1 Korinit 15 - Tataroha Diana

A Jisas Kraes E Taꞌelaꞌi Toꞌohuu

¹ Maeni eesiku maaꞌi, no ko sare haꞌa-aamasitoꞌoꞌomu loꞌu mola aana Tataroha Diana nge nou laeliwala kaꞌu oto namiu aana, nge omu hele aana oto, na hiiwalaimolinge iꞌomu e susu oto i lengine.

² Tataroha Diana ngeena haꞌa-uurilemiu ko lae oto aana, mala uri omu ko hele susuleꞌi oto aana mala nou laeliwala namiu aana, na omu kaꞌa neꞌisae rue-ruaꞌa loꞌu aana.

³ Aana mo eehuꞌi ola niilana e holaꞌi lae hunieu, oto nou haꞌarongoꞌomu eeni. A Kraes e mae honotana mo oorahaꞌaanga ikie, oto mala uusulana e lae i laona mo Uusu-uusu Maaꞌi.

⁴ Na haitolingeꞌinilana e lae, na a God e taꞌe aalihoꞌi loꞌu aana mwaanie maenga aana oolune nga hai dinge, mala uusulana e lae i laona mo Uusu-uusu Maaꞌi.

⁵ Na e haataꞌi aana a Pita na loꞌu hunie ahutana aawalai hurulaꞌaa mwana rue.

⁶ Oto e heꞌi haataꞌi loꞌu i puri aana mo iini hunge. Ngaeta maholo e haataꞌi aana e liue e lime tangalai iinoni nge kire lulu i sulie, na kire mani leesie. Mo iini hunge aana mwalana kire mauri taane ue siꞌiri, maꞌalana uri nga mo iini e mae taane oto.

⁷ Oto e heꞌi haataꞌi loꞌu aana a Jemes, na loꞌu i puri hunie ahutana mo hurulaꞌaa.

^8-9 Oto i purine mo haataꞌinge ngeena e mango, nge ko si haataꞌi ooreta hunieu, maꞌalana nou kaꞌa malisine ke haataꞌi hunieu. Mala mwela e kaꞌa hute aana pongine aana tala nikana e kaꞌa loꞌongaꞌinie, ineu noꞌone nou hute haalu aana tala aaopa mwala e kaꞌa loꞌongaꞌinie. Ineu oto nou lai mwei-mwei liutaa aana mo hurulaꞌaa, aena aana nou teungeꞌinie kaꞌu soihaadaꞌinge a God. Oto nou kaꞌa malisine ike uri kire ke saieu aana nga hurulaꞌaa.

¹⁰ Taꞌe aana niinge ni hahuꞌana manata-diananga a God e lae hunieu mone, no ko oꞌoꞌo urine ue ie. Na manata-diananga a God hunieu e kaꞌa waetaꞌi ike taane mola mwaakule, aana nou lae peꞌi esu oto hiitoꞌo loꞌu liutaa aada mo hurulaꞌaa. Taꞌe nou kaꞌa asuie ike taane tohuku, aana niinge a God mone ko peꞌieu huni esuie leune urine.

¹¹ Na maꞌalana uri ineu ne ke asuie loꞌu urine wa mo hurulaꞌaa ke asuie, taꞌe e sada mola. Ahutameelu, melu ko meni tarohaꞌinie mola taꞌa-taꞌa Tataroha Diana, na iini ngeena omu hiiwalaimoli oto aana.

Mo Iini Kie Ko Lulu I Sulie A Jisas Kie Kei Taꞌelaꞌi Toꞌohuu Noꞌone

¹² ?Oto mala laeliwalanga ko lae tarau aana uri a God e taꞌe aalihoꞌi aana a Kraes mwaanie maenga, e ue ni ngaeta mo iini hikemiu ko heꞌi unu-unue loꞌu uri mo iini e mae oto kire saꞌa heꞌi taꞌelaꞌi loꞌu?

¹³ Mala uri mo iini e mae oto kire saꞌa heꞌi taꞌelaꞌi loꞌu, na nge a Kraes e kaꞌa taꞌelaꞌi ike oto mwaanie maenga eena.

¹⁴ Na mala uri a Kraes e kaꞌa taꞌelaꞌi oto mwaanie maenga, nge nga mei ola hunie melu ke laeliwala aana haꞌike oto, na iꞌomu nga mei ola hunie omu ke hiiwalaimoli aana haꞌike oto noꞌone.

¹⁵ Na leune e aaela oto liutaa aana e si haataꞌinie oto uri melu ko eerotaꞌinie mola a God, aana melu ko unue uri e taꞌe aalihoꞌi aana a Kraes mwaanie maenga. Aena aana e tohungei aasa hunie a God kei taꞌe aalihoꞌi loꞌu aana a Kraes, mala uri ko toꞌohuu mo iini nge kire mae oto kire saꞌa taꞌelaꞌi loꞌu.

