1 Korinit 14 - Tataroha Diana

Unu Tahangaꞌinilana Walana God E Diana Liutaa Aana Niinge Aana Mo Erenga Hai Aaopaꞌi

¹ Oto omu ke lulu i sulie mola manata-diananga, na omu ke hari hunie oto toꞌohuu mo niinge ni Liꞌoa, oto liutaa niinge aani unu tahangaꞌinilana walana God.

² Aana taꞌena nga iini nge ko ere-ere aani erenga hai aaopaꞌi, e kaꞌa ere-ere ike hunie mo iinoni, taꞌe ko ere-ere mola hunie a God. Saꞌa mola ko ere-ere taane aana nanamanga ni Liꞌoa, taꞌe neꞌisaenga aana nga taa ko unue e iiꞌo mumuni mola.

³ Taꞌe iini nge ko unu tahangaꞌinie walana God ko ere nana mo iinoni, na ko ere haꞌadodoa saeda na ko haꞌasusue hiiwalaimolinge ikire hunie ke aꞌailaꞌa.

⁴ Iini ko ere-ere aana mo erenga hai aaopaꞌi ko ere haꞌasusue mola hiiwalaimolinge ingeie maraana ni ngeena. Taꞌe iini nge ko unu tahangaꞌinie walana God e sai peꞌie hiiwalaimolinge aana ahutana soihaadaꞌinge.

⁵ Saeku uri ahutemiu omu ke mani ere-ere aani erenga hai aaopaꞌi, taꞌe oto liutaa nou saetoꞌo aana uri omu ke toꞌo aana niinge huni unu tahangaꞌinie walana God. Aana iini ko unu tahangaꞌinie walana God ko esuie mei ola e hiꞌe liutaa aana loꞌu iini ko ere mola aani erenga hai aaopaꞌi. Aana iini ko ere aana mo erenga hai aaopaꞌi e sai peꞌie taane ahutana soihaadaꞌinge mala uri nga iini e iiꞌo huni ere luhesie walana, taꞌe mala haꞌike, nge nga kele peꞌinge hunie soihaadaꞌinge na haꞌike loꞌu.

⁶ ?Oto maeni eesiku maaꞌi, mala uri no ko lae mai seemiu na no ko talei ere-ere mola peꞌiꞌomu aani erenga hai aaopaꞌi, uri no ko peꞌiꞌomu taane ni urine? !Haꞌike oto ooꞌoo! Taꞌe mwaanie uri no ko toolea oto mai nga mo haataꞌinge uure mwaanie a God, wa nga mo saenanaunge, wa walana God, wa nga mo haꞌa-uusulinge loꞌu, haꞌalaa no ko peꞌiꞌomu.

⁷ E urine noꞌone aana mo ola e kaꞌa mauri ike taꞌe kire toꞌo aawa-aawatani mala au na pasi aawa. ?Mala uri nga iini kei talei uuhi taꞌewau oto mola aana, kie ke si rongo saie kana ko uuhie uri taa eena?

⁸ ?Na mala uri nga iini kei talei uuhi taꞌewau oto mola aana aahuri, mwala ke si deu aakau hunie asunge uri taa?

⁹ Oto iꞌomu na e urine noꞌone mola. ?Mala uri erenga iꞌomu e kaꞌa matapwa diana, mwala ke si saie nga taa omu ko ere i sulie uri taa? Walamiu kei lae waetaꞌi oto mola.

¹⁰ Saꞌa mola hungelana mo erenga hai aaopaꞌi kire iiꞌo taane i laona walumalau, na kire mani toꞌo loꞌongaꞌinge taane aani.

¹¹ Taꞌe mala uri nga iini kei ere peꞌieu aana erenga nou kaꞌa saie, nge nga diananga haꞌike aana. Mere kei lee-leesiꞌemereꞌi mola mala iꞌemereꞌi e ro iinoni aana e ro mala-malau hai aaopaꞌi.

¹² Iꞌomu na e urine noꞌone mola. Mala omu ko heri hunie mo niinge ni Liꞌoa Maaꞌi oto toꞌohuu, nge omu ke loꞌohie nga taa kei peꞌie oto ahutana soihaadaꞌinge hunie ke aꞌailaꞌa.

¹³ Aena urinena, iini ko toꞌo aana niinge ni Liꞌoa Maaꞌi huni ere aani erenga hai aaopaꞌi ke aitanaie a God hunie ke niie noꞌone nanamanga huni ere luhesie nga taa ko unuena.

