1 Korinit 7 - Tataroha Diana

A Pol E Aalamie Mo Dolosinge Mo Korinit I Sulie Haꞌarurunge

¹ Iau, nou sare lado luhesie mo dolosinge omu unuꞌi i laona uusu-uusu omu uusue mai hunieu. Omu dolosi i sulie iiꞌo-rurunge, na omu unue ohe e diana mola hunie mwane ke suꞌuri iiꞌo ruru peꞌie nga keni.

² Omu saie uri aeni-olanga e paine siꞌiri, oto e diana hunie mwane ke toꞌo aana nga huꞌe maraana, na keni e adona ke toꞌo aana oto nga poro maraana.

³ Na poro ke maꞌa-maꞌahu oto peꞌie huꞌe ingeie na huꞌe ke maꞌa-maꞌahu oto noꞌone peꞌie poro ingeie.

⁴ A huꞌe ngeena e kaꞌa aalaha ike haahie sapena maraana, taꞌe poro ingeie ni e aalaha haahie. Na poro ngeena e kaꞌa aalaha noꞌone haahie sapena maraana, taꞌe huꞌe ingeie ni e aalaha haahie.

⁵ Maholo iini o haꞌaruru peꞌie ko sare maꞌahu peꞌiꞌo, o ke suꞌuri sereꞌi loꞌu. More sai maꞌahu oopa-oopa taane aana nga mo maholo, taꞌe more ko meni mwaꞌe-mwaꞌe huni oopa urine haꞌalaa. Na more ke oopa urine mola hunie more ke iiꞌo aani aarengaꞌinge hunie nga kele maholo. Oto more ke si heꞌi maꞌa-maꞌahu tararuru loꞌu, mwaanie a Satan e malaahongamoreꞌi aana e aasa hunie more ke kinetaꞌinie sapemoreꞌi hunie nga maholo tewa.

⁶ Omu ke saie a God e kaꞌa unue ike omu ke mamalo haꞌawali mwaanie maꞌahunge tararuru huni aarea. !Haꞌike! Taꞌe neꞌisaenga diana ineu mola ni ngeena, mala saemiu huni lulu i sulie.

⁷ Na aana loꞌongaꞌinge ineu loꞌu, saeku hunie omu ke mani iiꞌo mola maraamiu mala ineu. Taꞌe a God e niie oto mo niinge hai aaopaꞌi hunikie. Ngaeta mo iini kire toꞌo aana ngaeta mo taungei niinge, na ngaeta mo iini kire toꞌo aana noꞌone ngaeta mo taungei niinge aaopa loꞌu.

⁸ Oto huniꞌomu mo nao mwane na mo nao keni, no ko unue uri e diana hunie omu ke iiꞌo mwaakule mola mala ineu.

⁹ Taꞌe mala uri ko aasaiꞌomu hunie omu ke iiꞌo mola mwaakule, e diana hunie omu ke tola huꞌe na omu ke toꞌo poro. Aana e diana liutaa hunie omu ke haꞌaruru mwaanie omu iiꞌo mwaakule peꞌi saehanalilana mola iiꞌo-rurunge.

¹⁰ Oto huniꞌomu mo poro na mo huꞌe, no ko sare unue mei haꞌatolanga ie huniꞌomu. Na haꞌatolanga ie nga ola kaꞌa uure ike mola mwaanieu, taꞌe e uure mwaanie a Jisas. Mo huꞌe, omu ke suꞌuri sikaa mo poro iꞌomu,

¹¹ na iꞌomu mo poro, mwaanie omu sikaa mo huꞌe iꞌomu. (Mala uri nga huꞌe kei sikaa poro ingeie, nge e saꞌa toꞌo poro loꞌu. Taꞌe mala uri ko neꞌisae loꞌu huni eelihoꞌi i saana poro ingeie, nge e si diana eena.)

¹² Oto huniꞌomu loꞌu mo iini nge omu haꞌaruru peꞌie iini i sinaha aana soihaadaꞌinge, a Aalaha e kaꞌa unue ike nga mei ola i sulie taungei haꞌarurunge iꞌomu ngeena. Oto ineu maraaku no ko unue huniꞌomu uuri. Mala nga mwane nge e hiiwalaimoli aana a Kraes ko toꞌo aana nga keni ni puꞌo, na a huꞌena e ilenimwaꞌe ni iiꞌo ruru mola peꞌie, a poro ngeena ke suꞌuri sikaa.

¹³ Na mala uri nga keni nge e hiiwalaimoli aana a Kraes ko toꞌo aana nga mwane ni puꞌo, na a mwane ngeena e ilenimwaꞌe mola ni iiꞌo ruru peꞌie, a huꞌe ngeena ke suꞌuri sikaa.

