MIINIIÑ 8 - NITI GONTU N.T. (BSI)

¹ Ho Sol mohka shiiniiñ mi ḛh hiila talii biido Ho hiika allo ho hempḛr uro miihimiire miiri nyatii Jerusalem daka gyoliñkonii atañmi; ho mohlu hikha harpya harsa haja giitii Judia ho Samaria gandaho, kiiniñkonii atañmi apalala.

Sol Gyoliñkonii Atañ mi Miihimiire Biido

² Henjenii miyuatañ Stepen mi alie tiiku, ho mohpa hempḛr heru nyatii.

³ Hojalo Sol gyoliñkonii atañmi pyadu lopa miitii, ho ude pinge abi ahla, mo nyimii milobomi seliñ lala ho mohlumi patiihude ho tuntii.

Ayapuyu mi Samaria ho Tonsḛrtii

⁴ Siisi hutiina harpya harsa giitiinii ayapuyu mi tonsḛr tala intii.

⁵ Pilip Samaria citi ho totii, ho mohlumi Kristo piigo mi gyukotii.

⁶ Ho miyutaropa miilañru tongepa tage nyatii niihna Pilip lutiinii, mohlu mohka luniiñmi tala lala ho kagiñnanii mohka miiniiñmi kappatii.

⁷ Niimpalukoda kacho yajiyallo abuje miyu kokii lintii ku hutiina jarpiñ kobii tiinii, hempḛr uropa gyubii dola; abuje hutiina liikuñlamu tiinii ho liicha tiinii hempyo nyatiiku.

⁸ Hopa hiiko hempḛr hempyo nyatii citi ho.

⁹ Hojalo hiiko miyu kone Saimon hiila datii mo kapyo ho ashu miila citi ho datii ho Samaria ganda mi hemur dopa miitii, lubiidola mo attoh tiirḛ kahe kone ke hiila.

¹⁰ Mohlu hikha mohmi tage nyatii, atu hokiila khiiri biila kaheja lohepa, lubiidola, “Siika miyu ko hiika Pinii ka harchichike giidonii mina Kahe hiila ludu nii.”

¹¹ Ho mohlu mohmi tage nyatii, niimpalukoda hempḛr myodu abuje mo mohlumi hemur dopa miitii mohka ashu miiniiñlo.

¹² Hojalo mohlu Pilip ka tonsḛr niimi tajetii ayapuyu Pinii ka raddeganda piigo ho Jisu Kristo ka armyañ mi, mohlu baptisma latii, nyimii milobo pada.

¹³ Saimon mo tiirḛya henjetii, ho baptisma laku lala mo Pilip ka agiñ dabo montii ku. Ho kagiñnanii ho hempḛr kahe miimalyanii miiniiñmi kala la, mo hemurtii.

¹⁴ Siisi kiiniñkonii atañ Jerusalem ho Samaria Pinii ka aguñmi talii do hiila tapa lala, mohlu Pitar la Jon nyimi mohluko kiiniñtii,

¹⁵ mo anye totii ho mohlupa kubitii mohlumi Darii Yajiyallo mi larii kiine dupa;

¹⁶ niimpalukoda siisi lohe pa mohluko kone kotrḛ ahma tiirañ, hojalo mohlu baptisma kontii lato la dotii Attoh Jisu ka armyañ pa.

¹⁷ Ho mohlu mohluka alah atañmi mohluko tencha tii ho mohlu Darii Yajiyallo mi lariitii.

¹⁸ Siisi Saimon Yajiyallo biniiñ mi kapa lala kiiniñkonii atañka alah tencha niilo, mo mohlumi tiicko biso lubiido,

¹⁹ lubiidola, “Ngiimi tiirḛ siika harchichike mi bipe, niimpalukoda hukohona ngo ngiika alah mi tenga talyi nii hiimi Darii Yajiyallo larii dopa.”