¹⁴ Ineu noꞌone, maholo no ko aarengaꞌi aana mo erenga hai aaopaꞌi urine, manataku ko aarengaꞌi taane i sulie hari-huninge a Liꞌoa Maaꞌi, taꞌe nou kaꞌa loꞌongaꞌi ike i sulie aarengaꞌinge ngeena.

¹⁵ ?Ko urine, nga taa nge ne kei da? Ne kei aarea God aana erenga ni Liꞌoa, na ne kei aarea noꞌone aana erenga ineu maraaku. Na loꞌu ne kei kana ni lahea God aana erenga ni Liꞌoa, na noꞌone aana erenga ineu maraaku.

¹⁶ ?Oto maholo omu ko unue paalahenga hunie a God mola aana erenga ni Liꞌoa, kei uri taa hunie mo iini nge kire kaꞌa rongo saie nga taa omu ko unue ngeena? ?Uri kire sai paalahea God peꞌiꞌomu, na kire kaꞌa saie nga taa omu ko paalahea God haahie?

¹⁷ Oto maꞌalana uri aarengaꞌinge iꞌomu aani paalahenga hunie a God e lae diana taane, taꞌe e kaꞌa peꞌie ike mo iini ngeena.

¹⁸ No ko paalahea God aana nou sai ere aana mo erenga hai aaopaꞌi liutaa aana taꞌena nga iini eemiu.

¹⁹ Taꞌe maꞌalana e urine, maholo no ko loko peꞌie mwala aana maholo ni palonga, saeku uri ne ke haꞌasaire aana nga lime aata mei wala nge kire sai rongo saiꞌi, liutaa aana ne kei unue mola mo sinolai mei wala aani erenga hai aaopaꞌi nge kire saꞌa rongo saiꞌi.

²⁰ Maeni eesiku, omu ke suꞌuri deu mala mwela aana loꞌongaꞌinge iꞌomu. Kei lae otoi diana liutaa taane hunie omu ke neꞌi mwela aani esuilana tataꞌalanga, taꞌe aana loꞌongaꞌinge, omu ke neꞌi rato oto.

²¹ I laona mo Uusu-uusu Maaꞌi a Aalaha e unue uuri, Ne kei ere nana mwala ineu ie aana mo iini nge kire saie mo erenga hai aaopaꞌi. Iau, ne kei ere aana ngidune mwala aaopa, taꞌe aana e urine kaꞌu na kire saꞌa sare rongo ike hunie nga taa no ko unue. Aesaea 28:11-12

^22-24 Oto i leune kie sai leesie uri taungei niinge ngeena huni ere-ere aana mo erenga hai aaopaꞌi nga tolimaa ni ngeena hunie mo iini kire kaꞌa hiiwalaimoli ike, uri kire iiꞌo ue i sinaha mwaanie a God. Taꞌe maꞌalana e urine, hungelada saꞌa hiiwalaimoli ike. Mala uri ahutana mo iini aana soihaadaꞌinge ko meni loko na ahutemiu omu ko meni ere aani erenga hai aaopaꞌi, na uri ngaeta mo iini e kaꞌa toꞌo aana niinge ngeena wa hule aana ngaeta mwane ni puꞌo ko sili mei, nge kire ke unue mola uri kire leesie ngaeta tolimaa nge ko haataꞌinie uri omu ko hero-hero oto toꞌohuu. Oto taungei niinge ngeena huni unu tahangaꞌinie walana God, nge nga tolimaa mo iini e hiiwalaimoli kire tohungei melisine, taꞌe mo iini kire kaꞌa hiiwalaimoli haꞌike ue. Aena aana mala uri mo iini e kaꞌa toꞌo aana niinge ngeena wa hule aana ngaeta mwane ni puꞌo ko sili mei na ahutana mwala omu ko meni unu tahangaꞌinie walana God, nge mo wala omu ko unuꞌi ngeena kire ke si da mwala ngeena ke lio saie mo takalonga ikire. Oto kire kei loꞌongaꞌi i sulie nga taa kire ko rongoa,

²⁵ oto hule aana mo loꞌongaꞌinge mumuni ikire na kei maau oto i sinaha. Oto kire kei pouruuru oto i aano i naꞌona a God na kire kei houleꞌinie oto uuri, “!Toꞌohuu, a God oto peꞌiꞌomu i leu!”

