1 Jon 3 - Tataroha Diana

Ikie Mo Kalena God

¹ !Leesie kaꞌu! Aamaka i Lengi e tohungei manata diana paine hunikie mo iini kie ko lulu i sulie a Jisas. Manata-diananga ingeie hunikie e paine liutaa, kaꞌu hule aana e haaraꞌinikie oto aana maeni kalena, na e kaꞌa satai ola mwaakule mola, taꞌe ikie mo kalena oto toꞌohuu. Na aena aana mwala aana walumalau kire kaꞌa manataꞌinie ike a God, nge kire kaꞌa manataꞌinikie noꞌone.

² Iau maeni malahuku, kie neꞌi mwela oto a God, na kie kaꞌa saie ue uri a God kei oolisikie loꞌu uri taa taꞌau i Lengi. Taꞌe kie saie taane oto uri maholo a Kraes kei ooli loꞌu mei, kie kei hei-oolisi mala ingeie, aana kie kei leesie tohungana manikuluhaꞌana.

³ Na ahutaka nge kie ko lio-lio peꞌie maaꞌoohinge loosie maholo ngeena, kie ko kinetaꞌinikie hunie kie ke iiꞌo rereꞌa oto mala a Kraes e rereꞌa.

⁴ Taꞌe-taꞌena nga oorahaꞌaa ko waelie mo haꞌatolanga a God, oto mo iini kire ko oorahaꞌaa kire ko heukama honosie a God eena.

⁵ Omu manataꞌinie oto uri a Kraes e lae mai huni taꞌaasie oorahaꞌaa, na uri ingeie maraana nga mei oorahaꞌaanga haꞌike aana.

⁶ Oto nga iini ko iiꞌo i lalo aana a Kraes, e saꞌa oora-oorahaꞌaa ike. Aana taꞌena nga iini nge ko talei lae peꞌi oorahaꞌaa mola, e kaꞌa tohungei leesie ike a Kraes wa ke manataꞌinie.

⁷ Maeni mwela ineu, suꞌuri toliꞌaasie nga iini ke haꞌatakaloꞌomu. Aana iini nge helelana e lae oto i sulie oodotaꞌinge, iini urine e oodotaꞌi oto, mala kaꞌu oto a Kraes e oodotaꞌi.

⁸ Taꞌe iini nge ko oora-oorahaꞌaa oto mola, iini a Pwelu Eero-eero eena, aena aana a Pwelu Eero-eero ingeie e uure ni oorahaꞌaala oto mai aehotalana. Na Kalena God e lae oto mai huni oho aasie mola mo esunge a Pwelu Eero-eero ngeena.

⁹ A tei nge e neꞌie oto kalena God, e kaꞌa oora-oorahaꞌaa ike, aena aana mei epu a God oto i lalo aana. Na aena aana a God oto aamana, e aasa hunie kei oorahaꞌaa loꞌu.

¹⁰ Oto i leune kie sai lio saie uri a tei nge e neꞌi kalena God, na a tei e neꞌi kalena a Pwelu Eero-eero. Aana taꞌena nga iini nge helelana e kaꞌa oodotaꞌi, wa ke manata diana hunie aasine, ingeie nga kalena God haꞌike.

Kie Ke Manata Diana Hunikie Hailiu Toꞌohuu Aana Saeka

¹¹ Uure oto mai aana maholo omu aehota hiiwalaimoli, omu rongoa oto tarau uri kie ke manata diana hunikie hailiu.

¹² Kie ke suꞌuri urihana a Kein wau i naꞌo, aana ingeie iini a Pwelu Eero-eero mola, na e horo maesie oto aasine, a Ebol. ?Aena e ue kaꞌu nge a Kein e horoꞌie aasine urine? E horoꞌie aena aana a Ebol e oodotaꞌi, na iiꞌonga diana ingeie e haataꞌinie uri iiꞌolana a Kein e kaꞌa oodo.

¹³ Oto omu ke suꞌuri pangataꞌi, maeni eesiku, mala uri walumalau ko ngiduupu huniꞌomu.

¹⁴ Kie manataꞌinie oto uri kie tahisie nanamanga aana maenga na uri kie toꞌo aana oto maurihe. Kie manataꞌinie leune aena aana kie manata diana hunie mo eesike. Taꞌe iini nge manata-diananga haꞌike aana, iini urine e iiꞌo susu ue i mamalutana maenga.

¹⁵ Taꞌena iini nge ko ngiduupu hunie aasine, ingeie oto iinoni horo-horo, na omu saie oto uri iini urine e kaꞌa toꞌo aana ike maurihe huu i lalo aana.

¹⁶ Na kie ko si lio saie tohungana manata-diananga aena aana a Kraes e toliꞌaasie mangona i tehulaꞌaka. Oto ikie noꞌone kie ke mwaꞌe-mwaꞌe ni mae huni peꞌie mo eesike.

¹⁷ Loꞌongaꞌi keꞌu i sulie iini e toꞌo aana taane nga mo ola, na ko lee-leesie aasine ko siꞌohaꞌa taꞌe hule aana e kaꞌa sare aamasie. ?Uri iinoni urine ko haataꞌinie taane manata-diananga a God? !Haꞌike oto ooꞌoo!

¹⁸ Maeni mwela ineu, kie ke suꞌuri mana-manata diana mola aani wawa wa aani wala, taꞌe manata-diananga toꞌohuu nge ko haataꞌi aana nga taa kie ko esuie.

¹⁹ Mala uri kie ko manata diana hunikie hailiu urine, nge kie ko saie oto uri kie iiꞌo aana tala toꞌohuu, na kie saꞌa maꞌu ike huni lae mai i saana God.

²⁰ Taꞌe maꞌalana ohe kie ko meꞌu-meꞌu ue, kie ke suꞌuri meꞌu-meꞌu loꞌu, aena aana a God e saie walu ola i sulikie, na aamasinge ingeie e paine loꞌu liutaa aana mo hiinge aana saeka.

²¹ Oto maeni malahuku, mala uri kie saie uri manataka e taha mola mwaanie roroꞌanga, nge kie saꞌa maꞌuteꞌinie ike laenga mai peꞌie nga mei neꞌisaenga huni sukaa aana a God.

²² Na a God kei niie mola nga taa kie ko sukaa aana, aena aana kie ko tola i sulie mo haꞌatolanga ingeie, na kie ko esuie mo ola e saetoꞌo aani.

²³ Na mei haꞌatolanga ingeie ni otona, uri hunie kie ke hiiwalaimoli aana Kalena, a Jisas Kraes, na hunie kie ke manata diana hunikie hailiu, mala e unue oto hunikie.

²⁴ Mo iini ko tola i sulie mo haꞌatolanga ingeie, nge kire iiꞌo oto i lalo aana, na ingeie oto i lalo aada. Na Liꞌoa Maaꞌi nge a God e niie hunikie ko haataꞌinie aaka uri ko iiꞌo toꞌohuu oto peꞌikie.