1 Korinit 4 - Tataroha Diana

Mo Hurulaꞌaa Kire Neꞌi Koni-konihe Mola A Kraes

¹ Oto omu ke neꞌisae aameelu mala uri iꞌemeelu mo koni-konihe a Kraes, mo mwane auꞌesu nge ko lio i sulie tarohaꞌinilana saehaahinge a God.

² Na omu saie taane e taꞌa-taꞌa mei ola mola ni e roroꞌa oto liutaa. E roroꞌa mola hunie mo koni-konihe kire ke asu toꞌohuu nana mo poro paine ikire.

³ Oto nou saꞌa tolahiꞌe ike mala uri iꞌomu wa nga iini aana walumalau kei leieu. Maꞌalana ineu maraaku na nou kaꞌa sai leie ike asunge ineu.

⁴ Manataku e taha mola aana nou kaꞌa saie ike nga mei takalonga ineu, taꞌe e kaꞌa loꞌongaꞌinie ike uri ineu mwane oodotaꞌi. Aalaha ikie mola ni kei leieu.

⁵ Oto omu ke suꞌuri leie mwala, aena aana e kaꞌa hule ue aana maholo a God kei lae mai huni leie mwala. Oto omu ke maaꞌoohie kaꞌu Aalaha ikie kei lae mai, aana ingeie nge ke si haataꞌinie mo ola kire oꞌoꞌo mumuni rorodoꞌa hunie kire ke iiꞌo haadaꞌi. Ingeie oto kei haataꞌinie saehaahinge mo iinoni, na kei lahera i sulie nga taa nga iini e asuie.

⁶ Maeni eesiku maaꞌi, walu ola ienini no ko unuꞌi i suliꞌemereꞌi a Apolos hunie omu ke saenanau aana tolahamereꞌi. Ngaeta mei wala e teꞌuri, “Mwaanie omu liue nga taa uusulana e lae i laona Uusu-uusu Maaꞌi.” Mala uri omu kei teꞌurine, nge omu saꞌa unu-unue ike uri nga iini e paine liutaa aana nga iini, na omu saꞌa toohaꞌiniꞌomu ike maraamiu aana omu ko lae i sulie iini nge omu unue e paine, na omu saꞌa ere aaelasie loꞌu nga iini.

⁷ !Sei! ?Iꞌoe o aaopa kaꞌu uri taa? ?A tei kaꞌu e haꞌaholaꞌo? ?Na nga mei taa kaꞌu ni o toꞌo aana nge a God e kaꞌa haꞌa-aakaurisiꞌo aana? ?Taꞌe aana uri ko haꞌa-aakaurisiꞌo aana, na e ue ni o ko toohaꞌiniꞌo haahie mala uri o esuie mola tohumu?

⁸ ?Oto e ue? ?Uri omu hele oto aana walu ola ni Liꞌoa omu saetoꞌo aani? ?Uri omu toꞌo-toꞌo oto aana mo niinge ni Liꞌoa? ?Uri omu neꞌi mwane paine oto aana Aalahanga a God? Nou tohungei saetoꞌo aana ke urine, aena aana mala uri ko toꞌohuu, Aalahanga a God e hule oto na mere ko aalaha loꞌu noꞌone peꞌiꞌomu.

⁹ Taꞌe mere kaꞌa aalaha ike ue. Iꞌemeelu mo hurulaꞌaa, e lio mala a God e tohungei haꞌamwai-mweiꞌaꞌemeelu. E lio mala e toliꞌaasie ahutana mo iini meuri, mai aano na taꞌau i Lengi, hunie kire ke haꞌamwasi aameelu. Kire ko tohungei ere aaelasiꞌemeelu mola. E urihana ikire oto mo iini nge kire ko lai maa ni ola aana maholo kire ko horoꞌie mo iini nge leilada e lae oto hunie maenga.

¹⁰ Oto mwala nge kire leesiꞌemeelu kire ko loꞌongaꞌinie uri melu ko pweu aana melu iiꞌo peꞌie a Kraes. ?Taꞌe e ue aana iꞌomu? ?Uri omu saenanau oto aena aana iꞌomu peꞌie a Kraes? !Neꞌewau oto! Iꞌemeelu, melu tataku mola, taꞌe iꞌomu nge omu aꞌailaꞌa.

¹¹ Iꞌemeelu, mwala e lio mwai-mweisiꞌemeelu, taꞌe iꞌomu nge mwala e leesiꞌomu mala mo aalaha. Oto lae mai hule siꞌiri, melu ko tohungei maesie oto hiolonga, na melu ko maesie oto inunge, na melu kaꞌa hoꞌo-hoꞌosie oto nga mei sala diana. Mwala ko seuniꞌemeelu, na melu kaꞌa toꞌo aana ike nga leu ni iiꞌo aana.

¹² Melu ko tohungei haꞌaweoꞌemeelu oto hiitoꞌo aani esunge. Maholo mwala ko ere ni hoꞌasinge huniꞌemeelu, melu ko ere ni haꞌadianaꞌara mola. Na maholo mwala ko teungeꞌiniꞌemeelu, melu ko esu susutoꞌo mola.

¹³ Na maholo kire ko tarohaꞌinie eeronga i suliꞌemeelu, melu ko ere rako mola peꞌire huni haꞌa-oodohie nga taa kire ko unue ngeena. Oto uure waite hule mai siꞌiri, na mwala ko lee-leesiꞌemeelu mala uri mo ola kire aaela oto liutaa loꞌu mwaanie aalitehu.

A Pol Ko Eitanaie Mo Korinit Hunie Kire Ke Aaliꞌu

¹⁴ Nou kaꞌa unue ike mo ola ienini huni haꞌamasaꞌomu, taꞌe huni haꞌananauꞌomu mala mo mwela maaꞌi ineu.

¹⁵ Maꞌalana uri omu ke toꞌo aana loꞌu nga mo iini hunge huni haꞌa-uusuliꞌomu aana tolahana a Kraes, taꞌe omu ke suꞌuri pulongosie uri ineu oto taꞌa-taꞌa aamamiu. Aana ineu oto nou tooleꞌomu mei i saana a Kraes maholo nou laeliwala aana tataroha diana namiu.

¹⁶ Oto no ko eitanaiꞌomu hunie omu ke haimaanieu.

¹⁷ Aena leune mone no ko uusungeꞌinie wau a Timoti i seemiu. Ingeie domana oto a kaleku toꞌohuu na ko esu diana nana Aalaha paine ikie. Ingeie ke si haꞌananauꞌomu loꞌu aana mo haꞌatolanga nge nou lae peꞌi laeliwala aani i sulie mo soihaadaꞌinge aana taꞌena nga leu no ko lae-lae aana.

¹⁸ Ngaeta mo iini hikemiu kire loꞌongaꞌinie uri nou saꞌa hule loꞌu i seemiu, oto kire ko aehota toohaꞌinire oto.

¹⁹ Taꞌe e saꞌa tewa na ne kei lae loꞌu mei maatoliꞌomu, mala a Aalaha ko saetoꞌo aana ne ke asuie urine. Na aana maholona, nou saꞌa rongo ike hunie mwala too-toohaꞌi ngeena, taꞌe ne kei lio mola hunie nga nanamanga uri taa nge kire toꞌo aana.

²⁰ Aena aana Aalahanga a God kaꞌa ola ike mola aani wala, taꞌe ola ni nanamanga.

²¹ ?Oto leu uri taa nge saemiu hunie? ?Uri ne ke lae mai peꞌie nga mai ue huni haꞌaloiꞌomu, wa ne ke lae mai peꞌie mo wala ni manata-diananga na aamasinge?