1 Jon 4 - Tataroha Diana

Oohongie Mo Liꞌoa Uri Kire Uure Mwaanie A God Toꞌohuu Wa Haꞌike

¹ Maeni malahuku, omu ke suꞌuri hiiwalaimoli aana ahutana mo propet nge kire ko unue uri kire ko ere oolitana a God, aana mo propet eero-eero hunge kire ko lae hailiu i laona walumalau, na mo liꞌoa eero-eero mola nge aada. Oto omu ke holaꞌi oohongie kaꞌu mo propet ngeena, hunie omu ke lio saie uri kire uure taane aana God toꞌohuu wa haꞌike.

² Aana omu sai lio saie mo iini toꞌohuu, aana Liꞌoa Maaꞌi a God ko unu tahangaꞌinie uri a Jisas Kraes e lae mai aano na e neꞌi iinoni.

³ Taꞌe mo iini kire ko taateingeꞌinie walaimolinge ngeena, nge Liꞌoa Maaꞌi a God haꞌike i lalo aada, taꞌe liꞌoa e uure mola mwaanie Maelonga a Kraes ni ngeena. Omu rongoa oto uri liꞌoa ngeena kei lae mai, na e hule oto mai i leu i laona walumalau.

⁴ Maeni mwela ineu, iꞌomu mo iini a God eena, na omu aꞌailaꞌasie oto mo propet eero-eero, aena aana Liꞌoa Maaꞌi nge e iiꞌo i lalo aamiu, e saka liutaa aana liꞌoa i lalo aada mo iini ni welumalau.

⁵ Ikire ngeena, kire uure mone aana walumalau, oto ere-erenga ikire ko uure mola mwaanie neꞌisaenga ni welumalau, na aena urine walumalau ko rongo oto hunire.

⁶ Taꞌe ikie mo iini oto a God. A tei nge e saie a God, nge kei rongo hunikie, taꞌe a tei nge e kaꞌa saie a God, nge e saꞌa rongo ike hunikie. Oto i leune loꞌu, kie ke si lio saie liꞌoa aani walaimolinge na liꞌoa aani eeronga.

Manata-diananga E Uure Aana God

⁷ Maeni iinoni maaꞌi ineu, kie ke manata diana hunikie hailiu, aana manata-diananga e uure aana God. Taꞌena nga iini ko mana-manata diana, nge ko haataꞌinie uri ingeie oto kalena a God na e saie a God.

⁸ Taꞌe iini nge e kaꞌa mana-manata diana, ingeie e kaꞌa saie ike a God, aana a God oto aahuꞌine manata-diananga.

⁹ A God e haataꞌinie manata-diananga ingeie hunikie aana e uusungeꞌinie mai taꞌa-taꞌa mwela mouteꞌi ingeie i laona walumalau hunie kie ke si meuri oto i tehulaꞌana.

¹⁰ Tohungana manata-diananga ni otona. Manata-diananga ikie hunie a God e kaꞌa tohungei diana ike urine, taꞌe ingeie ni e tohungei manata diana hunikie toꞌohuu aana e uusungeꞌinie mai a Kalena uri hunie ke neꞌi uunu-olanga huni tapa oolisie mo oorahaꞌaanga ikie.

¹¹ Maeni eesiku maaꞌi, oto mala a God e manata diana hunikie urine, nge ikie noꞌone kie ke manata diana hunikie hailiu.

¹² Maꞌalana nga taꞌa-taꞌa iinoni e kaꞌa leesie ue a God, taꞌe mala uri kie ko manata diana hunikie hailiu, nge a God ke si iiꞌo oto i lalo aaka, na manata-diananga ingeie ko tohungei eehu diana oto i lalo aaka.

¹³ A God e niie oto Liꞌoa Maaꞌi ingeie naka, na aena leune kie sai diana aana uri kie iiꞌo susu oto i lalo aana God na ingeie oto i lalo aaka.

¹⁴ Na melu leesie oto a Jisas aana maameelu, na melu ko haꞌarongoa oto walumalau uri a God e uusungeꞌinie mai a Kalena hunie ke neꞌie a Haꞌa-uuri hunie ahutana mwala aana walumalau.

¹⁵ Oto aena urinena, taꞌena nga iini ko hiiwalaimoli na ko unu tahangaꞌinie uri a Jisas ingeie oto Kalena God, nge a God ko iiꞌo susu oto i lalo aana, na ingeie i lalo aana God.

¹⁶ Aena urine, kie manataꞌinie manata-diananga nge a God e manata diana hunikie aana, na kie ko norutoꞌo oto aana. A God ingeie oto aahuꞌine manata-diananga, na iini ko iiꞌo susu aana manata-diananga, nge ko iiꞌo susu aana God otona, na a God ko iiꞌo susu oto aana.

¹⁷ Na mala uri manata-diananga ingeie ke tohungei eehu diana oto i lalo aaka urine, na iiꞌolaka mai welumalau ke urihana tolahana a Kraes, nge kie saꞌa maꞌuteꞌinie ike uuranga i naꞌona God aana hai dinge ni leinge.

¹⁸ Mala uri kie ko meꞌu-meꞌu, nge kie kaꞌa iiꞌo susu ike aana manata-diananga a God hunikie, aana kie loꞌongaꞌinie mola haꞌamotaahinge. Taꞌe kie saꞌa maꞌu ike, aena aana tohungei manata-diananga a God ko taꞌaasie mola taꞌena nga maꞌunge mwaanikie.

¹⁹ Oto ikie, kie ko mana-manata diana aena aana a God oto e holaꞌi manata diana hunikie.

²⁰ Mala nga iini ko unue uuri, “Nou manata diana hunie a God,” taꞌe ko ngiduupu mola hunie aasine, ingeie ngeena iinoni eero-eero mola. Aana e aasa kei manata diana hunie a God, iini e kaꞌa lee-leesie, mala uri e kaꞌa sai manata diana hunie aasine, iini nge ko lee-leesie tarau.

²¹ Na a Kraes e niie haꞌatolanga hunikie uuri, “A tei ko manata diana hunie a God, ke manata diana noꞌone hunie aasine.”