1 Korinit 10 - Tataroha Diana

Sisihonga Mo Jiu E Haꞌapasulikie Mwaanie Hari-hunilana Mo Ola Ni Welumalau

¹ Maeni eesiku maaꞌi, saeku uri omu ke aamasitoꞌo kaꞌu aana mo weuwaka nge kire lulu i sulie a Mosis wau i naꞌo. Maholo kire iisitaa kaꞌu mwaanie Ijip, ahutada kire mani oꞌoꞌo i mamalutana mei uuru a God e haꞌatolaa mai huni naꞌoda, na kire mani liu holosie Aasi Nonoroꞌa mola aana aeꞌaeda.

² Oto aena aana kire lae i sulie a Mosis i mamalutana mei uuru ngeena maholo kire liu holosie aasi, nge kire lado peꞌie a Mosis eena, mala ikie noꞌone kie lado peꞌie a Kraes aana loto-maaꞌinge.

³ Ahutada mango, kire mani ngeu-ngeu noꞌone aana ngaulaa nge a God e niie ada.

⁴ Na ahutada, kire mani inu-inu noꞌone mala ikie aana wai nge a God e niie ada. Wai ngeena e maau mei mwaanie hau nge a God e niie huni lae-lae peꞌire, na hau ngeena oto a Kraes maraana, aana ingeie oto ni e iiꞌo peꞌire huni haꞌangaue maurihaꞌada.

⁵ Taꞌe maꞌalana e tohungei haꞌadianaꞌaa ahutada kaꞌu urine, tootaꞌi iini aada mola kire toꞌohie saena a God, taꞌe hungelada a God e tatangaꞌinie mola mo rae aada i laona hanuesala.

⁶ Oto walu ola ienini domana uri nga mo haꞌapasunge mola hunikie, mwaanie uri kie talei sae-saehanalie mola mo ola aaela mala kire dau-deuꞌine.

⁷ Oto omu ke rohu mwaanie palolana mo god eero-eero, mala ngaeta mo iini aada e dau-deuꞌi maholo kire paloa nunune puluke nge a Eron e asuie. Aana Uusu-uusu Maaꞌi e unue uuri, Mwala e iiꞌo i aano huni esuie ngauhe, oto kire si taꞌelaꞌi loꞌu huni mao oto mala mo puꞌo. Eksodas 32:6

⁸ Na ikie, kie ke suꞌuri mai-mesi oto mala ngaeta mo iini aada kire masi keꞌu. A God e haꞌaloire na e ro aawalai sinola mwana oolu aada e mae mola i laona taꞌa-taꞌa hai dinge.

⁹ Kie ke suꞌuri haꞌangai-ngeie a Aalaha mala ngaeta mo iini aada e haꞌangai-ngeie kaꞌu, nge a God e uusungeꞌinie mo mwaa huni horo maesire.

¹⁰ Na omu ke suꞌuri upwe-upwesie a God mala ngaeta mo iini aada e upwe-upwesie kaꞌu, na aena leune nge a God e si uusungeꞌinie ensel ni horonga i matolada.

¹¹ Walu ola ienini e rau aada huni haꞌapasulikie mo iini kie ko meu-meuri ue siꞌiri aana mo dinge ooreta. Na uusuleni e lae oto huni haꞌananaukie.

¹² Aena urinena, maeni eesiku, mala nga iini ko unue uri ko uure maꞌutaꞌa oto, nge ke tohungei lio talana oto mwaanie e oorahaꞌaa mala mo weuwaka i naꞌo.

¹³ Ahutana mo malaahonga nge ko hite-hite aamu ngeena, taungei ola oto e sai hite mola aana taꞌena nga iinoni ni ngeena. Taꞌe a God ko deu mola i sulie haiholotaꞌinge ingeie, na e saꞌa tohungei toliꞌaasie ike uri malaahongalamu ke lae liue nga taa o sai uure honosie. Aena urine, maholo malaahongalamu ko lae, nge a God kei haataꞌinie tala huniꞌo mwaanie takalonga ngeena, na kei peꞌiꞌo taane hunie o ke uure aꞌailaꞌa honosie oorahaꞌaa.

Mwaanie O Tarakonie Ngau-maaꞌinge Peꞌie Uunu-olanga I Saana Mo Aakalo

¹⁴ Aena urinena, maeni eesiku maaꞌi, omu ke kinetaꞌiniꞌomu mwaanie palolana mo god eero-eero.

¹⁵ No ko ere peꞌiꞌomu oto mala no ko ere hunie mo iini e saenanau ni ie. Iꞌomu maraamiu omu ke si leie nga taa no ko unue ie.

¹⁶ Kao-kao nge kie ko inu-inu waen aana i laona ngau-maaꞌinge na kie ko paa-paalahea God haahie, maholo kie ko inu aana kao-kao ngeena, kie ko meni ado oto aana apune a Kraes. Na mei ngeulaa nge kie ko nisie, aana maholo kie ko ngeue, kie ko meni ado oto aana sapena Kraes ni ngeena.

¹⁷ Aena aana e taꞌa-taꞌa ho ngeulaa mola, nge maꞌalana kie ke hunge loꞌu uri taa, taꞌe kie neꞌie e taꞌa-taꞌa mei sape mola ni ngeena, aena aana kie ko meni ngeue mola e taꞌa-taꞌa mei ngeulaa ngeena.

