1 Korinit 11 - Tataroha Diana

Mo Mwane Na Mo Keni Ke Mani Iiꞌo Ni Haꞌamaꞌunge Maholo Kire Ko Rihungeꞌi

¹ Oto omu ke lae i sulie tolahaku mala ineu no ko lae i sulie tolahana a Kraes.

² Na no ko laheꞌomu aena omu ko aama-aamasitoꞌo aaku taraureꞌi taane, na omu ko lae-lae i sulie mo haꞌa-uusulinge nge nou niiꞌi huniꞌomu.

³ Taꞌe ngaeta mei ola loꞌu saeku hunie omu ke saie. A God e iiꞌo mala ingeie pwaune a Kraes, na a Kraes e iiꞌo mala ingeie pwaune mwane, na mwane e iiꞌo mala ingeie pwaune keni.

⁴ Oto mwane nge ko aarengaꞌi wa ko unu tahangaꞌinie walana a God na e haꞌa-apaa iihune pwaune, nge ko haꞌamasaa a Kraes.

⁵ Na keni nge ko aarengaꞌi wa ko unu tahangaꞌinie walana a God na iihune e kaꞌa iiꞌo haahie pwaune nge ko haꞌamasaa poro ingeie. Nga taa a keni ngeena e asuie e sada mala keni nge e suhi kokolu aana pwaune.

⁶ Taꞌe e neꞌi ola ni masanga hunie keni ke suhi kokolu aana pwaune wa ke pala oꞌoruꞌe aana iihune. Oto mala uri iihune nga keni e kaꞌa iiꞌo haahie pwaune, nge ke iiꞌo kaꞌu mola urine hunie iihune pwaune ke apa.

⁷ Taꞌe e kaꞌa diana ike hunie mwane ke haꞌa-apaa iihune pwaune, aana mwane ingeie oto nunune a God na manikuluhaꞌana a God. Taꞌe huꞌe nge manikuluhaꞌana poro ingeie.

⁸ Kie saie oto urine aana mwane e kaꞌa lae ike mai mwaanie keni, taꞌe keni nge e lae mai mwaanie mwane.

⁹ Na a God e kaꞌa haꞌaholaa ike mwane aena aana uri e saetoꞌo aana hunie ke peꞌi-peꞌie keni, taꞌe e haꞌaholaa keni aana e saetoꞌo aana uri hunie ke peꞌie mwane.

¹⁰ Oto aena urinena, na i tehulaꞌana mo ensel, nge mo keni kei toꞌo aana nga tolimaa aana nanamanga i pweude.

¹¹ Aana maꞌalana ke urine loꞌu, taꞌe ikie, mo iini kie iiꞌo oto peꞌie a Jisas Aalaha ikie, kie kaꞌa sai uure maraaka ike. Keni kaꞌa sai iiꞌo aahoꞌa ike aana mwane, na mwane kaꞌa sai iiꞌo aahoꞌa ike aana keni.

¹² Aena aana maꞌalana keni haꞌaholalana e lae taane mwaanie sapena mwane, taꞌe ahutana mo mwane ko hute mai welumalau kire ko hute mola aani keni. Na a God oto iini ko esuie ahutaka, mwane na keni, na loꞌu ahutana mo ola.

¹³ Iꞌomu oto maraamiu nge omu ke si loꞌongaꞌi i sulie ohe e diana taane wa haꞌike hunie keni ke aarea God i matolana mwala na e kaꞌa haꞌa-apaa iihune pwaune.

¹⁴ Omu meni saie taane uri mwane ko haꞌa-apaa pwaune e kaꞌa lio diana ike.

¹⁵ Na omu meni saie loꞌu uri keni nge ko haꞌa-apaa pwaune e lio diana liutaa, aena aana a God oto e niie hunire uri iihude ke tewa huni eeluhi haahie pwaude.

¹⁶ Taꞌe mala uri nga mo iini hikemiu ko sare ere haitelili haahie leune, nga taa nou sai unue huniꞌomu mola uuri, iꞌemeelu mo hurulaꞌaa na mo soihaadaꞌinge a God aana mo huilume hai aaopaꞌi melu kaꞌa toꞌo aana ike loꞌu nga tala aaopa huni lae i sulie aani palonga.

Mwaanie O Ngeu Teꞌu-teꞌu Aana Ngau-maaꞌinge

¹⁷ Oto aana mo hatongaꞌinge ineu huniꞌomu ienini, nou kaꞌa laheꞌomu ike, aena aana mo lokonga iꞌomu kaꞌa tohungei peꞌie ike mwala, taꞌe ko waelire mola.

¹⁸ Eetana nga mei ola, nou rongoa uri maholo omu ko loko mala nga soihaadaꞌinge, omu ko oopa-oopa mola, na leune nou hiiwalaimoli uri e kele toꞌohuu kaꞌune.