¹⁶ Iau, mala uri mo iini e mae oto kire saꞌa heꞌi taꞌelaꞌi loꞌu, nge a God e kaꞌa taꞌea ike noꞌone a Kraes mwaanie maenga.

¹⁷ Na mala uri a God e kaꞌa taꞌea ike a Kraes mwaanie maenga, nge hiiwalaimolinge iꞌomu aana e saꞌa tarie ike nga mei ola namiu, na omu iiꞌo mola ue i mamalutana oorahaꞌaa.

¹⁸ Na loꞌu mo iini e hiiwalaimoli nge kire mae oto, kire mani eiꞌaa oto.

¹⁹ Mala uri ko toꞌohuu aana kie sai norutoꞌo mola aana a Kraes huni peꞌikie mola aana mauringe aana walumalau ie, nge kie kei tohungei siꞌohaꞌa oto. Na siꞌohaꞌanga oto paine loꞌu liutaa aana taꞌena nga siꞌohaꞌanga ni ngeena.

²⁰ !Taꞌe haꞌike! Walaimolinge oto uri a Kraes e taꞌelaꞌi mwaanie maenga mala nga haiholotaꞌinge uri hungelana mo iini e mae oto kire kei haro taꞌelaꞌi loꞌu noꞌone hunie mauringe huu.

²¹ Aana tala ni maenga, taꞌa-taꞌa iinoni mola e toolea mai. Oto e urine noꞌone loꞌu aana tala hunie taꞌelaꞌinge e si lae mai mola i tehulaꞌana e taꞌa-taꞌa iinoni.

²² Oto mala ahutana iinoni ko mae-mae aena aana iiꞌonga ikire e urihana a Adam, e urine loꞌu noꞌone hunikie mo iini kie ko iiꞌo-iiꞌo mala a Kraes, aena aana ikie, kie kei taꞌelaꞌi noꞌone i tehulaꞌana a Kraes.

²³ Taꞌe nga iini ni e lae-lae oto i sulie maholo ingeie. A Kraes oto e holaꞌi taꞌelaꞌi mwaanie maenga, na maholo kei ooli loꞌu mei, nge ikie mwala ingeie kie ke si taꞌelaꞌi loꞌu.

²⁴ Oto purihaꞌana haꞌalaa nge haꞌamangolana walumalau kei hite, maholo a Kraes kei haꞌamangoa ahutana mo aalahanga aaopa, na mo inemauri aaopa, na mo nanamanga aaopa. Mango urine, nge a Kraes ke si toliꞌaasie Aalahanga hunie a God Mamaꞌa.

²⁵ Aana a Kraes kei haro aalaha kaꞌu peꞌi hele tolingie mo maelonga ingeie, lai hule aana ahutada mango-mango kire kei iiꞌo oto i hahana nanamanga ingeie.

²⁶ Na maenga oto maelonga ooreta huni seu aasie.

²⁷ Aana mo Uusu-uusu Maaꞌi e unue hunie a God uuri, O neꞌie ahutana walu ola i hahana nanamanga ingeie. Sam 8:6 Taꞌe a God maraana haꞌike taane i hahana nanamanga ingeie, aena aana ingeie mola nge e neꞌie walu ola i mamalutana a Kraes.

²⁸ Oto maholo ahutana walu ola kire kei iiꞌo oto i hahana nanamanga a Kalena God, nge ingeie ke si neꞌie maraana i hahana nanamanga a God, iini nge e niie nanamanga hunie haahie ahutana walu ola. Na aana tala ngeena, taꞌe a God mola nge kei toꞌo aana nanamanga haahie walutana nga ola.

²⁹ Loꞌongaꞌi keꞌu i sulie mo iini nge kire ko loto maaꞌi oolitana mo iini kire mae oto. Kire hiiwalaimoli takalo uri mo iini kire loto maaꞌi oolitada urine kei lae noꞌone taꞌau i Lengi. Maꞌalana kire hiiwalaimoli takalo urine, taꞌe aana ngaeta tala kire liuꞌomu mola aana kire kaꞌa neꞌisae rue-ruaꞌa ike i sulie taꞌelaꞌinge mwaanie maenga.

³⁰ ?Na mala uri mo iini kire mae oto saꞌa taꞌelaꞌi ike loꞌu, oto e ue kaꞌu melu ko si iiꞌo ni deu-aakaunge oto mola tarau loosie mo ola nge kire sai horoꞌiꞌemeelu?

