TAITAS 3 - NITI GONTU N.T. (BSI)

Kristan ka Dajudamyo

¹ Mohlumi lupa to sangiinii la otority atañ ko tiilii siibi tote hiila, luniiñ taliiniipa, kapane khiiniiñ miigo miidupa henju tote hiila,

² kone mitrḛ diimmah aguñ lubi yayo, gasupasu mi apatolya, yanu tolya, ho kakiñ tolya digoabiaya yanuyamya mi hikha miyu atañmi.

³ Niimpalukoda ngunu atoh tiirḛ ronge piicha toke, luniiñtamato, ngola dato, abuje helyihembyo la hempyo soniiñ ka miirapa lyito, ngunuka sango mi kanamapa ho kariñsiila ka miiniiñho santo, miyu atañlo kahu kola ho kone anyañmi kahu siila;

⁴ hojalo niido hokii aya ho hensunii helakala Pinii ngunuka Lyangur boko hokii ahtiiku,

⁵ mo ngunumi lyangur tiiku, ngunuka denki hoka miigo miiniiñ kopama, hojalo mohka aroh ka henjukopa sii, asekula aya yadopa ho nitidopa miitiiku Darii Yajiyallo ho,

⁶ nii mina mo ngunuka ayoh ho bitii kunii Jisu Kristo ngunu mika Lyangurbonii kiilo,

⁷ niimpalukoda ngunumi lupya dukupa hiila mohka aroh-aya lo ho pensikoniiñ pa lyidoku santḛrlamanii sango ka hentiñ ho.

⁸ Luniiñsi jije. Ngo hiila hendo niimi siika drih atañ soya miikañ ari miikiñcho, niimpalukoda hutiina Pinii mi henje nyadonii hendi biidola atoh atohmi miilii siidopa aya miigo atañ so; siika atañsi ayalodake ho miijo dokiñ doke miyu atañpa.

⁹ Hojalo apatolya piigoamanii Chesuresunii atañmi, ohoasi atañmi, taliisiimanii atañmi, ho dapo paka gasupasu nii atañmi, niimpalukoda hiika hii hang miijo dokiñma ho piigoamaniisu.

¹⁰ Lukhu luche nii miyu pako da, ronge malo ronye lulyañ luka biidola, ho mohmi hang luba dopa lyilya yo,

¹¹ chimbiidola sitañ miyu hii miigyanii ho ingyamiigyanii; mo atoh haliisiiku niike.

Kamijapa ka Lukokuniiñ

¹² Ngiika Artemas malo Taichikas mika niiko kiiniñ lyiho, niika miikhe jami ngiiko ahdupa miitolya Nikopolis ho, niimpalukoda ngo dorii so hiikoho duchi hiila hendo.

¹³ Niika henkhe jami hembyuñ tolya Zenas dapochenii bomi la Apollos nyimi mohluka lembo insa komi; kage tolya mohlukii hang papo masu ha hiila.

¹⁴ Ho ngunuka miyu mi chingii kiine tolya aya miigo miiju ho atoh atohmi miilii siidopa, niimpalukoda aniipiida anna laka lyinii mi hembyuñ dopa, ho piigoama pa miike nelyayo.

¹⁵ Hikha hutiina ngiika agiñho dunii ayahelyi mi niipa bilii biilyi ke. Ayahelyi lutolya hutiina ngunumi hendonii henje ho. Aroh-aya hikha nunu miilañruko dokiñcho.