ROM MIKA POL KA SIITI KENIIÑ 9 - NITI GONTU N.T. (BSI)

Pinii la Mohka Miyu Atañ

¹ Ngo jije mike ludu nii Kristo ko, ngo gollu make; ngiika heniiñ ngiimi haki bido Darii Yajiyallo ko,

² ngo hempḛr herudo ho ngiika ahha si hadiisi diingolama.

³ Niimpalukoda ngo miila siido koda ngoya khiilii kopa hendo ho Kristo kokii khiipa kobii lyijalo ngiika anubarmii atañ kiipa, ngiika henii-myanii atañ kiipa.

⁴ Mohlu Isrel miyu, ho mohlu oho pa lyido, tatukatu, ahhe-siinii, dapo mika binii, heriinii, ho hemme binii atañ mohlupa;

⁵ mohlu biloka aba-apa kokii, ho mohluka halu hokii, asiialyo kii dalyi lusu dokoda, hii Kristo. Pinii kapanemika kagiibo, hikha rumi lyankiñdo ayudahepa. Amen.

⁶ Hojalo siikasi Pinii aguñ hii golludo hiila make. Niimpalukoda hikha hutiina Isrel ka ohoasi hii Isrel hokii make,

⁷ ho hikha dado Abraham ka oho make niimpalukoda mohlu mohka ohoasi sii; hojalo “Isak kokii lake niika ohoasi mi myañkiñ donii.”

⁸ Siika lusaniisi hiilake siikasi asiialyo ka oho make hutiina Pinii ka oho nii, hojalo hemme biniiñ ka oho atañmi khiido ohoasi atañ hiila.

⁹ Niimpalukoda siikasi hemme binii hiila ludo, “Siika myodu atta ho ngo ahkur talyi ho Sarah oho biikiñdo.”

¹⁰ Ho hiila kontiima, hojalo niidana Rebeka wiinga giichinii miyu konepa kiilo, ngunuka aba-apa Isak,

¹¹ mohlu siisi biima ranjalo ho hang aya malo ayamanii miima jalo, Pinii ka kahe laka miigomi miipe kiine dupa, miigo miiko hopa ma hojalo mohmika gyoko hopa,

¹² mohmi lukotii, “Abañ hii anu mi miiho kendoke.”

¹³ Hiila ketola do, “Jakob mi ngo hendu, hojalo Isau mi ngo kanama.”

¹⁴ Nii hiilape ngunu luchi nii hokoda? Pinii kii dalyiho miingu miire tiipeha? Pema hiilama!

¹⁵ Niimpalukoda mo Mose mi lutii, “Ngo aroh talyi humina ngo aroh nandonii, ho ngo hembyuñ talyi humina ngo hembyuñ nandonii.”

¹⁶ Hopa siikasi miyu ka henko malo miinañko domake, hojalo Pinii ka aroh koke.

¹⁷ Niimpalukoda piniipota ho Paraoh mi ludo, “Ngo niimi miichatii niimpalukoda piigo kone lodapa ngiika harchichike mi niiko kakiñ dupa, niimpalukoda ngiika armyañ mi hikha kiiddiapiñ so gyuko kiine dupa.”

¹⁸ Hopa mo aroh du humina mo aroh nandonii, ho mo ahha mi alḛr dopa miidu humina mo miina donii.

Pinii ka Hadii la Aroh nyi

¹⁹ Ho Nunu ngiimi lukiñdo, “Niimpa mo siisijalo miikha niimi kaliñdu? Niimpalukoda hu mohka heniiñmi miitrḛ lakiñdo?”

²⁰ Hojalo nunu hu miyu, Pinii mi lukurlusi dopa? Puko tola ka duniibo punii bomi lukur lakiñ dopeha, “Niimpa no ngiimi sitañpa pudu?”

²¹ Piichañ puniibo niihtañpa miinañdo miila kema peha dekiñmi, dekiñ ahiñ hokiila kone mi kapyo dopa ho konemi dumiñ miita naniiñpa?

²² Hokoda Pinii matiirḛ, mohka hadii mi kakiñ nando koda ho mohka harchichike mi chinke nena dokoda, mo abuje pigiibiidola hadii ka piichañ mi pyadu dupa ka puniiñmi atiidu,

²³ mohka hempḛr tatukatu mi chinke nena la niimpalukoda aroh ka piichañ tula mi, nii mina mo pupyo tiinii tatukatu mika kapyo yaho,

²⁴ ngunu mitrḛ humina gyotii nii, Jew atañ hokii kontii mapa Midomiyu hokii tiirḛ?

²⁵ Hiila mo Hosea ho lutii, “Hutiina ngiika miyu manii Ngo gyochi ‘ngiika miyu,’ ho mohpa huna heniiñ jamanii Ngo gyochi ‘ngiika heniiñja.’”

²⁶ “Ho hiika lengo jaho nohna mohlumi lutiinii, ‘Nunu ngiika miyuma,’ mohlumi gyokiñdo ‘Turnii Piniika oho atañ.’”

²⁷ Ho Aijaya gyuritii Isrel ka piigopa: “Isrel ka wiinga atañ yasie siimie ka sumu kane dosu dojalo, lama hemisii mohlumi lyangur kensu donii;

²⁸ niimpalukoda Attoh halii kendo halii saniiñ hemi kiiddiapiñ so uropa ho menkiñdo.”

²⁹ Ho Aijaya ka lumyonii hiilyañ, “Attoh matiirḛ ngunumi himmetange apabima tiikoda, ngunu sodom hiilyañ tiido ho Gomora hiilyañ miiko tiido.”

Isrel la Ayapuyu

³⁰ Nii hiila pe ngunu luchinii, hokoda? Midomiyu atañ hutiina denki mi memanii hii hiimi kapa tiiku, hiika hii, denki henje kiilo;

³¹ hojalo Isrel hutiina denki mi metiinii dapo kii dalyi lo, hiikahii mepa kema dapo mi miipebiido latrḛ.

³² Niimpa? Niimpalukoda mohlu denki mi henje lo mema, hojalo hiika hii miigo kii dalyilo. mohlu liichi kotola do dotiñ yalañ ho,

³³ hiila keto la do, Kato, Ngo Zayon ho yalañ atii biilyi ke hiika hii miyu atañmi liichi kendo, yalañ hii mohlumi giihi dopa miikiñdo; ho huna mohmi henje donii hiimi pema hiinyañ mohi ho atii kema.