Rihungeꞌinge Ke Lae I Sulie Haꞌa-alaaꞌinge Aana Mwaanie Mwala E Taipuꞌo-puꞌo

²⁶ Maeni eesiku maaꞌi, nga taa nou loꞌongaꞌinie mola uuri. Maholo omu ko ruru mei hunie aarengaꞌinge omu ke mani peꞌi. Nga iini e sai kana, na ngaeta iini e sai haꞌa-uusuli aana nga mo ola, na ngaeta iini e sai ladoa nga taa a God e haataꞌinie aana, na ngaeta iini e sai ere aana mo taungei erenga hai aaopaꞌi, na ngaeta iini e sai ere luhesie loꞌongaꞌinge aana mo erenga ngeena. Ahutana walu ola ngeena ke rau oto urine huni haꞌasusue hiiwalaimolinge ikie.

²⁷ Maholo erenga kei lae aana mo erenga hai aaopaꞌi, nga ro iinoni mola wa e oolu ni kire kei esuie. Taꞌe kire saꞌa mani ere ike aana taꞌa-taꞌa maholo. Na nga iini kei haro ere luhesie oto nga taa nge kire ko ere i sulie.

²⁸ Taꞌe mala uri nga iini huni ere luhesie mo loꞌongaꞌinge aana mo erenga hai aaopaꞌi ngeena haꞌike, nge iini ko ere-ere ngeena ke iiꞌo mwa-mwanoto mola. Na ke unu tahangaꞌinie mola nana maraana na hunie a God mola ke rongoa.

²⁹ Na huni houleꞌinie walana God, nga ro iini mola wa e oolu ni kire sai esuie, na omu ke mani pwaarongo hunie nga taa kire ko unue peꞌi neꞌisaenga diana i sulie.

³⁰ Na mala uri a God ko niie mai nga mei wala hunie nga iini aaopa nge ko iiꞌo peꞌire i leune, nge iini ko ere-ere ngeena ke rohu keꞌu.

³¹ Ke lae mola urine hunie ahutana mo iini kire sare houleꞌinie walana God kire sai ere, nga iini ke ere aana nga maholo, hunie omu ke mani rongo saie mo haꞌa-uusulinge na hunie hiiwalaimolinge iꞌomu ke aꞌailaꞌa loꞌu.

³² E sai lae mola urine aena aana Liꞌoa nge ko peꞌie mwala huni unu tahangaꞌinie walana God, ko toliꞌaasie noꞌone hunire uri ikire oto kire ke lio i sulie maholo huni unue walana God ngeena.

³³ Aena aana a God e kaꞌa saetoꞌo aana ike uri kie ke talei deu taꞌewau mola aana mo ola aana soihaadaꞌinge, taꞌe e saetoꞌo aana uri kie ke mani iiꞌo hata-hata mola ni henuelama. Oto mala i sulie tolahana ahutana mo soihaadaꞌinge,

^34-35 maholo omu ko loko huni aarengaꞌi, mwaanie mo keni kire talei ere-ere taꞌewau mola. Mala uri kire ko sare saie nga mei ola, nge kire ke si dolosie mola aana mo poro ikire aana kire kei ooli mei nume. Aana e tohungei lio aaela hunie keni ke lai ere i laona lokonga urine. Oto mala mo Haꞌatolanga a Mosis e unue, mo keni ke suꞌuri ere-ere na kire ke suꞌuri neꞌi iinoni peine loꞌu.

³⁶ ?Wa ohe uri walana God e aehota uure mai mwaaniꞌomu? ?Wa ohe taꞌe iꞌomu ni mola e lae mai huniꞌomu?

³⁷ Mala uri nga iini ko loꞌongaꞌinie uri ingeie oto hurulaꞌaa a God, wa e toꞌo aana nga niinge ni Liꞌoa, nge ke sai diana aana uri mo ola no ko uusuꞌi huniꞌomu ienini walana Aalaha ni otona.

³⁸ Taꞌe mala uri e kaꞌa sare rongo hunie mo wala ienini, iꞌomu noꞌone omu ke suꞌuri rongo hunie nga taa ko unu-unue.

³⁹ Aena urinena maeni eesiku maaꞌi, omu ke hahuꞌei heri hunie oto toꞌohuu nanamanga ngeena huni unu tahangaꞌinie walana God, na omu ke suꞌuri uure honosie mo iini e toꞌo aana nanamanga huni ere aana mo erenga hai aaopaꞌi.

⁴⁰ Taꞌe ahutana walu ola asuileni ke lae diana na i sulie tala aani.