ROM MIKA POL KA SIITI KENIIÑ 11 - NITI GONTU N.T. (BSI)

Pinii ka Isrel Mika Aroh-ayanii

¹ Ngo takatii, hokoda, Pinii mohka hikha miyu atañmi khiipa tiiku ha ehna? Pema hiila ma! Ngotiirḛ Isrel miyu kone, Abraham ka ohoasi, Benjamin halu ka miyu kone.

² Pinii mohka miyu mi khiipama humina mo kapyo hokii chintii kunii. Nunu chimapo niihna piniipota hii Elija piigo mi ludonii, niihtañpa mo Pinii mi kutii Isrel mi chekhola?

³ “Attoh, mohlu niika nyibuhenii atañmi mentii, mohlu niika agyañ mi pyadutii, ho ngo kontiisii dasu dakunii, ho mohlu ngiika sango miilañmi mempa miido.”

⁴ Hojalo Pinii ka mohmika lusinii nii hiila? “Ngo ngiipa miyu jakkanuhe atii biidu Bal mika chukila heriimanii atañ hokii.”

⁵ Hopa siisika myodu hotiirḛ tonge darañ, aroh-aya loka kahenii.

⁶ Hojalo siikasi matiirḛ aroh-aya lokoda, hii miigo miiniiñmi henta nama; hiilamakoda aroh-aya hii aroh-aya pa lyikiñma.

⁷ Nii hokoda? Isrel atañ nii mina metiinii hiimi mepama. Kahekonii atañ mepatii hiimi, hojalo khiibe atañ talii nyamatii,

⁸ hiila ketola do, “Pinii mohlumi hendḛr lama niika yajiyallo bitii, amee mi kapalama dopa ho yaroo mi tapalama dopa, siilo ka allo lohepa.”

⁹ Ho David ludo, “Mohluka diitananii mi giimya la gyoh nyipa lyike nento, liichipodo ho miili naniiñpa mohlupa;

¹⁰ Mohluka amee mi micha kiineto niimpalukoda mohlumi kapa lama dopa, ho mohluka huhañ mi ayu dahepa poki dopa.”

¹¹ Hopa ngo takato, mohlu giihi tadadopa liichi neha ehna? Pema hiilama! Hojalo mohluka palle kopa sangopyako hii Midomiyu atañ ko ahdo, Isrel atañmi kariñkiine dupa.

¹² Siisi matiirḛ mohluka palle hii dohadolo mi mingo giido koda, ho matiirḛ mohluka miipelamanii hii Midomiyu mi mingo giido koda, niimkane abu kendo hikha mohlu ahgyo dokoda!

Midomiyu ka Sangopyako

¹³ Siisi ngo nunu mike Midomiyu atañ lurii dunii. Nii dahepa ngo Midomiyu koka kiiniñkonii pa lyichi, ngo ngiika miigomi assañ siichi

¹⁴ ngiika Jew ahiñ atañmi kariñkiine dupa, ho hiila miibiidola tonge mi lyangur kiine dupa.

¹⁵ Niimpalukoda mohluka khiipanii matiirḛ dohadolo mika yardiñgiiniipa lyigii dokoda, niilyigii kendo mohluka taliinii hojalo shiiniiñ hokii ka sango?

¹⁶ Yatañ bipyo japa ka biniiñ matiirḛ darii dokoda, hiichulipa hikha aphu hiitiirḛ ke; ho liima hii matiirḛ darii dokoda, hiichulipa halloh atañ tiirḛ ke.

¹⁷ Hojalo halloh tonge matiirḛ tatu neku koda, ho nunu, morey kutuahee, hiiko matiirḛ mohluka dosako hiimi gagyo biido koda santa chake nendupa kutuahee sannii hokii,

¹⁸ halloh atañ kiipa hentii siilyayo. Nunu matiirḛ hentii siido koda, hiila henge giito nunu liima mi tuge biima ke, hojalo liima ke nunumi tuge biidonii.

¹⁹ Nunu lukiñ do, “Halloh atañ tatu neku hopa ngiimi gagyo giido.”

²⁰ Hiika hii jije. Mohlu tatulineku niimpalukoda mohluka henje mako hopa, hojalo nunu dasuda henje kopa kontii. Hopa hentii nyayo, hojalo biiso biidola dato.

²¹ Niimpalukoda Pinii matiirḛ halloh jije miya opa makoda, nunu mitrḛ opakema ke.

²² Kagiito so Pinii ka helakala la kiinyi mi: kiinyi hii hiipa hutiina huhi nyatii kunii, hojalo Pinii ka helakala nunuko dolyi ke, nunumi bibii lyike mohka helakala ho dopa: hiilamakoda nunu mitrḛ papa kendoke.

²³ Ho khiibe atañ mitrḛ, mohlu henje tama hiila miikañ makoda, gagyo liibii kendo, niimpalukoda Pinii ko hiika harchichike hii do mohlumi hiira gagyo liibii ladopa.

²⁴ Niimpalukoda matiirḛ nunumi morey kutuahee sannii hokii pabii tiikoda, ho gagyo liitii, dumiñ sanju mi miikhola, alinii kutuahee sannii ho, niimkane siika jije sancha nii halloh atañ miya gagyo gakur liila kendo mohluka atoh kutuahee sannii ho.

Pinii ka Aroh Hikharuko do

²⁵ Hiilamakoda nunu atohmi chilanii hiila hensu kendo nunuka atoh hentiisiiniiho, ngo nunumi siika lukolamanii drih mi chinke nenado, anubarmii atañ: henjelamanii ahha hii Isrel tange ko ahla do, nii dahepa hikha Midomiyu atañ ahtema,

²⁶ ho hopa hikha Isrel hii lyangur kokiñdo; hiila ketola do, “Tupya nii Zayon hokii ahkiñdo, mo hikha diimmahkacho mi Jakob kokii lapa kendo”;

²⁷ “ho siikasi ngiika hemmesiiniiñ ke mohluka agiñho niidana ngo mohluka ingyamiigya atañmi lapa bichi nii.”

²⁸ Ayapuyu mi henkako mohlu Pinii mika ahha-banii, nunu kiipa; hojalo kaheniimi kako mohlu heniiñja mohluka aba-apa atañ kiipa.

²⁹ Niimpalukoda ahmiñayiñ atañla Pinii ka gyoniiñ nyi lugu make.

³⁰ Si chulipa niihtañpa nunu ronge Pinii ka luniiñ tamapa dane hojalo siisi aroh mi larii tiiku mohluka luniiñ tama kopa,

³¹ hopa mohlu siisi luniiñtamapa dasu dajalo niimpalukoda nunu mika aroh kakiñ nii hiilyañpa mohlutrḛ aroh mi larii ladopa.

³² Niimpalukoda Pinii hikha miyu atañmi luniiñtama niiho atii yatii, niimpalukoda mo miilañ rumi aroh dupa hiila.

Pinii mi Assañto

³³ O niimkane urañ Pinii ka mingo ho chila ho chiniiñ! Niitañ mechilamanii mohka ayakacho mika kaniiñ ho niihtañ lukolamanii mohka lembo!

³⁴ “Niimpalukoda hu Attoh ka henju mi chila kendo, malo hu mohmika lulyañ bopa dune?”

³⁵ “malo hu mohmi ahmiñayiñ mi bitii mo bili kodupa hiila?”

³⁶ Niimpalukoda mohkokii ho mohkiilo ho mohpa hikha drih atañsi. Mohmi assañ kencho kolyuñkolo dahepa. Amen.