¹⁴ Aana a God kei haꞌamaaꞌie mwane e kaꞌa hiiwalaimoli ngeena aena aana ko iiꞌo ruru peꞌie huꞌe nge e hiiwalaimoli. Na a God kei haꞌamaaꞌie noꞌone keni e kaꞌa hiiwalaimoli ngeena aena aana ko iiꞌo ruru peꞌie poro nge e hiiwalaimoli. Na mala kirerue kei iiꞌo ruru urine, nge a God kei haꞌamaaꞌie noꞌone mo mwela ikirerue. Taꞌe mala ko haꞌike, nge mo mwela ikirerue kire kei urihana mola mo mwela ni puꞌo.

¹⁵ Taꞌe mala uri iini nge e iiꞌo ni puꞌo ko sare sikaa poro wa huꞌe ingeie nge e hiiwalaimoli aana a Kraes, toliꞌaasie mola ke lae i sulie saena. Mala ko lae urine, nga mei haꞌatolanga kaꞌa uure honosie ike iini nge e hiiwalaimoli. Taꞌe omu ke aamasitoꞌo aana uri a God e saetoꞌo aana kie ke iiꞌo ni henuelama.

¹⁶ Oto iꞌoe, a huꞌe ngeena, ohe o sai peꞌie mola poro iꞌoe hunie ke hiiwalaimoli. Na iꞌoe, a poro ngeena, ohe o sai peꞌie mola huꞌe iꞌoe hunie ke hiiwalaimoli.

¹⁷ Oto ahutaka, kie ke mani saie uri mei meuringe nge nga iini e toꞌo aana maholo a God e soie mai i saana, mei niinge a Aalaha ni ngeena. Oto aena urine omu ke suꞌuri sare toliꞌaasie loꞌu, taꞌe omu ke ilenimwaꞌe mola haahie. Na haꞌatolanga nge no ko lae peꞌi haꞌarongoa ahutana mo soihaadaꞌinge aana ni otona.

¹⁸ Oto mala uri o ko hele aana oto torihesiꞌonga aana maholo a God e soiꞌo, nge o ke suꞌuri sare oolisie loꞌu. Na mala uri o kaꞌa hele aana ue torihesiꞌonga maholo a God e soiꞌo, nge o ke suꞌuri sare torihesiꞌo loꞌu.

¹⁹ Aena aana uri o ke hele aana kaꞌu torihesiꞌonga wa haꞌike, nga mei roroꞌanga haꞌike aana. Taꞌa-taꞌa leu mola e roroꞌa oto, uri o ke lulu i sulie mo haꞌatolanga a God.

²⁰ Ahutemiu mango, omu ke mani iiꞌo toꞌo oto aana taꞌa-taꞌa taungei meu-meuringe nge omu oꞌoꞌo aana maholo a God e soiꞌomu.

²¹ Mala uri o oꞌoꞌo kaꞌu mola mala nga koni-konihe aana maholo a God e soiꞌo, ngeena o ke suꞌuri tolahiꞌe aana leune. Taꞌe mala uri o ko saie nga tala hunie o ke iiꞌo luhetaꞌi aana, nge e diana taane hunie o ke lae mola i sulie.

²² Aena aana nga iini nge Aalaha ko soie, maꞌalana ingeie koni-konihe nga iinoni, taꞌe e iiꞌo luhetaꞌi mola i lalo aana Kraes. E urine loꞌu aana iini nge Aalaha ko soie na e iiꞌo luhetaꞌi mola, taꞌe e neꞌi koni-konihe oto nana Kraes.

²³ A Kraes e pwani holiꞌomu oto aana holite paine. Oto omu ke suꞌuri neꞌi koni-konihe loꞌu nana walu ola mo iinoni ko tolahiꞌe aani.

²⁴ Iau, maeni eesiku maaꞌi, omu ke iiꞌo oto mola mala omu iiꞌo kaꞌu aana maholo nge a God e soiꞌomune, taꞌe omu ke iiꞌo ruru peꞌie a God i leune.

²⁵ Hoe. Omu dolosi noꞌone i sulie mo mwane na mo keni nge kire iiꞌo pupupu. A Aalaha e kaꞌa niie ike nga mei haꞌatolanga i sulire, taꞌe ne kei unue mola neꞌisaenga ineu maraaku. Na aena aana a Aalaha e aamasieu na e manata diana hunieu, oto e neꞌieu hunie nga iini nge omu sai norutoꞌo aana.

²⁶ Oto nou leesie walu ola ko aasa aana maholo ie, na aena urine, nge nou loꞌongaꞌinie uri e diana hunie omu ke iiꞌo mola mala omu ko iiꞌo siꞌiri.

