1 Jon 2 - Tataroha Diana

¹ Maeni mwela ineu, no ko uusue oto urine huniꞌomu uri hunie omu ke suꞌuri oorahaꞌaa. Taꞌe mala uri nga iini ko oorahaꞌaa, kie toꞌo aana taane iini huni peꞌikie aani erenga oolitaka peꞌie a Mamaꞌa. Na ingeie oto a Jisas Kraes, iini e oodotaꞌi taꞌingelu.

² Aana ingeie oto e neꞌi uunu-olanga i saana Mamaꞌa, nge e sai haꞌa-oodohie mo oorahaꞌaa ikie. Na e kaꞌa ike taꞌe mo oorahaꞌaa ikie hahaiteli, taꞌe ahutana mo oorahaꞌaa mo iinoni aana walumalau oto noꞌone.

³ Kie ke si saie uri kie manataꞌinie a God, mala uri kie ko tola i sulie mo haꞌatolanga ingeie.

⁴ Aana nga iini ko unue uri e manataꞌinie a God, taꞌe e kaꞌa tola i sulie mo haꞌatolanga ingeie, iini urine ingeie iinoni eero-eero mola na walaimolinge haꞌike aana.

⁵ Taꞌe iinoni nge ko tola i sulie walana a God, ingeie oto iini nge ko tohungei manata diana hunie a God toꞌohuu. Aana urine nge kie ke si manataꞌinie uri ikie mo iinoni ingeie toꞌohuu.

⁶ Aana nga iini ko unue uri ingeie oto iinoni a God, nge ke iiꞌo oodotaꞌi oto mala a Jisas Kraes e oꞌoꞌo kaꞌu.

Kie Ke Manata Diana Hunikie Hailiu, Aana Haꞌatolanga Haalu A Kraes Ni Otona

⁷ Maeni eesiku, mei haꞌatolanga nge no ko uusue huniꞌomu ie, e kaꞌa mei ola haalu ike. Mei haꞌatolanga lalahuꞌe omu toꞌo aana taane oto uure mai maholo omu aehota hiiwalaimoli, na mei haꞌa-uusulinge omu rongoa taane oto.

⁸ Taꞌe nga taa no ko uusue huniꞌomu ienini mei haꞌatolanga haalu, maꞌalana omu rongoa taane oto i naꞌo, aana kie si leesie tohungei neꞌisaenga aana manata-diananga maholo kie leesie tolahana a Jisas. Na mwala kire sai leesie tohungei neꞌisaenga aana noꞌone aamiu, aana rodohono ko suu oto, na tohungei raa-raa aana haꞌa-uusulinge ingeie ko raa tahairaa oto ie i manatamiu.

⁹ Taꞌena nga iini ko unue uri ingeie i laona raa-raa, taꞌe ko ngiduupu mola hunie aasine aana hiiwalaimolinge, nge ingeie mola ue i laona rodohono hule oto molana.

¹⁰ Taꞌena nga iini nge ko manata diana hunie aasine i lalo aana Kraes, nge ingeie e iiꞌo i laona raa-raa na nga taꞌa-taꞌa mei ola huni haꞌatataroa mwala mwaanie hiiwalaimolinge haꞌike loꞌu aana.

¹¹ Taꞌe iini nge ko ngiduupu hunie aasine, ingeie e iiꞌo ue i laona rodohono, na ko lae-lae mola i laona rodohono, na e kaꞌa saie ike leu ko lae takoie, aena aana rodohono e haꞌa-ulue oto maana.

¹² No ko uusu-uusu huniꞌomu, maeni mwela ineu, i sulie a Mamaꞌa e saeꞌaasie oto mo oorahaꞌaanga iꞌomu i tehulaꞌana a Jisas Kraes.

¹³ No ko uusu-uusu huniꞌomu maeni rato ineu, aena aana omu saie oto iini e uure oto mai aehotalana. No ko uusu-uusu huniꞌomu maeni saanau ineu, aena aana omu aꞌailaꞌasie iini tataꞌala.

¹⁴ No ko uusu-uusu huniꞌomu maeni mwela ineu, aena aana omu saie oto a Mamaꞌa. No ko uusu-uusu huniꞌomu maeni rato ineu, aena aana omu saie oto iini e uure oto mai aehotalana. No ko uusu-uusu huniꞌomu maeni saanau ineu, aena aana iꞌomu oto mo iini aꞌailaꞌa, na aena aana walana God e iiꞌo i lalo aamiu, na aena aana omu aꞌailaꞌasie iini tataꞌala.

¹⁵ Omu ke suꞌuri manata diana hunie walumalau, wa nga mei ola loꞌu aana walumalau. Mala uri omu ko manata diana hunie walumalau, nge omu kaꞌa manata diana ike hunie a Mamaꞌa.

