1 Korinit 3 - Tataroha Diana

Mo Korinit Kire Iiꞌo Mala Mo Iini Liꞌoa Maaꞌi Haꞌike Ue Aada

¹ Maeni eesiku maaꞌi, tolahamiu e urihana mola mwala aana walumalau ienini. Waite nou kaꞌa sai ere ike huniꞌomu mala mo iini kire toꞌo aana Liꞌoa Maaꞌi i lalo aada. Haꞌike, taꞌe nou ere-ere huniꞌomu mola mala iꞌomu mo kele mwela aana tolahana a Kraes.

² Erenga ineu huniꞌomu e urihana mola ewei susu nge mo kele wee-wee ko sususuhie, na nou kaꞌa haꞌangauꞌomu ike ue aani ngeulaa maꞌutaꞌa mala mo teitesi aena aana maholona omu kaꞌa malisine ike mo ngeulaa ni rato. Na maꞌalana hule siꞌiri, na omu kaꞌa malisine ike ue.

³ Omu ko lae-lae mola ue mala mo iinoni aana walumalau ienini. !Lio kaꞌu! Omu iiꞌo mola ue peꞌie upwanga na heotaꞌinge. Mo ola ngeena kire haataꞌi diana aana uri iꞌomu nga mo iinoni aana Liꞌoa Maaꞌi haꞌike, aana tolahamiu e sada mola ue peꞌie mo iinoni ni welumalau.

⁴ Ngaeta mo iini eemiu ko unue uuri, “Ineu aana aapa a Pol,” na ngaeta mo iini uuri, “Ineu aana aapa a Apolos.” !Haꞌike eena! ?Uri omu kaꞌa loꞌongaꞌi ike mala mo iinoni ni welumalau ni ngeena?

Mo Haꞌa-uusuli Toꞌohuu Ko Esu Huni Haꞌapainaꞌaa Mola A Kraes

⁵ ?Haꞌalaa nga taa nge loꞌongaꞌinge iꞌomu aamereꞌi a Apolos? Iꞌemereꞌi e ro mwane auꞌesu mola a God ni ngeena. Mere peꞌiꞌomu oto mola hunie omu ke hiiwalaimoli aana a God, aana iꞌemereꞌi, mere asuie mola mo esunge hai aaopaꞌi nge a God e niiꞌi huniꞌemereꞌi huni esuiꞌi.

⁶ Oto ineu nge nou urihana mwane e hasie mo litei ola i laona hohola, na a Apolos nge e urihana mwane e danguhie mo litei ola ngeena aani wei. Taꞌe a God nge e asuie hunie kire ke mwaꞌora.

⁷ Oto iini ko hesie mo lite na iini ko denguhiꞌi ikire mo mwane mwaakule mola, taꞌe a God ni e paine liutaa, aana ko esuie mo lite ngeena hunie kire ke mwaꞌora.

⁸ Oto mwane ko hesi lite na mwane ko dengu wei, kire ko meni esu tararuru mola hunie taꞌa-taꞌa mei neꞌisaenga, na a God ke si waairerue i sulie asunge ikirerue.

⁹ Aana iꞌemereꞌi e ro mwane nge mere ko esu tararuru nana a God, na iꞌomu oto domana hohola ingeie. Na iꞌomu domana oto noꞌone nume a God.

^10-11 A Jisas Kraes oto poo-pootana nume ngeena, na nga poo-poota aaopa hunie nga iini ke neꞌie loꞌu, haꞌike oto ooꞌoo. A God e niie mai nanamanga hunieu, hunie ne ke neꞌie mwane saenanau diana aana tohu-numanga. Oto ineu nge nou neꞌie poo-pootana nume ngeena, na ngaeta mo mwane ko si tohu nume i lengine. Taꞌe kire ke lio talada mola hunie kire ke tohu diana aana nume ngeena.

¹² Ngaeta mwala kei esuie nume ienini aana mo ola diana mala kol wa siliva wa mo heu kire lio diana, na ngaeta mwala loꞌu kei esuie mola nume ngeena aana mo ei wa mo hahalisi wa mo sao.

¹³ Taꞌe aana hai dinge ooreta, dunge kei haataꞌinie mo taungei esunge hai aaopaꞌi nge mwala e asuiꞌi, ohe kire diana taane wa haꞌike.

¹⁴ Mala uri dunge e kaꞌa waruhie mo ola nge iinoni e asuie nume ngeena aani, nge a God kei waaie iinoni ngeena haahie asunge diana ingeie.

¹⁵ Taꞌe mala uri dunge ko weruhie mola mo ola nge e asuie nume ngeena aani, nge ahutana weonga ingeie e aiꞌaa oto. Maꞌalana a God kei haꞌa-uurie taane mangona, taꞌe kei urihana mola iinoni nge kire waꞌinie mwaanie nume nge ko weru ngeena.

¹⁶ !Haꞌike eena! ?Uri omu kaꞌa saie ike uri soihaadaꞌinge iꞌomu e neꞌi nume maaꞌi a God? !Iau, e toꞌohuu oto aana Liꞌoa Maaꞌi e iiꞌo i lalo aamiu!

¹⁷ Mala uri nga iini kei waelie nume maaꞌi ngeena, a God kei tohungei waelie oto noꞌone. Aana nume maaꞌi a God ngeena e tohungei maaꞌi, na iꞌomu oto nume maaꞌi a God.

¹⁸ Oto omu ke suꞌuri neꞌi-neꞌisae aaela i sulie mei ola ienini. Mala uri nga iini eemiu ko neꞌi-neꞌisae uri e saenanau aana saenanaunge ni welumalau, e diana oto liutaa hunie iinoni ngeena ke tohungei toli puri aana saenanaunge ngeena maꞌalana mwala ko haaraꞌinie aana “Pweu.” Oto ke si hule aana saenanaunge toꞌohuu.

¹⁹ Aana saenanaunge aana walumalau ienini e kaꞌa rongo ike mala nga mei ola, aana e lio mola mala pweunge i naꞌona saenanaunge a God. Na e toꞌohuu oto, aana Uusu-uusu Maaꞌi e teꞌuri, A God e sai da mola kira saenanau ke toꞌo i laona mo hune ikire maraada kire lolosiꞌi aana sai-olanga ikire. Job 5:13

²⁰ Na ngaeta mei wala i laona Uusu-uusu Maaꞌi e teꞌuri loꞌu, A God e saie uri neꞌisaenga kira saenanau, mei ola mwaakule mola. Sam 94:11

^21-22 Oto aena urinena, maeni eesiku, omu ke suꞌuri ere toohaꞌinie asunge nga iinoni. Maꞌalana ineu a Pol, wa a Apolos, wa a Pita, taꞌe a God e uusungeꞌiniꞌemeelu mola huni peꞌiꞌomu. Na e toꞌohuu oto uri e niie oto ahutana walu ola namiu, hule aana walumalau, na mauringe, na maenga, na maholo siꞌiri, na maholo ko lae ue mai. Ahutana mo ola ngeena mo ola oto iꞌomu.

²³ Na iꞌomu oto mwala a Kraes, na a Kraes oto iini a God.