MIINIIÑ 7 - NITI GONTU N.T. (BSI)

Stepen ka Luniiñ

¹ Ho bukuñ nyibu lutii, Siikasi hiila?

² Ho Stepen lutii: anubarmii ho aba atañ, ngiika luniiñmi tato. Pinii hudakhada ngunuka aba Abraham ko ahtii, mohka Mesopotamia hoka daho, Haran hoka duma rampa,

³ ho mohmi lutii, Niika gandaho niika uru atañmi apa tela hokii inge gandaho nohna niimi ngo kakiñ talyi nii.

⁴ Ho mo iritii Chaldean ganda hokii, ho Haran ho dutii. Ho mohka aba shiiku lala, Pinii mohmi hiiko hokii nempa lintii siika ganda so nohna nunu siisi dunii;

⁵ hojalo mo mohmi hang gandanencha hokii bimatii, alih dahe tiirḛ, hojalo hemmetii siimi niipa bichi ke ho niika ohoasi niika hiiba hoka ahsabomi, mohkii oho nyima siitrḛ.

⁶ Ho Pinii hiila lutii, mohka ohoasi hii nyibo pa lyila mihka gandaho dukiñdo, mohlu miira lyila dukiñdo ho nyang lampe mohlu khiima pama miiko kendo.

⁷ Hojalo ngo ayakacho kachi ganda mi humina mohlu miiho talyi nii, Pinii lutii, ho hiika hiiba ho mohlu linku la ho siika lengo so ngiimi herii kendo.

⁸ Ho mo mohmi mitupipa niika hemmesiiniiñ mi bibiido. Ho Abraham Isak ka aba pa lyitii, ho allo lopinye niiho mohmi mitupipatii; ho Isak Jakob ka aba pa lyitii, ho Jakob alyañlenye aba-apa ka aba pa lyitii.

⁹ Ho miloboatoh atañ, Josep mi kariñtii, Egip ho pyutii; hojalo Pinii mo agiñho dabo montii,

¹⁰ ho mohmi hikha mohka ahiare hokii papyabitii, ho mohmi Paraoh Egip ka radde, ka kata ho kaji dopa ho chila mi bitii, huna mohmi Egip ka govonor ma miitii ho hikha mohka ude mi kabii niipa.

¹¹ Ho hiiko hikha Egip ho Kanan ho diime ahtii, ho hempḛr pamyotakho, ho ngunuka aba atañ diigo kapa matii.

¹² Hojalo Jakob Egip ho emmo do hiila tapa lala, mo ngunuka aba atañmi kapyopa kiiniñtii.

¹³ Ho ronye niipaka ahlyi ho Josep attohmi chindopa miisu tiiku mohka anuabañ atañmi, ho Josep ka uru atañmi Paraoh chintiiku.

¹⁴ Ho Josep kiiniñ lala ho mohka aba Jakob ho hikha mohka henii-myanii atañmi mohko gyolii biido, kanukhange la lyangohe miyu atañmi;

¹⁵ ho Jakob Egip ho totii. Ho mo shiitii, mo atoh tiirḛ ho ngunuka aba atañ tiirḛ

¹⁶ ho mohlu Shechem ho joku liibii tiiku ho byuh atiitii Abraham ka rupu laka Hamor ka oho atañ kokiika Shechem hoka riiniiñho.

¹⁷ Hojalo hemme binii myodu tunii lyikunii, nii mina Pinii Abraham mi bitiinii, miyuatañ taro ritii ho Egip ho bupya busatii

¹⁸ Egip koneya radde Josep mika kachiñ manii ka sari menda hemi.

¹⁹ Mo ngunuka miyu atañmi kana mapa miitii ho ngunuka aba atañmi chechepa mohluka wiinga ajañ atañmi lukope lutii, mohlu mempa dupa.

²⁰ Siika myodu so Mose mi biitii, ho Pinii ka hataho kapyotii. Ho mohmi mohka aba ka ude ho piilo bariñhe asotii;

²¹ ho mohmika chimpa lyikuho, Paraoh ka nyimii wiinga mohmi mohka attoh wiinga hiilyañpa asotii.

²² Ho Mose mi hikha Egip daka chila mi lukotii, ho mo tamochikhotii mohka luniiñ ho miiniiñ atañ ho.

²³ Mo nyang alyañpiilye kukele, mohka ahha ho mohka anubarmii Isrel ka oho atañ ko, soha dokoda hiila hentii.

