PILIPIA 3 - NITI GONTU N.T. (BSI)

Jije Denki

¹ Kamijapa, ngiika anubarmii atañ, Attoh ko hempyoto. Ngiipa hang hadii kapama keniiñ akomi hiira nunu paka ketila lyiniiñsi, ho hii nunuka aya kiipake.

² Akie atañmi kage siila tiika ah, diimmah miigo miinii atañmi kage siila tiika ah, hutiina asiialyo mi pamiilodo nii kage siila tiika ah.

³ Niimpalukoda ngunu jije mitupipakoniiñ, huna Pinii mi yajiyallo lo heriidonii, ho Kristo Jisu ko assañ kodunii, ho asiialyoho hentiñ siimanii.

⁴ Ngiiko atohko asiialyo paka hentiñ naniiñ piigorago tiirḛ giisu dojalo. Khiibe miyu ko matiirḛ asiialyo mika hentiñnanii piigorago giido hiila hensu dokoda, ngiiko abuyapa giido:

⁵ mitupikotii lopinye niika allo ho, Isrel ka miyu, Benjamin halu hokii, Hebrew loka bukonii Hebrew; dapo ho lusudokoda Parisi kone,

⁶ miichiloda heniiñ pakoda gyoliñkonii mika miihimiirebo ako, dapo ka ura denki hiila khiiko talyi ludo koda hang pahañhalii sanii giima.

⁷ Hojalo niijalo ngo miiliibiitii, ngo hiimi miikho siitii khiichi Kristo kiipa.

⁸ Jije ludokoda ngo kapanedrih mi alyu siitii luchi niimpalukoda hiimitiirḛ khiiniiñya ngo chingiitii Kristo Jisu ngiika Attoh mi. Mohkiipa ngo heru hembitii alyu siila hikha drih atañmi, ho hiika atañmi ma hiila khiitii, niimpalukoda ngo Kristo mi padupa

⁹ ho mohko kapa kodupa, ngiika atohka denki kopa mapa, dapo mi khiita nala, hojalo niihna henje kiilonii Kristo ko, denki Pinii kokii nii mina henje ho henta nandonii;

¹⁰ niimpalukoda ngo mohmi chindupa ho mohka turiturku niika harchichike mi, ho mohka heru mi henche mondupa, mo chuli lyidupa mohka shiiko ho,

¹¹ miila lyimilo ngo shiiniiñ hokiika turiturku niimi kapa dupa.

Khukodalyi Hoka Harniiñ

¹² Ngo siika siimi kapatiiku hiilama malo digoabiayaku hiilama; hojalo ngo miikañari miidu siika siimi ngiipa miibii dupa, niimpalukoda Kristo Jisu ngiimi mo atoh kiipa miitii ku.

¹³ Anubarmii atañ, ngo hiila hensuma ngo siika siimi ngiipa miitii ku hiila; hojalo drih kone ngo miichi, kiiliñ ho nii do hiimi helyu talyi ho niihna hataho donii hiimi medupa miichi,

¹⁴ Ngo uroyapa miichi ahmiñayiñ mi lariidupa, ayoh dalyi hokii ka Pinii ka gyoniiñ mi Kristo Jisu ko.

¹⁵ Kiije ngunu hutiina hengḛr nyadonii siika henju siimi giisa; ho hang drih matiirḛ nunu yoheyapa henju giido koda, Pinii hiimi tiirḛ nunumi kakiñ kendoke.

¹⁶ Kiije ngunu jijemi kontii biisa nii mina ngunu biido nii.

¹⁷ Anubarmii atañ, ngiika miiko miijo monto, ho hiika atañmi kaho giito huna nunu chikañ sandonii ngunuka punkoho katiñ naniiñpa.

¹⁸ Niimpalukoda abuje, humina ngo kiirañ nunumi luko tonii ho siisi ada mila bibii dola lukodu, sala danyada Kristo ka pogyañ mika ahha banii atañpa.

¹⁹ Mohluka kamikalo hii pyaduloko saniike, mohluka pinii hii erre ke, ho mohlu assañ siinyada mohluka hiinyañ mohiho, kiiddiapiñ ka drih atañka henju agiñho henta liigii tola.

²⁰ Hojalo ngunuka atoh ganda hii dariiganda hoke donii, ho hiiko hokii ngunu Lyangur bomi kalyadu, Attoh Jisu Kristo mi,

²¹ huna ngunumi miigu kendonii khiima nii ahuapo hokii mo chuli tatukatu apopa, hiika harchichike lo nii lona mohmi hikha drih atañmi mohka ura ho dopa miilii giidonii.