Na loꞌu omu meni saie oto uri ineu nou leesie Aalaha ikie a Jisas aana maaku. Iꞌomu oto mo tolimaa aana asunge ineu nana a Aalaha, aana omu ko aehota hiiwalaimoli oto i tehulaꞌana asunge ineu.

² Oto maꞌalana ngaeta mwala kaꞌa si lio saieu mala uri nga hurulaꞌaa, taꞌe iꞌomu, omu saie taane, aena aana mauringe haalu iꞌomu i lalo aana a Aalaha e haataꞌi diana aana taane uri ineu nga hurulaꞌaa toꞌohuu.

³ Oto mala uri nga mwala kei sare dolosi eeku, ne kei aalamire mola uuri.

⁴ No ko esu keꞌu oto mala nga hurulaꞌaa. ?Na e ue nou saꞌa unue mwala ke peꞌieu aani ngeulaa?

⁵ Ngaeta mo hurulaꞌaa loꞌu, na mo eesine a Aalaha, na a Pita, hule aana kire mani toolea mo huꞌe ikire peꞌire. ?Oto e ue aana iꞌemereꞌi a Banabas?

⁶ ?Wa e ue? ?Uri taꞌe iꞌemereꞌi mola mere sai esu uei toꞌoha huni peꞌiꞌemereꞌi maraamereꞌi?

⁷ ?Uri mo ramo kire sai lae mola hunie oohotaa maholo nga taꞌa-taꞌa iini huni waaire haꞌike? ?Uri nga iinoni e sai haꞌaweoa mola aana hasilana mo ola e saꞌa ngauꞌi? ?Na loꞌu uri nga iinoni e sai talei haꞌa-haꞌaweoa mola aani lio i sulilana mo sipu na e kaꞌa sai losi susu ana mwaaniꞌi? !Haꞌike oto ooꞌoo!

⁸ Nou kaꞌa lae ike mola i sulie loꞌongaꞌinge ni iinoni, taꞌe i sulie mo Haꞌatolanga a Mosis noꞌone e ere i sulie taꞌa-taꞌa taungei ola urine.

⁹ Iau, uusulana e lae i laona Haꞌatolanga a Mosis uuri, Mwaanie o pwesu honosie wawana puluke maholo ko esu namue i laona hohola iꞌoe. Diutronomi 25:4 ?Oto e ue? ?Uri a God e neꞌisae paine mola aana mo puluke aana maholo e haꞌa-uuresie mei haꞌatolanga ngeena?

¹⁰ ?Wa e ue? ?Uri a God e kaꞌa ere ike i sulikie noꞌone aana maholo ko ere urine? Iau. Aana iinoni ko hesie hohola na iini ko hikie mo ngeulaa, kirerue mani hiiwalaimoli uri kirerue kei meni hikana taane nga taa kirerue weo aana.

¹¹ Iꞌemereꞌi a Banabas mere hasie taane oto hue-huana maurihe huu i laona manatamiu. Oto e malisine uri omu ke peꞌiꞌemereꞌi loꞌu aana nga mo ola huni peꞌie mola mauringe aana sapemereꞌi.

¹² Ngaeta mwala kaꞌu kire sai tola ola urine mwaaniꞌomu. Oto iꞌemereꞌi na e urine noꞌone mola, na hule aana e malisine uri mere ke roroꞌa loꞌu liutaa aana mwala ngeena. Taꞌe i sulie mere kaꞌa nine aani teꞌurine ike, oto aana maꞌalana walu ola ko aasaiꞌemereꞌi, mere kaꞌa sare aapwasu ike aani. Mere kaꞌa saetoꞌo aana ike nga mei ola ke liu honosie loꞌu Tataroha Diana i sulie a Kraes.

¹³ Omu saie taane oto uri mwala kire ko esu i laona Nume Maaꞌi, kire sai toolea mola mo ngeulaa i Nume Maaꞌi ngeena. Na mo iini ko uunu-uunu ola i lengine ora ni uunu-uunu, kire sai toolea noꞌone mola nga mo kele aapai ola aana mo uuraaꞌinge ikire ngeena.

¹⁴ Oto e urine noꞌone mola aana mo iini ko tarohaꞌinie Tataroha Diana. Aana a Aalaha e unue oto uri mo iini nge kire ko tarohaꞌinie Tataroha Diana, e malisine oto uri kire ke waaire haahie mei esunge ngeena.

¹⁵ Taꞌe maꞌalana e toꞌohuu taane oto urine, no ko tohalaꞌi mola aana uri nou kaꞌa toolea ike taꞌena nga mei ola mwaaniꞌomu. Oto ie nou kaꞌa uusu-uusu ike hunie omu ke nii-nii nekue urine. !Nou sereꞌi! Aana e lai diana hunieu uri hunie ne ke mae oto, taꞌe nga iini eemiu ke suꞌuri unue uri no ko esu mola huni toꞌoha. Mala uri omu ko ere urine, nge omu ko da uri toohaꞌinileku ke totowai mola.

