1 Jon 1 - Tataroha Diana

A Jon Ko Haꞌawalaimoliꞌaa Uri A Kraes E Neꞌi Iinoni Toꞌohuu

¹ Ie melu ko uusue uusu-uusu huniꞌomu i sulie tohungei iinoni e uure oto mai aehotalana, nge ingeie mei Wala ni Meurihe. Melu ko uusue oto mala melu rongoa aana aalingameelu, na melu leesie aana maameelu. Melu toꞌomaaie, na melu hele aana oto aana kiꞌimeelu.

² Maurihe Huu nge melu ko haꞌarongoꞌomu aana ie, e iiꞌo oto wau i naꞌo peꞌie a Mamaꞌa. Oto haataꞌinilana e lae huniꞌemeelu na melu leesie, na melu saie uri e toꞌohuu oto.

³ Melu ko haꞌarongoꞌomu urine aana nga taa melu leesie na melu rongoa, hunie uri iꞌomu noꞌone omu ke iiꞌo ruru peꞌiꞌemeelu aana iiꞌo-rurunge peꞌie a Mamaꞌa na a Kalena, Jisas Kraes.

⁴ Melu ko uusu-uusu huniꞌomu urine, uri hunie omu ke honu eeni ilenimwaꞌenga noꞌone peꞌiꞌemeelu.

A God Oto Raa-raa

⁵ Na mei wala melu rongoa mwaanie a Kale kaꞌu oto melu ko haꞌarongoꞌomu aana nge uri a God oto raa-raa, na nga mei rodohono haꞌike loꞌu aana oto ooꞌoo.

⁶ Oto mala kie ko unue uri kie iiꞌo ruru peꞌie a God, taꞌe kie ko talei oꞌoꞌo mola i laona rodohono, ikie mo iinoni eero-eero mola na kie kaꞌa lulu i sulie ike walaimolinge.

⁷ Taꞌe mala uri kie ko iiꞌo i laona raa-raa mala a God noꞌone ko iiꞌo i laona raa-raa, nge kie ke iiꞌo ruru peꞌikie hailiu, na apune Kalena, a Jisas, ke si haꞌarereꞌakie mwaanie ahutana oorahaꞌaa.

⁸ Mala nga iini ko unue uri e kaꞌa oorahaꞌaa ike, nge iinonine ko eeroa mola maraana ni ngeena, na walaimolinge e kaꞌa iiꞌo ike aana.

⁹ Taꞌe mala kie ko haꞌahoue mo oorahaꞌaa ikie hunie a God, nge kie sai norutoꞌo aana huni saeꞌaasie mo oorahaꞌaa ikie, aana ingeie e oodotaꞌi na kei tohungei haꞌarereꞌakie mwaanie taꞌena nga takalonga ikie.

¹⁰ Mala kie ko unue uri kie kaꞌa oorahaꞌaa ike, nge kie ko unue oto uri a God e sai eero, na kie ko haataꞌinie uri kie kaꞌa sai rongo oto hunie walana.