¹⁸ Omu ke loꞌongaꞌi keꞌu i sulie mwala ni Israel. Mo iini nge kire ko ngeue nga taa nge niilana e lae hunie a God, kire ko meni ado oto aana uunu-olanga ngeena peꞌie a God eena.

¹⁹ ?Oto e ue? ?Uri no ko unue uri uuraaꞌinge mei ola e tohungei roroꞌa? ?Na uri mo nunui ola ngeena ni oto mo tohungei ola?

²⁰ !Haꞌike! Maholo mo puꞌo kire ko uunu ola, nga taa nge kire ko uunue ngeena, kire ko uunue oto mola i saana mo liꞌoa aaela. Kire kaꞌa uunue ike i saana a God. Oto nou kaꞌa saetoꞌo aana ike uri omu ke ado aana nga mei ola peꞌie mo liꞌoa aaela.

²¹ Omu saꞌa inu ike aana kao-kao a Aalaha na omu saꞌa inu ike noꞌone aana kao-kao mo liꞌoa aaela. Omu saꞌa ngau ike noꞌone peꞌie a Aalaha na omu saꞌa ngau ike noꞌone peꞌie mo liꞌoa aaela.

²² Mala uri omu kei ngeu peꞌie mo liꞌoa aaela urine, omu ko da mola uri a God ke heotaꞌiniꞌomu ni ngeena. ?Uri omu sai uure aꞌailaꞌa mola honosie haꞌaloinge nge a God kei haꞌaloiꞌomu aana?

Kie Ke Loꞌo-loꞌongaꞌinie Noꞌone Ngaeta Mwala, Na Mwaanie Kie Asuie Malaahonga Hunire

²³ Ngaeta mwala ko unu-unue uuri, “Nga mei ola e kaꞌa aapu ike hunieu.” Taꞌe no ko unue uri ngaeta mo ola kire saꞌa da ike nga mei ola diana. Na ngaeta mo ola kire saꞌa peꞌie ike mo iinoni.

²⁴ Oto e kaꞌa diana ike uri hunie kie ke loꞌo-loꞌongaꞌinikie mola maraaka, taꞌe uri kie ke loꞌo-loꞌongaꞌinie nga taa nge e diana huni peꞌie ngaeta mwala.

²⁵ Oto aapa hatarie dolosinge iꞌomu ngeena, e kaꞌa aapu ike na omu sai ngeue mola taꞌena nga mei ngeulaa omu ko lio oodoie i laona uusiꞌe. Na mo taungei ola urine omu ke suꞌuri aapwasu ni dolosie loꞌu uri kire uunuꞌi i saana mo liꞌoa aaela wa haꞌike.

²⁶ Aana oto mala mo Uusu-uusu Maaꞌi e unue uuri, Walumalau ienini oto peꞌie walu ola i lalo aana, mo ola a Aalaha haliꞌite. Sam 24:1

²⁷ Na loꞌu, mala uri nga iinoni ni puꞌo ko haaraiꞌomu huni lai ngeu peꞌie, na uri omu ko mwaꞌe-mwaꞌe ni lae, oto nga taa ko niie amiu, omu ke hele aana mola na omu ke suꞌuri dolosi loꞌu i sulie.

²⁸ Taꞌe mala uri nga iini ko unue huniꞌomu uuri, “Mo ngeulaa kire uunuꞌi i saana mo god eero-eero ni ngeena,” nge omu ke suꞌuri ngeue mo ngeulaa ngeena, mwaanie omu waelie mei neꞌisaenga iinoni nge e unue leune huniꞌomu.

²⁹ Oto maꞌalana uri omu ko loꞌongaꞌinie nga mei ola e kaꞌa aaela ike aana omu kei ngaa mo ngeulaa ngeena, taꞌe omu ke kinetaꞌinie hiinge iinoni ngeena nge e unue leune huniꞌomu. Taꞌe ohe nga iini eemiu kei unue uuri, “!Haꞌike eena! ?Uri nou saꞌa asuie ike nga taa e kohi mola hunieu, aena aana mwane aaopa e unue uri e aaela?

³⁰ Nou paalahea God haahie mo ngeulaa ngeena. ?Oto e ue nge ngaeta iini ko si maaleledieu haahie mei ola nou paalahea oto a God haahie?”

³¹ Taꞌe e uuri mola, maꞌalana omu ko ngeu wa omu ko inu wa omu ko esuie loꞌu taꞌena nga mei ola, taꞌe omu ke asuiꞌi mola huni haꞌamanikuluꞌaa a God.

³² Na omu ke suꞌuri haꞌatataroa ngaeta mo iini, maꞌalana mo Jiu, wa mo iini nge ikire mo Jiu haꞌike, wa mo iini aana soihaadaꞌinge a God.

³³ Na omu ke lae i sulie tolahaku, aana no ko sare peꞌie ahutana mwala aana ahutana walu ola no ko esuiꞌi, aena aana nou kaꞌa loꞌongaꞌinieu ike maraaku, taꞌe no ko loꞌongaꞌinie noꞌone ngaeta mo iini hunie ne ke peꞌire hunie a God ke haꞌa-uurire.