1 Korinit 8 - Tataroha Diana

Manata-diananga E Hiꞌe Loꞌu Liutaa Aana Sai-olanga

¹ Hoe, no ko sare heꞌi ere loꞌu i sulie mo ngeulaa nge kire uunuꞌi oto i saana mo nunui ola. E toꞌohuu taane mala ngaeta mwala ko unu-unue uuri, “Ahutaka kie mani sai ola mola.” !Taꞌe omu ke lio talamiu! Sai olanga e sai da mola iinoni ke toohaꞌinie maraana, taꞌe manata-diananga nge ko peꞌikie suli maholo.

² Mala nga iini ko unue uri e saenanau, e kaꞌa tohungei sai diana aana ike ue nga taa e malisine uri ke saie.

³ Taꞌe mala nga iini ko manata diana, nge e tohungei sai ola oto.

⁴ Oto aapa aana ngaulana mo ngeulaa uunuleni e lae i saana mo nunui ola, kie saie oto uri nunui ola nga ola toꞌohuu haꞌike, aana kie mani saie oto uri e taꞌa-taꞌa God mola.

⁵ Mwala hunge kire sai paloa mo ola oto hunge taꞌau i Lengi wa mai aano na kire haaraꞌiniꞌi aana “god” na “aalaha.”

⁶ Taꞌe maꞌalana e urine, kie toꞌo aana mola e taꞌa-taꞌa God. Ingeie oto Aamaka nge e haꞌaholaa taꞌena nga ola, na ingeie oto iini kie ko meu-meuri huni haꞌapainaꞌaa. Na kie toꞌo aana mola e taꞌa-taꞌa Aalaha. Ingeie oto a Jisas Kraes nge haꞌaholalana taꞌena nga ola e lae aana, na aena aana ingeie mone kie ko si meu-meuri.

⁷ Taꞌe maꞌalana e urine, na ahutana mwala kaꞌa mani sai diana aana ike leune. Oto wau i naꞌo ngaeta mwala kire ko palo-paloa mola mo nunui ola oto tarau. Oto hule mai siꞌiri, maholo kire ko ngeue mo ngeulaa urine, kire ko loꞌo-loꞌongaꞌinie mola ue uri mo ngeulaa ngeena mo ola i saana mo god eero-eero ngeena. Loꞌongaꞌinge ikire e mamaelaꞌa oto aana e kaꞌa sada ike peꞌie hiiwalaimolinge ikire, na kire loꞌongaꞌinie uri mo ngeulaa ngeena ko da kire ko madaꞌa.

⁸ Taꞌe ngaulaa e kaꞌa roroꞌa ike i maana God. Oto maꞌalana uri kie ke ngaue mo ngeulaa ngeena wa haꞌike, kie saꞌa aaela ike aani wa kie ke tarie nga mei ola aani.

⁹ Maꞌalana urine na omu ke lio talamiu mola, mwaanie asuilana nga taa omu saie e kaꞌa roroꞌa ngeena e haꞌatataroa mola mo iini hiiwalaimolinge ikire e kaꞌa susu, na kire domu mola i laona oorahaꞌaa.

¹⁰ Omu saie taane mola uri ngaulaa e kaꞌa tohungei roroꞌa ike. ?Taꞌe nga taa kei reu mala uri o ko ngeu-ngeu mola aana nume ni uunu-uunu ola i saana mo god eero-eero? ?Na nga taa kei reu mala uri nga iini nge hiiwalaimolinge ingeie e kaꞌa susu ike aana leune ko leesiꞌo mola wau? Ingeie ko unu-unue uri iꞌoe, o saenanau diana, oto ingeie noꞌone kei heimaaniꞌo aana mei ola nge manatana e unue e aaela.

¹¹ Oto urine o kei deu aaelasie mola aasimu. !Iini nge a Kraes e mae honotana kei maesie saenanaunge iꞌoe ni ngeena!

¹² Taꞌena nga maholo o ko deu huꞌisie aasimu maaꞌi, aana o ko haꞌa-olaa hunie ke lae aaopa mwaanie nga taa manatana e loꞌongaꞌinie e oodo, nge o ko deu huꞌisie oto a Kraes ni ngeena.

¹³ Aena urinena, maeni eesiku, mala uri ngaulana nga mei ngeulaa ko aaela oto hunie aasiku, nge nou saꞌa ngau hikeni loꞌu mala no ko meu-meuri ue, aena aana nou kaꞌa sare dau huꞌisie ike aasiku hunie ke domu i laona oorahaꞌaa.