ROM MIKA POL KA SIITI KENIIÑ 14 - NITI GONTU N.T. (BSI)

Mihmi Halii Bilyayo

¹ Henje papo giinii miyu mi, mohmi ahgiito, hojalo lukaniimi chesu dupa mapa.

² Kone henje do mo kapanemi diila kendo hiila, hojalo ajju miyu hii hama kontiisii diisu dunii.

³ Hopa hiimi huna diido nii diima bomi khiipayo, ho huna diima nii hiitiirḛ diinii bomi ayakacho kayo; niimpalukoda Pinii mohlumi larii tiiku.

⁴ No hu ayakacho kaniipa lyido mika miira mi? Siikasi mohka atoh ka hata hosu lyikiñ siidonii mo dakiñ doha malo huyi kendoha. Ho mohmi seri kendo, niimpalukoda Atoh mohmi guriladopa miila kendo.

⁵ Miyu kone allo lohe mi aya yapa khiidu allo loheyami, hojalo miyu koneya hikha allo mi ahiñsiipa khiidu. Kone abi atoh ka ahha ho hiilasii loda hiila hengii to.

⁶ Hii huna allo lohe mi khiiniiñ yapa hendonii, hiimi khiike nento Attoh mi khiibii dola. Hii huna diidonii, diito Attoh mi khiibii dola, niimpalukoda mo Pinii mi payapacho ludo; hii hutiina diima nii, Attoh mi khiibii dola miito ho Pinii mi payapacho hiila luto.

⁷ Ngunu kone hetrḛ atoh pa sansu make, ho kone hetrḛ ngunu atoh pa shiisuma.

⁸ Ngunu matiirḛ sando koda, ngunu Attoh ko sando, ho ngunu matiirḛ shiido koda, ngunu Attoh ko shiido; hiikohopa, ngunu sanchi ha malo ngunu shiichi ha, ngunu Attoh kiiku.

⁹ Niimpalukoda siika sipa Kristo shiitii ho hiira turiturku tiiku, hiikohopa mo anye ruka Attoh pa lyikiñdo shiinii ho turnii katrḛ.

¹⁰ Niimpa nunu ayakacho kadu nunuka anubarmii mi? malo nunu, niimpa khiimahama miidu nunuka anubarmii mi? Niimpalukoda ngunu miilañru dakiñdo Pinii ka ayakacho kako duko ho;

¹¹ niimpalukoda hiila ketola do, “Ngiika sando so, Attoh ludo, koneabi ka liibañ ngiiko khañha kendoke, ho aguñ gonge abi assañ kendo Pinii mi.”

¹² Hopa kone abi ngunu luko siikiñ do atohka miiniiñ luniiñmi Pinii mi.

Mihmi Giihi Dopa Miilyayo

¹³ Hopa ngunu kone anyañmi ayakacho mi kasumasa, hojalo hiilaya lususa iche hetrḛ miitiñ miiko siimasa malo anubarmii ka lembo mi miitiñ bimasa.

¹⁴ Ngo chindo ho ngiimi yartiiku Attoh Jisu ko hangja kacho make danyopa; hojalo hiikahii kachodo hiipa huna hii kachodo hiila hendonii.

¹⁵ Niika anubarmii matiirḛ niika diiko hopa heru dokoda, no hensu niiho damake. Niika diiko hopa pema kone mi lyuhi kiineyo hupana Kristo shiibi tiinii.

¹⁶ Hopa niika ayado hiiniiñmi diimmah hiila armyañ myanke neyo.

¹⁷ Niimpalukoda Pinii ka raddeganda hii diigo la tango kiimake hojalo denki ho chimie ho hempyo ke Darii Yajiyallo agiñho;

¹⁸ mo huna Kristo mi miiho donii hii Pinii ka talii lasanii ho miyu atañka kahe kuniiñ.

¹⁹ Kiije ngunu hokoda niihna chimie giidonii hiimiya mesa ho niimpalukoda kone anyañ ka aya sako.

²⁰ Iche hetrḛ, diigotango pa, Pinii ka miigomi pyadu lyayo. Kapane lusu dokoda dariike, hojalo siikasi miikha doke koneabi huna khiibemiyu mi huhi dopa miidonii mohka diiniiñlo;

²¹ hopa yoh diima dokoda aya kendo malo ow tama dokoda malo hang drih jalo niihna niika anubarmii mi liichi giidonii.

²² Nunuka henje giiniiñ mi, atiito nunukala ho Pinii ka punkoho; hempyo kendo mo humina hang halii sanii giimanii atoh atohmi nii mina mo padotiinii.

²³ Hojalo mo huna hemmo donii hiimi khiilii tiiku, mo matiirḛ diido koda, niimpalukoda mo henje biidola miima; niimpalukoda niijalopa henje hokii lima hii ingyamiigya ke.