¹⁶ Aana mo tolahai ola aana walumalau ie mala saehanalilana mo ola sape ko heri huniꞌi, na saehanalinge aani leesilana mo ola, na toohaꞌinilaka haahie mo ola kie asuiꞌi wa kie toꞌo aani, nga taꞌa-taꞌa mei ola aana walu ola ienini e kaꞌa uure ike mai mwaanie a Mamaꞌa, taꞌe kire mani uure mola mai mwaanie walumalau.

¹⁷ Walumalau na ahutana walu ola i laona nge mwala ko sae-saetoꞌo aani, kire kei meni eiꞌaa mola, taꞌe iini ko tola i sulie saena God nge kei iiꞌo huu.

Mwaanie O Toliꞌaasie Maelonga A Kraes E Eeroꞌo

¹⁸ Maeni mwela ineu, mo dinge ooreta i naꞌona a Kraes kei ooli loꞌu mei oto ienini. Omu rongoa oto i naꞌo uri maelonga a Kraes kei lae mai. Oto ie mo maelonga hunge a Kraes ko haataꞌi oto, na aena urinena kie si saie uri haꞌamangolana walumalau e karaꞌini oto.

¹⁹ Mwala ngeena kire kaꞌa hiiwalaimoli ike mala ikie, na ikire nga mo tohungei iinoni ikie haꞌike. Kire auꞌesu tararuru taane peꞌikie, taꞌe kire oopa oto mwaanikie. Ikire nga mwala haꞌike loꞌu aaka. Mala uri kire ke neꞌie nga mwala aaka, haꞌalaa kire iiꞌo oto peꞌikie taraꞌasi. Taꞌe aana kire oopa oto mwaanikie urine, e haataꞌinie oto uri nga taꞌa-taꞌa iini aada e kaꞌa neꞌie loꞌu iinoni a Kraes mala ikie.

²⁰ Taꞌe iꞌomu, a Kraes e niie oto Liꞌoa Maaꞌi ingeie huniꞌomu, na omu meni saie oto walaimolinge.

²¹ Nou kaꞌa uusu-uusu ike huniꞌomu i sulie omu kaꞌa saie ike walaimolinge. Nou saie uri omu saie taane walaimolinge. Taꞌe no ko uusu-uusu mola huni peꞌiꞌomu hunie omu ke lio saie mo haꞌa-uusulinge eero-eero, aana nga mei eeronga e kaꞌa uure ike mwaanie walaimolinge.

²² ?Oto kira tei keꞌu mo iini kire sai eero liutaa? Ikire oto mo iini nge kire ko taateingeꞌinie uri a Jisas oto a Kraes, a Haꞌa-uuritaka nge a God e haiholotaꞌinie kaꞌu huni uusungeꞌinie mai. Iinoni urine nge ingeie maelonga a Kraes, aana ko meni leledie oto a Mamaꞌa na a Kalena.

²³ Aana iini ko leledie a Kale, nge ko leledie noꞌone a Mamaꞌa. Taꞌe iini e saetoꞌo aana a Kale, nge a Mamaꞌa e iiꞌo noꞌone peꞌie.

²⁴ Omu ke kinetaꞌinie saemiu hunie nga taa nge omu rongoa oto uure mai aehotalana ke iiꞌo susu oto aamiu. Aana mala uri omu ke hiiwalaimoli taraꞌasi, haꞌalaa omu ko iiꞌo susu peꞌie a Kale na a Mamaꞌa.

²⁵ Aana a Kale e haiholotaꞌi huni niie maurihe huu hunikie.

²⁶ No ko uusue mo wala ienini huniꞌomu huni haꞌapasuliꞌomu mwaanie mo iini nge kire ko sare haꞌatakaloꞌomu.

²⁷ Taꞌe iꞌomu, nou saie uri omu saꞌa rongo ike hunire aana a Kraes e neꞌie Liꞌoa Maaꞌi oto i lalo aamiu. Na aena aana ko iiꞌo taraꞌasi i lalo aamiu, omu kaꞌa saetoꞌo aana ike loꞌu nga iini hunie ke haꞌa-uusuliꞌomu, aana Liꞌoa Maaꞌi ko haꞌa-uusuliꞌomu oto aana ahutana walu ola, na nga taa ko haꞌa-uusuliꞌomu aana, e toꞌohuu na nga eeronga haꞌike. Oto omu ke iiꞌo susu i lalo aana a Kraes mala a Liꞌoa Maaꞌi e haꞌa-uusuliꞌomu.

²⁸ Iau, maeni mwela ineu, omu ke iiꞌo susu oto i lalo aana a Kraes, uri hunie maholo kei ooli mei, kie ke suꞌuri meꞌu na kie ke suꞌuri masa i maana.

²⁹ Omu saie oto uri a Kraes ingeie e oodotaꞌi. Oto e malisine uri omu ke saie loꞌu uri ahutana mo kalena God, helelada e oodotaꞌi noꞌone.