1 Korinit 12 - Tataroha Diana

Liꞌoa Maaꞌi Ko Niie Nanamanga Hunikie Hunie Kie Ke Peꞌikie Hailiu

¹ Oto maeni eesiku maaꞌi, saeku hunie omu ke sai diana aana walaimolinge i sulie mo niinge ni Liꞌoa Maaꞌi nge omu dolosi keꞌu i suliꞌi.

² Omu saie taane uri maholo omu oꞌoꞌo ni puꞌo ue, kire naꞌomiu huni talei lae-lae mola i sulie mo tala hunge aaela huni palo-paloa mola mo nunui ola nge hule aana kire kaꞌa sai ere ike.

³ Oto aena urine, nge saeku omu ke sai diana aana uri iini nge Liꞌoa Maaꞌi a God ko ere-ere i lalo aana, e saꞌa ere ni hei uesinge ike hunie a Jisas. Na iini nge Liꞌoa Maaꞌi a God e kaꞌa ere-ere ike i lalo aana, e saꞌa roroꞌa ni houleꞌinie ike uuri, “A Jisas ingeie Aalaha.”

⁴ Mo taungei niinge ni Liꞌoa kire hunge na kire mani hei aaopaꞌi, taꞌe taꞌa-taꞌa Liꞌoa mola ni ko niiꞌi.

⁵ Mo esunge kire hunge na kire mani hei aaopaꞌi noꞌone, taꞌe taꞌa-taꞌa Aalaha mola ni kie ko euꞌesu nana ngeena.

⁶ Mo saenanaunge ikie hunie asunge na kire mani hei aaopaꞌi noꞌone, taꞌe taꞌa-taꞌa God mola ni ko niie mo saenanaunge ngeena huni esuie mo taungei esunge hai aaopaꞌi urine.

⁷ Liꞌoa Maaꞌi a God ko haꞌa-adoa ahutaka aana nanamanga ingeie hunie kie ke mani peꞌi-peꞌie ahutana mo iinoni.

⁸ Aana e taꞌa-taꞌa Liꞌoa Maaꞌi ngeena mola ni ko niie nanamanga hunie ngaeta mwala huni unu tahangaꞌinie mo wala ni saenanaunge, na ko niie noꞌone hunie ngaeta mwala tolaha ni sai-olanga.

⁹ Na e taꞌa-taꞌa Liꞌoa Maaꞌi ngeena noꞌone mola nge ko niie hiiwalaimolinge paine hunie ngaeta mwala, na hunie ngaeta mwala loꞌu ko niie nanamanga hunire hunie kire ke haꞌa-uurie taꞌena nga iinoni mwaanie mo maelaa ikire.

¹⁰ Na Liꞌoa Maaꞌi ko niie nanamanga huni esuie mo huꞌi-huꞌite hunie ngaeta mwala, na hunie ngaeta mo iini ko niie hunire nanamanga huni unu tahangaꞌinie walana God. Na hule aana ngaeta mo iini Liꞌoa ko niie nanamanga hunire huni lio saie mo taungei nanamanga hai aaopaꞌi, na huni saie uri kire uure taane mwaanie a God wa haꞌike. Na hunie ngaeta mwala, Liꞌoa Maaꞌi ko niie nanamanga hunire huni ere aana mo taungei erenga hai aaopaꞌi. Na loꞌu hunie ngaeta mwala ko niie nanamanga hunire huni ere luhesie mo taungei erenga urine.

¹¹ Taꞌe e taꞌa-taꞌa Liꞌoa Maaꞌi ngeena mola ko niie ahutana mo niinge ngeena oto i sulie saena maraana, na e mani haꞌa-adokie oto aana mo niinge ingeie.

Ikie Mo Aapai Ola Hunge Aana Taꞌa-taꞌa Mei Sape

¹² Na loꞌu, toꞌomaaie kaꞌu sapena iinoni. E neꞌie taꞌa-taꞌa mei sape mola, taꞌe mo aapai ola hunge aana. Oto e urine noꞌone aana a Kraes. Aana e toꞌo aana taꞌa-taꞌa mei sape mola, taꞌe mo aapai ola hunge aana. Na maꞌalana e toꞌo aana mo aapai ola hunge aana urine, taꞌe e taꞌa-taꞌa mei sape mola ni ngeena.

¹³ Maꞌalana uri kie ke neꞌie loꞌu nga mo Jiu wa haꞌike, wa uri kie neꞌi koni-konihe wa haꞌike, taꞌe a Liꞌoa Maaꞌi e toolekie na e loto maaꞌi aaka hunie kie ke mani lado oto peꞌie a Kraes hunie kie ke neꞌie e taꞌa-taꞌa mei sape. Na a God e niie oto taꞌa-taꞌa Liꞌoa ngeena hunie kie ke mani aꞌailaꞌa aana.

¹⁴ Oto sapena iinoni e kaꞌa toꞌo aana ike mola nga taꞌa-taꞌa aapai ola, taꞌe mo aapai ola hunge nge aana.

¹⁵ Mala uri aeꞌae kei unue uuri, “Ineu mone nga ninime haꞌike, urine nou kaꞌa uure ike aana sape,” maꞌalana e urine, na e lado ue aana sape.