²⁷ Mala uri o ko tola huꞌe oto, o ke suꞌuri sikaa loꞌu huꞌe iꞌoe. Mala uri o kaꞌa tola huꞌe ue, o ke suꞌuri loꞌohie loꞌu nga iini.

²⁸ Taꞌe maꞌalana ke urine, mala uri o ko sare tola huꞌe, e diana mola, nga oorahaꞌaanga haꞌike. Na mala uri nga keni raoriꞌi ko toꞌo poro, e diana noꞌone mola. E kaꞌa oorahaꞌaa ike ni urine. Taꞌe omu ke saie mola uri mo iini nge kire ko haꞌaruru, kire kei deu oodoie mo aasanga i laona mau-meuringe ienini. Na nou sereꞌinie ke aasa urine huniꞌomu.

²⁹ No ko ere urine, maeni eesiku maaꞌi, aana kele maholo oꞌoruꞌe oto mola e si oore. Oto aehota siꞌiri, omu ke neꞌisae paine mola aana God. Oto mo iini omu tola huꞌe, omu ke suꞌuri loꞌongaꞌinie iiꞌo-rurunge mala mei naꞌohai ola iꞌomu.

³⁰ Ilenimwaꞌenga wa saehuunge wa toꞌo-olanga ke suꞌuri uure honosie nga iini mwaanie asunge nana God.

³¹ Na mo iini nge kire toꞌo ola i laona walumalau ie, kire ke suꞌuri neꞌisae paine haahie toꞌo-olanga ikire. Taꞌe kire ke mani neꞌisae paine mola aana God, aena aana nga taa nge kolu ko leesie i laona walumalau ie, karaꞌinie oto kire kei eiꞌaa.

³² Oto nou saetoꞌo aana omu ke suꞌuri tolahiꞌe i sulie taꞌena nga mei ola. Aana nga iini nge e kaꞌa toꞌo poro wa ke tola huꞌe, neꞌisaenga ingeie mola aana asunge nana a God aena ko sare haꞌasaedianaꞌaa a God.

³³ Taꞌe iini nge e tola huꞌe, ko neꞌisae mola aana mo ola aana walumalau aena ko sare haꞌasaedianaꞌaa huꞌe ingeie,

³⁴ na neꞌisaenga ingeie oto aana e ro mei ola. Taꞌe keni nge e kaꞌa toꞌo poro, ko tolahiꞌe mola aana asunge nana a Aalaha, aana ko sare niie oto mauringe ni sape na maurihaꞌai oto hunie a God. Taꞌe huꞌe nge e toꞌo poro, ko tolahiꞌe aana mo ola aana walumalau ie, aena aana ko sare da hunie poro ingeie ke ilenimwaꞌe.

³⁵ No ko ere urine huniꞌomu aena aana no ko sare peꞌiꞌomu na e kaꞌa ike huni esuie mo haꞌatolanga e aasa. Nou saetoꞌo aana mola uri omu ke asuie nga taa e oodo na hunie omu ke asu nana God hahaiteli.

³⁶ Taꞌe mala uri nga iini ko loꞌongaꞌinie uri e kaꞌa dau diana hunie keni raoriꞌi e haiholotaꞌi huni haꞌaruru peꞌie aana a keine ko karaꞌi liue maholo ni toꞌo-poronga, na ingeie maraana ko loꞌongaꞌinie mola uri kirerue ke haꞌaruru, nge e diana mola hunie kirerue ke haꞌaruru. Nga mei oorahaꞌaanga haꞌike i leune.

³⁷ Taꞌe mala uri saanau ngeena ko neꞌisae maraana hunie ke uure maꞌutaꞌa mwaanie e haꞌaruru, na nga iini e kaꞌa dau rarahie hunie neꞌisaenga urine, na e saie uri kei lio i sulie maraana, nge leune e diana mola.

³⁸ Oto iini nge e tola huꞌe e dau diana, na iini nge e kaꞌa tola huꞌe ike e dau diana loꞌu liutaa.

³⁹ Na loꞌu, huꞌe nge e toꞌo poro ke iiꞌo ruru taraꞌasi oto peꞌie poro ingeie. Taꞌe mala uri poro ingeie ko mae, nge e sai toꞌo aana loꞌu mola taꞌena nga mwane ko saetoꞌo aana, mala uri a mwane ngeena noꞌone ko lulu i sulie a Kraes.

⁴⁰ Taꞌe mala uri a huꞌe ngeena ko iiꞌo mwaakule mola urine, nge ke si tohungei ilenimwaꞌe loꞌu eena. Neꞌisaenga ineu otona, na nou hiiwalaimoli uri Liꞌoa Maaꞌi a God noꞌone ko neꞌisae urine.