1 Korinit 5 - Tataroha Diana

Mwane Ko Aeni Ola Ngeena, Omu Ke Neꞌie I Sinaha Mwaanie Soihaadaꞌinge

¹ Maeni eesiku, no ko rongo hailiu aana uri ngaeta iini eemiu ko esuie mei ola e tohungei aaela oto hiitoꞌo aana ko toꞌo aana loꞌu mola ngaeta huꞌe aamana mei ola oto maꞌalana mwala kire iiꞌo ni puꞌo na kire sai masa mola ni esuie.

² !Haꞌike eena! ?E ue ni omu ko toohaꞌiniꞌomu haahie? E malisine omu ke saehuu i sulie, na hunie omu ke neꞌie mwane ngeena i sinaha mwaanie soihaadaꞌinge.

³ E toꞌohuu aana nou iiꞌo haꞌatauliꞌomu, taꞌe ahutana neꞌisaenga ineu taane mola aamiu. Na ineu, nou saie uri mala ne ke iiꞌo peꞌiꞌomu, haꞌalaa nou lei mangoa oto a mwaena. Oto maꞌalana nou haꞌatauliꞌomu, taꞌe nou leie oto a mwaena.

⁴ Oto iꞌomu, omu ke loko tararuru aana satana a Jisas, Aalaha ikie, huni neꞌisae i sulie neꞌisaenga ineu ie. Oto aana nanamanga a Jisas,

⁵ omu ke toliꞌaasie mola a mwane ngeena i nimana a Satan. Ohe maholo kei sapesalu, hari-huninge ingeie hunie aapa hatarie hasiꞌo ke mango, na a God ke haꞌa-uurie mola hunie maurihaꞌana ke iiꞌo diana aana hai dinge a Kraes kei ooli loꞌu mei.

⁶ Omu saie taane mei wala nge e unue uuri, “Kele mei iis oto mola mwai-mwei e ado oto huni esuie nimei pulaoa laku hunie kei hane i lengi.” Oto urine noꞌone, e kaꞌa ado ike hunie omu ke toohaꞌiniꞌomu, aena aana aaelanga ngeena e sai sikihie ahutemiu mango-mango.

⁷ Oto omu ke tala aasie mola mei iis lalahuꞌe aana oorahaꞌaa ngeena mwaaniꞌomu, hunie omu ke neꞌie mei bred haalu mala bred nge iis haꞌike aana nge kire asuie hunie Houlaa Ni Liumwaanie. Na omu urihana oto mei bred ngeena i maana God, aana e da omu rereꞌa oto taꞌingelu i maana. E da mola urine aana maelana a Jisas Kraes, aana ingeie oto kalei sipu aana Houlaa Ni Liumwaanie nge uunu-olanga aana e lae honotaka.

⁸ Oto aena urinena, kie ke mani ilenimwaꞌe, taꞌe kie ke suꞌuri ilenimwaꞌe peꞌi tola i sulilana mo tolaha lalahuꞌe aana saewasunge na inu wei ni pweunge na dau roroꞌanga. !Haꞌike! Mo oorahaꞌaa urine kire urihana iis nge e sai sikihie mola walu ola. Taꞌe ikie, kie taꞌaasie oto walu ola urine, na kie ko ilenimwaꞌe mola peꞌi saemanola na peꞌie walaimolinge.

⁹ Maeni eesiku, nou kaꞌa ere aaopa ike mwaanie nga taa nou unue oto wau i naꞌo. I laona uusu-uusu nge nou uusue kaꞌu weu huniꞌomu, nou unue oto uri omu ke suꞌuri hikusie mwala kire sai mesi.

¹⁰ Taꞌe nou kaꞌa unue ike uri omu ke oopa mwaanie mo puꞌo nge kire ko mei-mesi, wa kire ko sae-saehanalie mola toꞌo-toꞌolana ngaeta mwala, wa kire ko eeroa mwala mwaanie toꞌo-toꞌolada, wa kire ko palo-paloa mo nunui ola. Haꞌike. Aana mo iinoni mala ngeena, omu ko lae oto mwaanie walumalau ie haꞌalaa omu ko toliꞌaasire.

¹¹ Nga taa nge nou ere urine aana, nge uri omu ke suꞌuri hikusie taꞌena nga iinoni ko unu-unue uri ingeie e hiiwalaimoli aana a Kraes, taꞌe ko aeꞌaeni ola mola, wa ko sae-saehanalie mola toꞌo-toꞌolana ngaeta mwala, wa ko palo-paloa mola mo god eero-eero, wa ko ere-ere aaelasie mola ngaeta mo iini, wa ko inu-inu wei ni pweunge mola, wa ko eeroa mola mwala mwaanie toꞌo-toꞌolada. Iini urine, maꞌalana aawenga wa ngaunge peꞌie, na omu ke suꞌuri esuie loꞌu.

^12-13 E kaꞌa leu ike i sapeku huni leie mo iini haꞌike aana soihaadaꞌinge. A God maraana ke si leire. Taꞌe leu i sapemiu maraamiu huni leie mwala aana soihaadaꞌinge, aena aana mo Uusu-uusu Maaꞌi e unue uuri, Omu ke aasie iinoni aaela urine i sinaha mwaaniꞌomu. Diutronomi 17:7