1 Korinit 2 - Tataroha Diana

A Pol E Kaꞌa Lae Ike Mai I Saana Mo Korinit Peꞌie Saenanaunge Mo Iinoni

¹ Oto ineu, maeni eesiku maaꞌi, maholo nou lae kaꞌu weu i seemiu huni tarohaꞌinie saehaahinge a God, nou kaꞌa ere ike aana nga mo eehuꞌi wala wa nga mo saenanaunge ke lae oto loꞌu i peine liutaa.

² Aena aana maholo nou oꞌoꞌo peꞌiꞌomu, nou neꞌisae mouteꞌi uri nou saꞌa ere-ere ike loꞌu aana nga mei ola aaopa, taꞌe nou neꞌi-neꞌisae oto mola aana a Jisas Kraes na maenga ingeie i lengine poꞌu-poꞌu.

³ Oto maholo nou lae mai seemiu, nou maarara aana nou hiingeꞌinie uri nou kaꞌa malisi hule aana nou meꞌu peꞌie ariringe.

⁴ Oto nou saie uri laeliwalanga ineu na mei wala nge nou tarohaꞌinie huniꞌomu e kaꞌa lae ike aana mo wala diana i sulie saenanaunge mo iinoni. !Haꞌike! Taꞌe e lae mola peꞌie nanamanga aana Liꞌoa Maaꞌi a God.

⁵ Oto saenanaunge iinoni e kaꞌa da ike omu ke hiiwalaimoli aana a God, taꞌe nanamanga a God maraana nge ni e asuie urine, uri hunie omu ke hiiwalaimoli aana.

A Pol E Lae Mai I Saana Mo Korinit Peꞌie Saenanaunge A God

⁶ Taꞌe mo wala no ko tarohaꞌiniꞌi ienini, mo wala ni saenanaunge taane, mei saenanaunge nana mo iini nge kire paine oto peꞌie tolahai hiiwalaimolinge. E kaꞌa saenanaunge ike aana walumalau ienini. Mei saenanaunge ienini e tohungei aaopa oto liutaa mwaanie saenanaunge aana mo iini kire nanama haahie walumalau siꞌiri, mo iini nge kire kei eiꞌaa mola.

⁷ Mei wala ni saenanaunge a God nge no ko tarohaꞌinie ienini, mei saenanaunge e iiꞌo mumuni mwaanie iinoni. Taꞌe a God e pwani lodoa oto i naꞌo na haꞌaholanga haꞌike ue, huni niie saenanaunge ie hunikie, hunie kie ke saie uri tala huni iiꞌo aana manikuluꞌanga peꞌie a God otona.

⁸ Mei wala ni saenanaunge ienini maꞌalana nga taꞌa-taꞌa iinoni aana mwala kire paine haahie walumalau ie, na e kaꞌa saie ike. Mala uri kire ke saie, haꞌalaa horoꞌilana Aalaha Manikuluꞌe ikie e kaꞌa lae ike.

⁹ Taꞌe leune ko haataꞌinie oto uri Uusu-uusu Maaꞌi ko ere toꞌohuu aana e unue uuri, A God e dau aakau aana mei ola nge e diana liutaa hunie mo iini nge a God maraana e manata diana hunire. Na mei ola diana ngeena nga iini e kaꞌa leesie ue, wa nga iini ke rongoa, wa ke loꞌo-loꞌongaꞌinie uri kei reu. Aesaea 64:4

^10-11 Taꞌe nga taa e iiꞌo mumuni kaꞌu i naꞌo ngeena, a God e haataꞌinie oto hunikie aana Liꞌoa Maaꞌi ingeie. ?A tei ni e saie neꞌisaenga a God? Liꞌoa Maaꞌi a God haꞌalaa ni e saie mo loꞌongaꞌinge mumuni a God. Aana iinoni, taꞌe ingeie mola maraana ni e saie mo neꞌisaenga i laona manatana, oto e sada noꞌone mola mala Liꞌoa Maaꞌi e saie mo neꞌisaenga i manatana a God.

¹² Oto Liꞌoa nge kie toolea i lalo aaka ngeena, nga liꞌoa haꞌike loꞌu aana walumalau, taꞌe Liꞌoa Maaꞌi, iini nge a God e niie mai hunie kie ke sai diana aana ahutana mo niinge a God hunikie.

Mo Iini Liꞌoa Maaꞌi Haꞌike Aada, Kire Kaꞌa Saie Ike Saenanaunge A God

¹³ Oto melu kaꞌa ere ike aana mo wala i sulie saenanaunge iinoni, taꞌe melu ko ere mola i sulie mo wala nge Liꞌoa Maaꞌi e haꞌa-uusuliꞌemeelu eeni, maholo melu ko ere luhesie walaimolinge i sulie a God hunie mo iini nge kire toꞌo aana Liꞌoa Maaꞌi.

¹⁴ Taꞌe iinoni nge e kaꞌa toꞌo aana Liꞌoa Maaꞌi i lalo aana, e saꞌa toꞌo aana ike mo niinge nge Liꞌoa a God e niiꞌi mei, aana iinoni urine kei loꞌongaꞌinie mo niinge ngeena nga mo ola oto mola mwaakule ni ngeena. E kaꞌa sai lio saiꞌi ike, aana Liꞌoa Maaꞌi mola ni e sai peꞌikie huni lio saiꞌi.

¹⁵ Oto iinoni nge e toꞌo aana Liꞌoa Maaꞌi haꞌalaa e sai lio saie walu ola i sulie a God, na e aasa hunie nga iini e kaꞌa toꞌo aana Liꞌoa Maaꞌi hunie kei iꞌie sai-olanga a mwane ngeena.

¹⁶ Na e toꞌohuu oto aana Uusu-uusu Maaꞌi e unue uuri, ?A tei ni e manataꞌinie mo neꞌisaenga i manatana Aalaha hunie ke haꞌa-uusulie loꞌu? Aesaea 40:13 Taꞌe ikie, kie saie a God aana kie toꞌo aana mo neꞌisaenga a Kraes.