²⁰ Hojalo Pitar mohmi lutii, “Niikatiicko mi niika agiñho lyuke nento, niimpalukoda no hendo no Pinii ka ahmiñayiñ mi tiicko lo lala todo hiila!

²¹ Niiko hang giita momake malo lyimake siika miigo so, niimpalukoda niika ahha hii Pinii kata ko denki make.

²² Henkur to hopa siika niika diimmah hokii, ho kuto Attohmi, miila kendo milo, niika ahha daka heniiñmi niimi hello dokupa.

²³ Niimpalukoda ngo kapado no poteje kariñ giido ho ingyamiigyaniilo rabii kotola biido.”

²⁴ Ho Saimon lusitii, “Ngiipa kutope Attoh mi, niihna no lutiinii hiimi ngiiko hang ahma dopa.”

²⁵ Siisi mohlu pyakotiiku ho Attoh ka aguñmi luku lala, mohlu Jerusalem ho chakur tiiku, ayapuyu mi abuje Samaritan atañka lemba ho tonsḛr biidola.

Pilip la Itopia Daka Sabii

²⁶ Hojalo Attoh ka miidopopi Pilip mi lutii, “Gurito ho inge ahadalyi lembo ho Jerusalem hokiila Gaza toko dalyiho.” Siikasi siikhiisuru lembo ke.

²⁷ Ho mo guritii ho intii. Ho kato, Itopia kone, eunuch, Kandace hoka miigiilugiibo, Itopia ka nyimiiradde, mohka hikha alḛrdrih mika kabibo, Jerusalem ho ahtii heriidupa

²⁸ ho ahkurkula dotii; goragari ho mo dutii, mo nyibuhenii Aijaya mi purila dotii.

²⁹ Ho Yajiyallo Pilip mi lutii, “Change ho siika goragari ho chabo monge.”

³⁰ Hopa Pilip mohmi harbo montii, ho nyibuhenii Aijaya mi purila dopa tapatii, ho takatii, “Niika puriniimi no chindu ha?”

³¹ Ho mo lutii, “Niitañpa ngo chinchi, nii dahepa kone ngiimi luko tama?” Ho mo Pilip mi gyochatii ho mo agiñho dubotii.

³² Siisi piniipota hokii nii mina mo ritiinii hiikahii sike: “Subuñ mi mendu pa ingiitii malo subuñatupa hiika amoo pinii rubido, hopa mo mohka aguñmi gonko ma.

³³ mohmika ensupiira miipa koho mohmi ayakacho kaku matii. Hu mohka halugiira mi luko lakiñdo? Niimpalukoda mohka sango mi kiiddiapiñ hokii ingii tiiku.”

³⁴ Ho eunuch Pilip mi lutii, “Humi na, kutote ludonii, siika nyibuhenii si, mo atoh mipeha malo mi khiibe miya peha ludonii?”

³⁵ Ho Pilip mohka aguñmi gonkotii, ho siika piniipota ka kapyo jaho hokii mo Jisu ka aya puyu mi lukotii.

³⁶ Ho mo anye lembo ila dokele mo anye yasie aruñho ahtii, ho eunuch lutii, “Kato, si yasie! Nii ngiika baptisma lasa niimi lutiñ lakiñ kendo?”

³⁸ Ho mo goragari mi domo tote hiila lubiido, ho anyeru tola yasie ho ahtii, Pilip la eunuch nyi, ho mo mohmi baptisma bibiido.

³⁹ Ho mohlu yasie hokii chaku kiile, Attoh ka Yajiyallo Pilip mi gatubiitii ku; ho eunuch hiikahiiba ho mohmi kapa kumatii, ho mohka lembo ho intiiku hempyo biidola.

⁴⁰ Hojalo Pilip mi Ajotas ho kapa biido, ho impobiila dola mo tonsḛrtii ayapuyu mi hikha taun ho mohka Kaesarea hoka ahchi menda hemi.