³¹ Maeni eesiku, ineu nou iiꞌo ni maenga oto mola i suli dinge eena. !E toꞌohuu oto! E toꞌohuu oto mala mei wala nou unue kaꞌu aana nou toohaꞌiniꞌomu haahie iiꞌo-rurunge ikie peꞌie a Kraes Jisas, Aalaha ikie.

³² Iau, ineu nou ooho kaꞌu oto peꞌie mo iinoni aaela mai Epesas, nge kire aaela liutaa urihana mo ola loo-looꞌa ni meꞌesu. ?Taꞌe mala uri ne ke ooho peꞌire urine i sulie loꞌongaꞌinge ni iinoni mola, haꞌalaa nga taa ni ne kei terie aana? !Nga taꞌa-taꞌa mei ola diana na haꞌike loꞌu! Mala uri mo iini e mae oto kire saꞌa heꞌi meuri loꞌu, nge ne ke neꞌisae mola i sulieu maraaku mala mei neꞌisaenga nge nga mo iini ko unu-unue uuri, Kolu ke ngau-ngeu mola na kolu ke inu-inu, aana kolu kei mae oto i hoꞌowa. Aesaea 22:13

³³ Maeni eesiku, mwaanie mwala urine e eero-eeroꞌomu. Aamasitoꞌo kaꞌu aana mei neꞌisaenga uuri, “Hikusilana mo iinoni aaela e sai waelie tolaha diana iꞌomu.”

³⁴ Oto omu ke loꞌo-loꞌongaꞌi diana loꞌu, na mwaanie omu heꞌi oora-oorahaꞌaala loꞌu. No ko tola tahangaꞌinie leune huni haꞌamasaꞌomu uri nga mo iini eemiu kire kaꞌa saie ike ue a God.

?Mei Sape Uri Taa Kei Taꞌelaꞌi?

³⁵ Saꞌa mola nga mo iini kei dolosi uuri, “?Uri mo iini e mae oto kire kei taꞌelaꞌi loꞌu uri taa? ?Nga mei sape uri taa loꞌu ni kire kei toꞌo aana?”

³⁶ !Mala nga dolosinge ko lae urine, na dolosinge mweꞌu-mweꞌule mola ni ngeena! Loꞌongaꞌi keꞌu i sulie mo litei ola o ko hesiꞌi. O ko eli talana, o ko konie i laona kalinge, o ko aanomie, nge purihaꞌana litei ola ke si pwito haalu. Ngeena e kele urihana noꞌone haitolingeꞌinilana sape.

³⁷ Na nga taa nge o ko hesie ngeena, litei ola mola ue mwaakule ni ngeena. Ohe nga litei kooni wa nga litei ola aaopa taane, taꞌe nga tohungei sapei ei toꞌohuu haꞌike ue aana.

³⁸ Taꞌe i puri, nge a God ke si niie hunie litei ola ngeena sapei ola mala e saetoꞌo aana mo litei ola urine ke toꞌo aana. Na a God e oalaꞌi hunie taꞌena nga litei ola hai aaopaꞌi kire ke pwito hunie ai nge e malisine litei ola ngeena.

³⁹ Na taꞌena nga sapei ola kire kaꞌa mani sada ike. Sapena iinoni e aaopa oto, na sapena mo ola mauri mala mo poo e aaopa oto, na sapena mo menu e aaopa oto, na sapena mo iiꞌe e aaopa loꞌu.

⁴⁰ Mo ola taꞌau i Lengi kire aaopa oto mwaanie mo iini mei aano. Na manikuluhaꞌani e hai aaopaꞌi oto noꞌone. Manikuluhaꞌana mo iini taꞌau i Lengi e aaopa oto mwaanie manikuluhaꞌana mo iini mei aano.

⁴¹ Manikuluhaꞌana sato e aaopa, na manikuluhaꞌana waro-waro e aaopa loꞌu, na manikuluhaꞌana mo heeꞌu e aaopa. Na maꞌalana mo heeꞌu na ngaeta mo ho heeꞌu kire haro manikuluꞌe aaopa loꞌu mwaanie ngaeta mo iini.

⁴² Oto kei urine noꞌone aana maholo a God kei taꞌe aalihoꞌi aana mo iini e mae oto. Mei sape nge kie ko heitolingeꞌinie e saꞌa tewa na ko kesu oto. Taꞌe mei sape nge ko taꞌelaꞌi eelihoꞌi loꞌu, nge ke iiꞌo huu oto.