¹⁶ Na mala uri aalinge ke unue uuri, “Ineu mone nga maa haꞌike, urine nou kaꞌa uure ike aana sape,” maꞌalana e urine, na e lado kaꞌu oto aana sape.

¹⁷ ?Mala uri ahutana sape ke mani neꞌi maa mola, haꞌalaa ke si rorongo uri taa eena? ?Wa uri ahutana sape ke mani neꞌi aalinge mola, haꞌalaa ke si no-nonowasu saie walu ola uri taa eena?

¹⁸ Taꞌe e kaꞌa urine ike, aana a God e asuie oto taꞌena nga sasarai ola aana sape hunie ke iiꞌo oto mala saena maraana e hari hunie.

¹⁹ ?Mala uri mo sasarai ola aana sape kire ke mani sada mola, haꞌalaa sape ke si uri taa eena?

²⁰ Taꞌe e kaꞌa urine ike, aana maꞌalana mo sasarai ola e lai hunge urine, taꞌe e taꞌa-taꞌa mei sape mola ni ngeena.

²¹ Oto maa e saꞌa teꞌuri ike hunie ninime, “Nou kaꞌa saetoꞌo aana ike peꞌinge iꞌoe.” Wa uri pwaꞌuu ke unue hunie e ro aeꞌae uuri, “Nou kaꞌa saetoꞌo aamoreꞌi ike loꞌu.”

²² Haꞌike oto ooꞌoo. Mo sasarai ola aana sapeka kie ko loꞌo-loꞌongaꞌinie uri kire kaꞌa aꞌailaꞌa ike, ikire ni oto kie tohungei saetoꞌo aani hiitoꞌo.

²³ Na mo sasarai ola aana sapeka nge kie ko loꞌo-loꞌongaꞌinie uri kire kaꞌa adona ike nga mei ola, ikire oto kie ko tohungei lio i suli diana aani. Na mo sasarai ola nge kie ko mamasa honosiꞌi, ikire oto kie sai toꞌoni diana haahiꞌi.

²⁴ Taꞌe mo sasarai ola nge kie kaꞌa sai masa ike honosiꞌi, nge mo leu urine kie kaꞌa launi haahiꞌi ike aana mo toꞌoni. Aana a God maraana ni e ladoa ahutana mo kele leu hai aaopaꞌi aana sapeka, na e neꞌi tararuru eeni oto i sulie hari-huninge ingeie.

²⁵ Aena urine nge nga mei oopanga haꞌike aana sape, taꞌe ahutana mo sasarai ola hai aaopaꞌi kire ko meni loꞌo-loꞌongaꞌinire hailiu.

²⁶ Mala uri nga taꞌa-taꞌa sasarai ola aana sape ko sapesalu, nge ahutana mo sasarai ola ko meni sapesalu tararuru oto peꞌie. Na mala uri nga taꞌa-taꞌa sasarai ola haꞌamanikuluꞌalana ko lae, nge ahutana mo sasarai ola ko meni ilenimwaꞌe tararuru oto noꞌone peꞌie.

²⁷ Oto e urine noꞌone aana ahutemiu loko-loko oto sapena Kraes, na taꞌena nga iini hikemiu e neꞌi sasarai ola oto aana.

²⁸ Na i laona soihaadaꞌinge, a God e haꞌa-uuresie mwala huni peꞌi-peꞌire hailiu—eetana mo hurulaꞌaa, ruana mo iini ko tarohaꞌinie walana God, na oolune mo haꞌa-uusuli, na ngaeta mo iini nge a God e niie nanamanga hunire huni esuie mo huꞌi-huꞌite, na loꞌu nga mo iini kire sai haꞌa-uurie taꞌena nga iinoni mwaanie mo maelaa ikire, na ngaeta mo iini kire sai peꞌie kira siꞌohaꞌa, na nga mo iini kire saenanau ni lio i sulie taꞌena nga ola, na nga mo iini kire sai ere aana taꞌena nga erenga hai aaopaꞌi.

²⁹ ?Uri ahutaka kie mani neꞌi hurulaꞌaa mango? ?Wa uri ahutaka kie mani toꞌo aana oto nanamanga huni tarohaꞌinie walana God, wa huni haꞌa-uusuli, wa huni esuie mo huꞌi-huꞌite?

³⁰ ?Wa uri ahutaka kie mani toꞌo aana oto nanamanga huni haꞌa-uurie taꞌena nga iinoni mwaanie mo maelaa ikire? ?Wa uri ahutaka kie mani toꞌo aana nanamanga huni ere aana taꞌena nga erenga hai aaopaꞌi, wa huni ere luhesie loꞌongaꞌinge aana mo teungei erenga urine?

³¹ Haꞌike, aana mo teungei niinge ni Liꞌoa kire mani hei aaopaꞌi. E diana liutaa hunie omu ke hari hunie oto toꞌohuu mo niinge e lai peine oto liutaa, taꞌe ne ke si haataꞌinie tohungei tala aamiu nge e diana loꞌu liutaa aana ahutana mo niinge ngeena.