¹⁹ Saꞌa mola mo oopanga ngeena ko haataꞌi diana aana taane mo iini ko lulu i sulie a God toꞌohuu, na mo iini ko lupweꞌi deu-deu mola.

²⁰ Aana maholo omu ko loko hunie ngau-maaꞌinge a Aalaha, omu kaꞌa tohungei esu diana aana ike i sulie tolahana.

²¹ Maholo omu ko loko, nga iini ni e ngau-ngeu oto mola mala saena, na omu kaꞌa sare maaꞌoohie ike loꞌu ngaeta mo iini. Oto ngaeta mo iini ko ngeu peꞌi inu-inu, hule aana kire ko mehiri oto, taꞌe ngaeta mo iini kire ko hiolo mola.

²² ?Uri omu kaꞌa toꞌo nume ike huni ngeu-ngeu na ni inu-inu aana? ?Wa omu ko sare maaleledie mola soihaadaꞌinge a God na huni haꞌamasaa mola mo iini nge nga mei ngeulaa haꞌike ada? ?Oto nga taa nge omu ko loꞌo-loꞌongaꞌinie uri ne ke unue huniꞌomu? ?Uri ne ke laheꞌomu? !Haꞌike oto ooꞌoo!

²³ Aana mei haꞌa-uusulinge nge nou niie huniꞌomu i sulie ngau-maaꞌinge, nou toolea mwaanie a Aalaha. Oto aana hai rodo nge pwelolana Aalaha ikie a Jisas e lae, e hele aana ho bred,

²⁴ e ere ni paalahenga, ko si nisie, na ko teꞌuri, “Hasiꞌoku oto ienini nge toliꞌaasilana e lae i tehulaꞌamiu. Omu ke teteꞌurine, huni aamasitoꞌonga aaku.”

²⁵ E urine noꞌone loꞌu i purine ngaunge, e hele aana loꞌu kao-kaoi waen, na ko teꞌuri, “Apuku oto ienini nge ko haꞌa-oaie haiholotaꞌinge haalu a God ko esuie peꞌie mo iinoni ingeie. Omu ke teteꞌurine aana taꞌena nga maholo omu ko inuhie huni aamasitoꞌonga aaku.”

²⁶ Oto taꞌe-taꞌena nga maholo omu ko ngaa mei ngeulaa ienini na omu ko inu aana kao-kao ienini, omu ko unu haadaꞌi aana Tataroha Diana uri a Aalaha e mae honotaka ni ngeena, lai hule aana kei ooli loꞌu mei.

²⁷ Aena urinena, taꞌena nga iini ko ngeu teꞌu-teꞌu aana mei ngeulaa a Aalaha wa ko inu teꞌu-teꞌu aana kao-kao ingeie, iini urine ko deu roroꞌanga oto hunie maraana aana e neꞌisae uri maelana a Aalaha nga mei ola mwaakule mola.

²⁸ Aena urine taꞌena nga iinoni ke haro leie iiꞌolana kaꞌu maraana holaꞌinaꞌo, haꞌalaa ke si ngeu aana mei ngeulaa ngeena na ke inu aana kao-kao ngeena.

²⁹ Aana mala uri nga iini ko talei ngeue mola mei ngeulaa ngeena na inu aana kao-kao ngeena, taꞌe e kaꞌa lio saie ike uri leune oto sapena a Aalaha, iinoni ngeena ko esuie mola leinge hunie maraana.

³⁰ Aena urinena kaꞌu mo iini hunge aamiu kire ko maelaaꞌa na kire ko mamaelaꞌa na ngaeta mo iini kire ko mae oto noꞌone.

³¹ Mala uri kie kei holaꞌi lei diana aana kaꞌu tolahaka maraaka, nge a God e saꞌa roroꞌa leikie oto ooꞌoo.

³² Taꞌe maholo a Aalaha ko leikie wa ko haꞌaloikie ko esu urine hunie leilaka ke suꞌuri lae tararuru loꞌu peꞌie leilana mo iinoni ni oorahaꞌaa hunie maenga.

³³ Aena urinena, maeni eesiku maaꞌi, maholo omu ko ruru mei huni ngeu aana ngau-maaꞌinge a Aalaha, omu ke maa-maaꞌoohiꞌomu heiliu.

³⁴ Na mala uri nga iini ko hiolo, nge ke holaꞌi ngeu oto wau i nume ingeie, mwaanie a God e leiꞌomu haahie tolahai ngeunge aaela ngeena aana maholo omu ko meni ngeu tararuru. Na ne ke si haꞌa-oodohie ngaeta mo ola loꞌu aana maholo ne kei lae wau i seemiu.