ROM MIKA POL KA SIITI KENIIÑ 6 - NITI GONTU N.T. (BSI)

Ingyamiigya ho shiitii Hojalo Kristo Agiñho Turdo

¹ Nii hiilape luchinii hokoda? Ngunu miikañ ari ingyamiigya mi miila dachi peha aroh-aya mi abuyapa doke nendupa?

² Pema hiila ma! Niihtañpa ngunu huna ingyamiigya ho shiitii kunii hiira hiiko sankañ la dachi?

³ Nunu chimapo hikha ngunu miilañru hutiina Kristo Jisu ko baptisma latii kunii hii mohka shiiniiñ ho baptisma latii hiila?

⁴ Ngunu mi alie tiiku mohka agiñho shiiniiñ hoka baptisma laniiñ ho, hopa niihtañpa Kristo shiiniiñ hokii turi tiiku Aba ka tatukatu lo, ngunu mitrḛ imbo ladopa niti sango ho.

⁵ Niimpalukoda ngunu matiirḛ mohka agiñho ahiñpa shiitii koda mohkii chulipa, ngunu tiirḛ mo agiñho ahiñpa mo chuli turiturku kendo.

⁶ Ngunu chindo ngunuka khu sanjugyaju hii mo agiñho leda leta kotii niimpalukoda ingyamiigya hii apo mi pyadu loke nendupa, ho ngunu hiika hiiba hokii ingyamiigyaniika miirapa lyikumadopa.

⁷ Niimpalukoda mo huna shiitii kunii hii ingyamiigya hokii tupya kotiiku.

⁸ Hojalo ngunu matiirḛ Kristo ka agiñho shiitii kukoda, ngunu henjedo ngunu tiirḛ mohka agiñho sambo kendo.

⁹ Niimpalukoda ngunu chindo Kristo mi turdo miitii shiinii hokii ho ronge tiirḛ shiiti keñkuma; shiiniiñ hii mohmi domiñ biila keñkuma.

¹⁰ Shiiniiñ mohka shiiniiñ hii ingyamiigya ho mo shiitii, hikha ronge pada, hojalo sango mohka saniiñ mo Pinii pa sando.

¹¹ Hopa nunu tiirḛ atohmi ingyamiigya ho shiitiiku hiila hensuto ho Pinii Kristo Jisu ko turdoku hiila.

¹² Hopa ingyamiigya mi niika lyusanii apo mi sangii kiineyo, niimi mohluka henii mi tadopa.

¹³ Iche tiirḛ nunuka asiialyo kone mitrḛ ingyamiigya ho miita nankoyo diimmah ka miitaluta naniiñpa, hojalo nunu atohmi Pinii koya tiilii siibito, hiika miyuatañ hiilyañ humina shiiniiñ hokii sango biku tiikunii, ho nunuka asiialyo mi Pinii ka denki mika miitaluta naniiñ paya biito.

¹⁴ Niimpalukoda ingyamiigya hii nunumi domiñ biila keñku make, niimpalukoda nunu dapo ka ura ho nyiku make hojalo aroh-aya ka ura hoke.

Denki ka Miira

¹⁵ Nii hokoda? Ngunu ingyamiigya miikañ talyiha niimpalukoda ngunu dapo ka uraho nyima hojalo aroh-aya ka ura hosu hiila? Pema hiila ma!

¹⁶ Nunu chimapo nunu matiirḛ konemijalo atohmi bilii siido koda luniiñ taniibo miirapa, nunu hiika miira ke huka luniiñ mina nunu tadonii, ingyamiigya ka, niihna shiigo ubu ho ingii donii, malo luniiñtanii kii ha, niihna denki dalyiho pagii donii?

¹⁷ Hojalo Pinii mi payapacho lusa, niimpalukoda nunu huna ronge ingyamiigya ka miirapa danenii, ahha jijelo luniiñtanii bopa lyidoku tonsḛr nii chulipa nii mina nunu tapa tiiku nii,

¹⁸ ho, ingyamiigya hokii tupya koku lala, denki ka miira pa lyido ku.

¹⁹ Ngo miyu ka lujju hoke ludu nii, niimpalukoda nunuka dumiñ henju giikopa. Niimpalukoda nunu niihtañpa ronge nunuka asiialyo miibḛr la dane ho uro yaya uro yaya ingyamiigya muju ho, hopa siisi nunuka asiialyo mi denki ka asopaya lyikenento dardḛkunii naniiñpa.

²⁰ Nunuka ingyamiigya ka miira paka darañho, nunu atoh henko miila ne denki mi lupa mapa.

²¹ Hojalo nunu nii pakur tiiku nunuka hiika drih atañ hokii nii mina nunu siisi hiinyañ la danii? Hiika drih atañka miijo hii shiigo ke.

²² Hojalo siisi nunumi tupya biilyi ke ingyamiigya hokii ho Pinii ka miira pa lyido ku, nunuka ahkur kuniisi dardḛkunii ho hiika hii dotḛr kuke, santḛrlamanii sango.

²³ Niimpalukoda ingyamiigya ka miijo shiigo ke, hojalo Pinii ka binyo paka ahmiñayiñ biniiñ hii santḛrlamanii sango ke Kristo Jisu ngunuka Attoh.