1 Korinit 1 - Tataroha Diana

Saediananga A Pol Hunie Mo Korinit

¹ Saediananga mwaanieu a Pol, iini nge a God e soieu oto huni neꞌi hurulaꞌaa nana a Jisas Kraes, na mwaanie a aasikaelu a Sostinis noꞌone.

² Mere ko uusu-uusu oto wau ienini huniꞌomu aana soihaadaꞌinge a God wau i Korinit. Iꞌomu oto a God e soiꞌomu uri omu ke neꞌi iinoni maaꞌi ingeie aani iiꞌo-rurunge peꞌie a Jisas Kraes, mala ahutana mo iini ko palo-paloa satana aalaha ikie aana taꞌena nga leu.

³ Mere ko eitanaie a God Aamaka na Aalaha ikie a Jisas Kraes uri hahuꞌana manata-diananga na hanuelamanga ingeie ke iiꞌo peꞌiꞌomu.

A Pol Ko Paalahea God Haahie Mo Korinit

⁴ Suli maholo no ko paalahea God ineu aana e aamasiꞌomu na e niie mo niinge diana namiu i tehulaꞌana a Jisas Kraes.

⁵ Na aena aana a Jisas mone omu ko si neꞌie soihaadaꞌinge e toꞌo-toꞌo aana ahutana mo taungei saenanaunge na mo erenga diana.

⁶ Saemiu e susu oto toꞌohuu aana Tataroha Diana i sulie a Jisas Kraes,

⁷ hule aana soihaadaꞌinge iꞌomu e toꞌo aana oto taꞌena nga niinge aana Liꞌoa Maaꞌi. Oto omu saꞌa tola talea ike nga mei ola aana maholo nge omu ko maaꞌoohi peꞌi heri-huninge loosie Aalaha ikie a Jisas Kraes kei ooli loꞌu mei.

⁸ Na a Jisas oto kei haꞌasusuꞌomu hunie omu ke iiꞌo oodotaꞌi lai hule aana hai dinge nge Aalaha ikie a Jisas Kraes kei ooli loꞌu mei.

⁹ Aana a God, iini nge e soiꞌomu hunie omu ke iiꞌo ruru peꞌie a Kalena, e sai deu i sulie walana, na a Kalena oto Aalaha ikie a Jisas Kraes.

A Pol E Tolahiꞌe Haahie Oopanga I Laona Soihaadaꞌinge

¹⁰ Maeni eesiku maaꞌi, no ko eitanaiꞌomu aana satana a Jisas Kraes Aalaha ikie, uri omu ke neꞌie mola taꞌa-taꞌa mei sae. Omu ke toliꞌaasie mo tolahai ola ni oopanga, taꞌe omu ke mani neꞌisae diana hunie omu ke asu loko-loko loꞌu.

¹¹ No ko ere urine, maeni eesiku, i sulie ngaeta mwala aana uluhe kira Kloui ni kire haꞌarongoau uri omu ko talei haꞌa-ere oto mola tarau.

¹² Ngaeta mo iini eemiu ko unu-unue uuri, “Ineu aana aapa a Pol.” Na ngaeta mo iini loꞌu uuri, “Ineu aana aapa a Apolos.” Na ngaeta mo iini loꞌu uuri, “Ineu aana aapa a Pita.” Na ngaeta mo iini loꞌu uuri, “Ineu aana aapa a Kraes.”

¹³ !Sei! !Omu ko oopaa oto sapena Kraes hailiu kaꞌu ngeena! ?Haꞌalaa omu loꞌongaꞌinie uri ineu a Pol ni nou mae honotamiu i lengine poꞌu-poꞌu? ?Na ohe uri omu loto maaꞌi oto aana sataku ni ngeena? !Haꞌike eena mwae!

¹⁴ No ko paalahea God mola aana uri maꞌalana omu meni loto maaꞌi taane, taꞌe ineu maraaku nou kaꞌa loto maaꞌi ike aana nga iini eemiu mwaanie a Krispas na a Gaeas.

¹⁵ Oto, nga iini hunie ke unue uri omu loto maaꞌi aana sataku haꞌike.

¹⁶ (!Oo, iau mwae! Nou loto maaꞌi taane noꞌone aana Stepanas na uluhe ingeie, taꞌe nou kaꞌa loꞌongaꞌi oodoie ike nga iini ne ke loto maaꞌi loꞌu aana.)

A Kraes Oto Saenanaunge Na Nanamanga A God

¹⁷ A Kraes e kaꞌa uusungeꞌinieu ike mola huni loo-loto maaꞌi aana mwala, taꞌe huni laeliwala aana Tataroha Diana. Na e kaꞌa ike huni laeliwala mola aana mo wala diana mala mo iini e saenanau huni haꞌa-olaa mwala, taꞌe mola i sulie a Kraes, mwaanie maenga a Jisas i lengine poꞌu-poꞌu e totowai mola.

