1 Korinit 13 - Tataroha Diana

Manata-diananga E Hahuꞌei Diana Oto Liutaa

¹ Maꞌalana uri ne ke talei ere-ere loꞌu aani erenga hai aaopaꞌi mo iinoni na aana erenga mo ensel, taꞌe manata-diananga e kaꞌa iiꞌo aaku, erenga ineu e urihana mola aahuri ko eꞌengo wa pelo ko ngara-ngara.

² Na maꞌalana nou sai unu tahangaꞌinie walana a God, wa maꞌalana ne ke saenanau loꞌu aana taꞌena nga ola mumuni, wa maꞌalana uri hiiwalaimolinge ineu ke susu huni lidue mo toloi henue, taꞌe nou kaꞌa toꞌo aana manata-diananga, ineu iinoni mwaakule mola ni ngeena.

³ Maꞌalana uri ne ke nii mangoa loꞌu toꞌo-toꞌolaku huni peꞌie kira maitale, wa maꞌalana uri no ke toliꞌaasie loꞌu sapeku hunie mo maelonga ke aasieu i laona dunge, taꞌe manata-diananga e kaꞌa iiꞌo oto aaku, nge nou saꞌa tarie ike oto nga mei ola aani.

⁴ Iinoni e manata diana hunie mwala e toli rako na ko esuie mei sae malumu hunie iinoni. E aasa kei heotaꞌi, wa kei toohaꞌi, wa ke ere paine i sulie maraana.

⁵ Manata-diananga e kaꞌa ola ike huni haꞌamasaa ngaeta iinoni, wa huni loꞌongaꞌinie maraana, wa huni loohaꞌi roroꞌanga, wa huni saewasu oto mola lau-leu.

⁶ Manata-diananga e kaꞌa sae-saediana ike haahie aaelanga, taꞌe ko sae-saediana tararuru peꞌie walaimolinge.

⁷ Iinoni e manata diana hunie mwala e sai lae taraꞌasi mola maꞌalana nga taa ko reu. Kei hiiwalaimoli, na kei maaꞌoohi susutoꞌo, na kei esu susuleꞌi oto mola.

⁸ Manata-diananga e saꞌa suu ike oto ooꞌoo. Taꞌe mala mo niinge aani unu tahangaꞌinilana walana a God, mo ola kei haro eiꞌaa mola. Maꞌalana mo niinge ni erenga aani wala hai aaopaꞌi, mo ola kei haro mango mola. Maꞌalana mo niinge ni saenanaunge i sulie nga mei taa, taꞌe kire kei haro mango noꞌone mola.

⁹ Aena aana ahutana mo niinge kie toolea mwaanie Liꞌoa Maaꞌi ngeena, kire mani hesiapa mola. Maꞌalana niinge ni saenanaunge wa niinge huni unu tahangaꞌinie walana God, taꞌe kire urihana mola mei ola e kaꞌa ahu ike.

¹⁰ Oto maholo mei ola e ahu kei lae mai, nga taa nge e hasiapa ngeena kei eiꞌaa oto.

¹¹ Maholo nou neꞌi mwela ue, erenga ineu na sai-olanga ineu na loꞌongaꞌinge ineu e urihana mola kele mwela mwai-mwei. Taꞌe maholo nou neꞌi rato oto ie, nou kaꞌa urihana ike loꞌu kele mwela.

¹² Maholo ienini, saenanaunge ikie aana a God e kaꞌa tohungei peine ike. E urihana mola kie ko lio-lio waranunuꞌe aana, mala iiro-iiro e wasa-wasaaꞌa. Taꞌe aana nga maholo, kie ke si lio saie taane ahutana walu ola oto mola aana maaka maraaka. Aana maholona nge kie ke si saenanau diana aana a God oto mala a God e saenanau aaka.

¹³ Na e oolu mei ola e iiꞌo huu oto ie—hiiwalaimolinge, na maaꞌoohinge susutoꞌo, na manata-diananga. Taꞌe manata-diananga oto naꞌohana e oolu mei ola ngeena.