⁴³ Mei sape nge kie ko heitolingeꞌinie, e lio aaela mola. Taꞌe mei sape nge ko taꞌelaꞌi eelihoꞌi loꞌu, e lae wai lio manikuluꞌe. Mei sape nge kie ko heitolingeꞌinie, e mamaelaꞌa mola. Taꞌe mei sape nge ko taꞌelaꞌi eelihoꞌi loꞌu, e tohungei aꞌailaꞌa oto hiitoꞌo.

⁴⁴ Mei sape nge kie ko heitolingeꞌinie, mei ola ni welumalau mola. Taꞌe mei sape nge ko taꞌelaꞌi eelihoꞌi loꞌu, nge mei sape ni Lengi otona. Oto mala kie toꞌo aana mei sape ni welumalau, mei sape ni Lengi e malisine ke iiꞌo noꞌone.

⁴⁵ Loꞌongaꞌi keꞌu i sulie Uusu-uusu Maaꞌi nge e unue uuri, A God e haꞌaholaa a Adam hunie ke neꞌie eetana nga iinoni, mango e si niie mauringe hunie. Jenesis 2:7 Oto a Jisas e urihana a Adam noꞌone aana e neꞌie eetana nga iinoni aana haꞌaholanga haalu, taꞌe e aaopa mwaanie a Adam aana ingeie oto liꞌoa e sai niie mauringe hunie iinoni.

⁴⁶ Oto mala asuilana sape e lae i naꞌo nge e si meuri, nge mei sape ni Lengi e kaꞌa holaꞌi lae ike mai, taꞌe iini ni welumalau ni e holaꞌi lae mai. Purihaꞌana nge iini ni Lengi e si lae mai.

^47-48 Eetana nga Adam ngeena, a God e haꞌaholaa mai i aano i leu mwaanie mwakano, na ahutaka mo iinoni kie toꞌo aana mei sape mala iini nge e uure mwaanie mwakano ngeena. Taꞌe ruana nga Adam ngeena e uure mwaanie taꞌau i Lengi, na maholo ie kie sai neꞌie mo iinoni i Lengi mala ingeie.

⁴⁹ Oto mala kie toꞌoni haahikie aana mei sape ni welumalau mala iini nge haꞌaholalana e lae mwaanie mwakano, nge kie kei toꞌoni urine loꞌu haahikie aana mei sape ni Lengi mala iini e uure mai Lengi ngeena.

⁵⁰ Iau, maeni eesiku maaꞌi, no ko sare haataꞌinie mola aamiu uri mei sape ni hesiꞌo na apu, kirerue saꞌa roroꞌa ni hele aana ike Aalahanga a God. Taungei sape urine nge e sai kesu mola, na e saꞌa tohungei hele aana ike maurihe huu.

^51-52 Taꞌe no ko sare haꞌarongoꞌomu noꞌone aana kele mei ola e iiꞌo mumuni uuri. Ahutaka kie saꞌa mani mae ike, taꞌe maholo aahuri kei ngara, kie kei meni tolana hai-oolisi maꞌaruteꞌimaa oto mola. Na maholo aahuri kei ngara ngeena, a God kei taꞌe aalihoꞌi oto aana mo iini e mae hunie maurihe huu. Na ikie mo iini kie mauri ue aana maholona, kie kei meni hei-oolisi oto noꞌone.

⁵³ Aana nga taa nge e sai kesu mola, kei hei-oolisi oto hunie leu kei iiꞌo huu. Na nga taa e sai mae, kei hei-oolisi oto hunie leu kei iiꞌo huu na e saꞌa heꞌi mae loꞌu.

⁵⁴ Na aana maholo leune kei reu mango, nge mo wala i laona Uusu-uusu Maaꞌi kei oa oto aana e teꞌuri, Aꞌailaꞌanga a God e horoꞌie oto maenga. Aesaea 25:8

⁵⁵ ?Oto iꞌoe, Maenga, nge i tei aꞌailaꞌanga iꞌoe? ?Na Maenga, nge i tei nanamanga iꞌoe huni waelie mwala? Hosea 13:14

⁵⁶ Oorahaꞌaa kaꞌu mola e niie nanamanga huni waelie mwala hunie maenga. Na Haꞌatolanga a Mosis mola e niie nanamanga hunie oorahaꞌaa.

⁵⁷ Taꞌe kie ke paalahea God haahie ko haꞌa-aꞌailaꞌakie huni tola hehesie maenga i tehulaꞌana Aalaha ikie a Jisas Kraes.

⁵⁸ Aena urinena, maeni eesiku maaꞌi, omu ke uure maꞌutaꞌa mola na omu ke suꞌuri esu oolo-oolo. Omu ke asu susuleꞌi mola nana Aalaha ikie. Aana omu saie oto uri nga taꞌa-taꞌa mei ola omu ko euꞌesuie nana Aalaha, e saꞌa mango ike mola mwaakule.