¹⁶ Taꞌe e kaꞌa malisine ike uri ne ke toohaꞌinieu aana nou tarohaꞌinie Tataroha Diana, aena aana nga iini taane ni e dau rarahieu huni esu urine. Oto kei tohungei aaela oto hiitoꞌo hunieu mala uri nou kaꞌa tarohaꞌinie Tataroha Diana.

¹⁷ Na mala uri ineu maraaku ne ke lio hilisie mei esunge ienini, haꞌalaa waaiteku kei lae oto hunieu. Taꞌe aena aana nou kaꞌa lio hilisie ike, nge no ko esuie mola nga taa a God e dau rarahieu hunie.

¹⁸ ?Oto nga waaite uri taa nge ne kei toolea aana asunge ienini? Waaiteku nge oto mola ie, saemangonga. No ko tohungei saemango aana no ko nii mwaakule aana Tataroha Diana hunie ahutana mwala. No ko tarohaꞌi hunire na nou kaꞌa haataꞌinie ike nanamanga nou toꞌo aana huni toolea nga mei ola mwaanire.

¹⁹ Nga iini e kaꞌa aalaha ike haahieu mala ineu koni-konihe ingeie, taꞌe maꞌalana e urine, nou toliꞌaasieu mola hunie ne ke asu mala koni-konihe nana ahutana mwala. No ko deu urine huni huꞌisie mwala hunge hunie kire ke hiiwalaimoli aana a Jisas.

²⁰ Maholo nou esu peꞌie mo Jiu, nou iiꞌo mola mala ngaeta mwane ni Jiu huni da kire ke hiiwalaimoli. Na maꞌalana nou kaꞌa iiꞌo oto i mamalutana mo Haꞌatolanga a Mosis, taꞌe maholo nou esu peꞌie mo Jiu i mamalutana mo Haꞌatolanga a Mosis ngeena, nou iiꞌo oto noꞌone mala ikire hunie ne ke peꞌire hunie kire ke hiiwalaimoli.

²¹ Na loꞌu maholo nou esu peꞌie mo iini nge ikire nga mo Jiu haꞌike, nou iiꞌo oto noꞌone mala ikire nge kire kaꞌa iiꞌo i mamalutana mo Haꞌatolanga a Mosis hunie ne ke peꞌire hunie kire ke hiiwalaimoli. Na leune e kaꞌa loꞌongaꞌinge ike aana uri nou waelie haꞌatolanga a God, aana no ko lulu i sulie taane mo haꞌatolanga a Kraes.

²² Na maholo nou iiꞌo peꞌie mo iini nge ko lulu i sulie mola mo haꞌatolanga ni iinoni aana hiiwalaimolinge ikire e mamaelaꞌa, nou iiꞌo noꞌone mala ikire hunie ne ke peꞌire hunie kire ke hiiwalaimoli toꞌohuu. Oto nou iiꞌo oto i sulie ahutana mo tolahai iinoni nge kire toꞌo aani huni deu aahonga huni peꞌire hunie kire ke toꞌo aana maurihe huu.

²³ No ko euꞌesuie ue mo olana hunie Tataroha Diana tarohaꞌinilana ke lae taraꞌasi, na hunie ke mwadaꞌusieu hunie ne ke toolea haꞌadianaꞌanga mwaanie Tataroha Diana.

²⁴ Oto omu ke saie, maꞌalana mwala hunge kire ko heli aana hurunge, taꞌe taꞌa-taꞌa mwane mola kei toolea waaite. Oto ahutemiu, omu ke huru diana hunie omu ke toolea waaitemiu.

²⁵ Ahutana mwala nge kire ko sare hali aana hurunge, kire kei haro dau aakau aana sapeda, hunie sapeda ke mwarohi huni huru. Taꞌe dau-aakaunge ikire ngeena mola huni toolea waaite aana rorodara kei eiꞌaa mola. Taꞌe ikie, nge kie ko huru huni toolea waaite aana rorodara nge kei iiꞌo huu.

²⁶ Oto aena urinena, nou kaꞌa talei huru heiliu ike mola, taꞌe no ko huru oodo-oodo mola hunie leu nge iinoni kei holaꞌi lai hule aana kei toolea waaite. Oto mala mwane hai-heiseuni ko sare aꞌailaꞌasie maelonga ingeie, nge ineu noꞌone nou saꞌa talei kumu taꞌewau ike.

²⁷ Oto no ko deu rarahie sapeku maraaku hunie ke lae i sulie neꞌisaenga ineu, mwaanie da maholo nou tarohaꞌinie Tataroha Diana hunie ahutana mwala, oto purihaꞌana no ko si mamaelaꞌa mola.