1 Jon 5 - Tataroha Diana

Hiiwalaimolinge Aana A Jisas E Aꞌailaꞌasie Mola Walumalau

¹ Taꞌena nga iini ko hiiwalaimoli aana a Jisas uri ingeie a Kraes, a Haꞌa-uuritaka nge a God e haiholotaꞌinie kaꞌu huni uusungeꞌinie mai, nge iinoni ngeena e hute haalu mala ngaeta kalena God. Na taꞌena nga iini ko manata diana hunie Mamaꞌa i Lengi, nge ke manata diana noꞌone hunie mo iini nge e hute aana.

² Mala uri kie ko manata diana hunie a God peꞌi tola i sulilana mo haꞌatolanga ingeie, nge kie saie uri kie ke manata diana noꞌone hunie mo kalena God.

³ Kie ko haataꞌinie manata-diananga ikie hunie a God aana tola i sulilana mo haꞌatolanga ingeie. Na mo haꞌatolanga ingeie e saꞌa aasa ike hunikie,

⁴ aena aana taꞌena nga iini e neꞌi kalena God oto, ko aꞌailaꞌasie mola walumalau aani norutoꞌonga aana Kraes.

⁵ ?A tei ni e aꞌailaꞌa honosie walumalau? Iini nge ko hiiwalaimoli uri a Jisas ingeie Kalena God haꞌalaa.

^6-8 Na e oolu mei ola nge kire ko unu haꞌa-oaie hunikie uri a Jisas ingeie Kalena God toꞌohuu. Eetana oto mei wei aana loto-maaꞌinge, na ruana oto mei epu aana maenga. Nga taa e rau aana e ro maholo ngeena kire mani haꞌawalaimoliꞌaa uri a Jisas Kraes Kalena God toꞌohuu. Oto mei epu noꞌone ko haataꞌi diana aana uri leune e toꞌohuu, na mei wei mola maraana haꞌike. Na oolune oto Liꞌoa Maaꞌi nge ko unue i laona saeka uri leune e toꞌohuu, aena aana Liꞌoa Maaꞌi oto walaimolinge. Na e oolu mei olana kire mani ere sada uri a Jisas Kalena God oto toꞌohuu.

⁹ Mala uri kie ko hiiwalaimoli aana nga taa iinoni ko unu-unue, nge kie ke hiiwalaimoli noꞌone aana Jisas, aena aana nga taa a God e unue e paine liutaa, na ingeie maraana e unu haꞌa-oaie a Kalena.

¹⁰ Taꞌena nga iini ko hiiwalaimoli aana Kalena God, e saie uri nga taa a God e unue e toꞌohuu. Taꞌe iini e kaꞌa hiiwalaimoli aana a God, nge ko unue oto uri a God e sai eero, aena aana e kaꞌa hiiwalaimoli ike aana nga taa a God e unue i sulie a Kalena.

¹¹ A God e unue uri e niie oto maurihe huu hunikie, na uri mei meurihe ngeena nge oto i lalo aana a Kalena.

¹² Oto a tei nge e toꞌo aana a Kale i lalo aana, nge e toꞌo aana mei meurihe ngeena. Taꞌe a tei nge e kaꞌa toꞌo aana Kalena God i lalo aana, e kaꞌa toꞌo aana ike nga mei meurihe i lalo aana.

Kie Toꞌo Aana Oto Maurihe Huu

¹³ No ko uusue walu ola ienini huniꞌomu, mo iini omu hiiwalaimoli aana satana Kalena God, hunie uri omu ke manataꞌinie uri omu toꞌo aana oto maurihe huu.

¹⁴ Na hiiwalaimolinge ikie aana God otona, uri kie ko sukaa taꞌena nga mei ola i sulie saena, na ko rongo oto hunikie.

¹⁵ Na aana kie ko manataꞌinie oto ko rongo hunikie aana taꞌena nga sukanga i sulie saena, kaꞌu kie saie oto uri kie kei hele aana nga taa kie sukaa aana.

¹⁶ Oto maholo kie ko leesie ngaeta aasike aani hiiwalaimolinge ko esuie nga mei oorahaꞌaa, e malisine kie ke aarengaꞌi talana. Oto a God ke si hoda rereꞌa aana saena hunie ke mauri. Taꞌe nou kaꞌa ere ike i sulie mo iini kire ko aatopuri aana God na ko iiꞌo mola hunie aaelanga. Oorahaꞌaa urine e adona maenga huu taane, na nou kaꞌa unue ike uri kie ke aarengaꞌi talana mo iini kire ko oorahaꞌaa urine.

¹⁷ Taꞌena nga oorahaꞌaa mwala ko esuie kire dau huꞌisie a God ni ngeena, taꞌe ngaeta mo oorahaꞌaa kire sai oonisae mwaaniꞌi hunie a God ke saeꞌaasiꞌi.

¹⁸ Kie manataꞌinie oto uri taꞌe-taꞌena nga iini e hute aana a God, e kaꞌa talei oora-oorahaꞌaa ike, aana a Kalena God ko kinetaꞌinie mwaanie uri Naꞌohai Iini Tataꞌala, a Pwelu Eero-eero, e kopi aana huni waelie.

¹⁹ Kie manataꞌinie oto noꞌone uri ikie mo kalena God, maꞌalana ahutana mwala loꞌu i laona walumalau kire iiꞌo mola i mamalutana a Pwelu Eero-eero.

²⁰ Na kie manataꞌinie oto noꞌone uri a Kalena God e lae mai na e niie oto saenanaunge naka, uri hunie kie ke manataꞌinie Iini Toꞌohuu. Na maurihaꞌaka oto i lalo aana Iini Toꞌohuu, aana ikie i lalo aana Kalena, a Jisas Kraes. Taꞌe ingeie mola tohungei God, na ingeie oto aahuꞌine maurihe huu.

²¹ Aena urine, maeni mwela ineu, omu ke kinetaꞌinie saemiu mwaanie omu rongo hunie mo haꞌa-uusulinge eero-eero, aana o ko deu urine, nge o kaꞌa paloa ike tohungei God, taꞌe o ko palo-paloa mola mo god eero-eero.