¹⁸ Aana laeliwalanga i sulie maelana a Jisas i lengine poꞌu-poꞌu e kaꞌa toꞌo aana ike nga mei loꞌongaꞌinge aana hunie mo iini kire ko lae takoie maenga huu. Taꞌe hunikie mo iini a God e haꞌa-uurikie oto, mo wala ngeena ikire oto nanamanga a God.

¹⁹ Omu ke saie uri Uusu-uusu Maaꞌi e unue uuri, Ne kei suuheꞌinie saenanaunge mo iini e saenanau, na ne kei uure honosie mola sai-olanga mo iini e sai ola. Aesaea 29:14

²⁰ ?Oto mala uri leune kei urine oto, mwala saenanau ke si ue eena? ?Mo haꞌa-uusuli na mo iini kire saenanau aana ere-haitelilinge kire ke si ue eena? Aana a God e haataꞌinie oto uri saenanaunge aana walumalau ie nga ola mola mwaakule, na e kaꞌa toꞌo aana ike nga loꞌongaꞌinge.

²¹ Oto aana a God e asuie mone i sulie saenanaunge ingeie, mwala aana walumalau ie kire dau aasaie uri kire kei haꞌa-uurire maraada i sulie saenanaunge ikire. Na e lae mola urine aana saena a God mola huni haꞌa-uurie iinoni aana ola kire unue nga mei saenanaunge haꞌike aana, nge hiiwalaimolinge aana laeliwalanga i sulie a Kraes.

²² Mo Jiu, saeda mola hunie uri kire ke leesie nga mo tolimaa ni nanamanga, na mo Aapoloa Aaopa ko sare rongoa mola nga mo loꞌongaꞌinge ni saenanaunge, uri hunie kire ke si eeliꞌu takoie a God.

²³ Taꞌe ienini mone melu ko laeliwala aana uri kire horo maesie a Kraes i lengine poꞌu-poꞌu. Mei ola oto hule aana mo Jiu na kire kaꞌa sasare rongoa ike, na mei ola ngeena kei neꞌi pweu-pweuaꞌanga mola hunie mo Aapoloa Aaopa.

²⁴ Taꞌe hunikie mo iini nge a God e soikie oto, mo Jiu na oto mo Aapoloa Aaopa, mei wala aana a Kraes ienini ingeie oto nanamanga na saenanaunge a God.

²⁵ Na e urine oto aena aana mo ola nge a God ko esuiꞌi, maꞌalana iinoni ko ere aaelasiꞌi uri nga mei saenanaunge wa nga mei aꞌailaꞌanga haꞌike aani, taꞌe saenanaunge aana e lae liutaa aana loꞌu saenanaunge iinoni, na e aꞌailaꞌa ue liutaa aana aꞌailaꞌanga iinoni ni ngeena.

²⁶ Oto maeni eesiku maaꞌi, omu ke toꞌomaaie kaꞌu maholo a God e holaꞌi soiꞌomu huni lulu i sulie. ?Aana lio-lionga ni iinoni, e nite iini eemiu kire saenanau? ?E nite iini eemiu kire neꞌi poro paine? ?E nite iini eemiu kire aalaha? !Tootaꞌi iini mola!

²⁷ A God e tohungei lio hilisie oto mo iini nge mwala e loꞌongaꞌinie uri kire puꞌosasu uri huni haꞌamasaa kira saenanau. Na e lio hilisie oto noꞌone mo iini nge mwala e loꞌongaꞌinie uri kire mamaelaꞌa huni haꞌamasaa mo iini e nanama.

²⁸ Aana nga taa nge walumalau e lio toli aana, na e leledie, na e loꞌongaꞌinie uri nga mei ola mwaakule mola aana, mei ola ngeena a God e lio hilisie huni waelie nga taa nge walumalau e neꞌisae paine aana.

²⁹ Na a God e asuie leune urine, mwaanie uri nga iini e toohaꞌinie maraana maholo kei uure i naꞌona God.

³⁰ Aena aana a God mone e si da omu lae mai neꞌi iinoni tararuru peꞌie a Jisas Kraes. Ingeie oto e lae mai huni niie saenanaunge a God hunikie, na ingeie mola ni e haꞌa-oodohikie peꞌie a God, na e haꞌamaaꞌikie, na e holikie mwaanie iiꞌonga i memelutana oorahaꞌaa.

³¹ Aena urinena, kie ke iiꞌo oto mala Uusu-uusu Maaꞌi e unue aana e ere uuri, A tei ko sare toohaꞌinie, ke toohaꞌinie mola haahie nga taa a God e asuie hunie. Jeremaea 9:24