²⁴ Ho hiikohokii kone mi miigya dopa kapa lala, mo hensḛrkadu miyu mi miipyatii ho mohmi miilitii membiidola Egip dakii bomi.

²⁵ Mo hiila hentii mohka anubarmii atañ hela dudo Pinii mohlumi tiipya kendo ngiika alah lo hiila, hojalo mohlu chimatii.

²⁶ Ho allo lohe yaho mo mohluka gasu ko ahtii ho mohlumi lyartii, lubiidola, Miyu atañ, nunu anubarmii siike, niimpa nunu kone anyañ gasu nyado?

²⁷ Hojalo hu miyu na aya mapa ariapii mi miitiinii mohmi nempa lintii, lubiidola, Hu niimi ngunumi sangiinii ho ayakacho kaniipa miitii?

²⁸ No ngiimi tiirḛ mempa hendoha biilyo ka Egip miyu mika mencha ho?

²⁹ Siika luniiñmi tapa lala Mose hagii tiiku, ho mompakoniiñ pa lyila Midian ka gandaho datii, nohna mo oho anye ka aba pa lyitiinii.

³⁰ Siisi nyang alyañpiilye nyanja kukele, miidopopi kone mohko ahtii Sinai Putoo daka jabyo ho, tareapya ho yamu miilyo chuli.

³¹ Mose siimi kapa dala la mo hemurtii; ho mo kadḛr dupa aruñ ahde kiile, Attoh ka luniiñ mohka ahtii,

³² Ngo niika aba atañka Pinii ke, Abraham ka Pinii ho Isak ho Jakob ka. Ho Mose alyetii ho kadu pa haro matii.

³³ Ho Attoh mohmi lutii, Niika alih hokii luku mi khepato, niimpalukoda niika dako lengo si darii lengo ke.

³⁴ Ngo ngiika miyuatañ mika miihimiire niimi kapa doke Egip hoka dunii atañmi ho mohluka kheniiñ mi tapa doke, ho ngo mohlumi papya dupa todu. Ho siisi ahto, ngo niimi Egip ho kiiniñso.

³⁵ Siika Mose humina mohlu luniiñ tama tiinii, lubiidola, Hu niimi sangiiniipa ho ayakacho kaniipa miitii? Pinii anyerupa sangiinii ho papyaniipa kiiniñtii miidopopi ka alah lo tareapya ho mohko ahla.

³⁶ Mo mohlumi lingii tiiku, Egip ho kahotamo ho kagiñnanii miibii dola ho Lanchañ Siimie ho, ho jabyo ho nyang alyañpiilye anyañ.

³⁷ Siika sike Mose huna Isrel miyu atañmi lutiinii, Pinii nunupa nyibuhenii nunuka anubarmii hokii sucha bikiñdo niihtañpa ngiimi suchatii.

³⁸ Siika sike hii huna jabyo daka miyu apurho danenii miidopopi ka agiñho mohmi Sinai Putoo ho lune, ho ngunuka aba atañ agiñho; ho mo turnii aguñ tapatii ngunumi bidupa.

³⁹ Ngunuka aba atañ mohmi talii matii, hojalo mohmi nempa lala, ho mohluka ahha Egip dalyi hoya henga tii,

⁴⁰ Aron mi lubiidola, Ngunupa pinii atañmi putope ngunu mika impyo giiniipa; siika Mose pakoda ngunu mika Egip ganda hoka lingii bosi, ngunu chima mo nii lyido hiila.

⁴¹ Ho hiika allo ho mohlu subuñ atu dore putii, ho puchiniimi membitii ho mohluka alah loka miiniiñmi hempyo biinya tii.

⁴² Hojalo Pinii mokurtii ho mohlumi yapuñ daka takḛr mi herii dopa bitii, nyibuhenii kheta hoka keniiñ chulipa: Nunu ngiimi achu-amyo pakhii niimi la ho membi niisi miya bidu nii, nyang alyañpiilye jabyo ho, Isrel daka miyuatañ?

⁴³ Ho nunu Moloch ka tabyo mi pyatii, ho Rephan uyi ka takḛrmi, nunuka herii talyi hiila ka miichi nii; ho ngo nunumi Babilon ka agoho nempa talyi.

⁴⁴ Ngunuka aba atañ kii haki bina nanii tabyo jabyo ho dotii, Mose mika lurii bo lohepa mohmi siimi pento hiila lune, mohka kapanii chulipa.

⁴⁵ Ngunuka aba atañ hiimi Josua ka agiñho biilii mohluka gandasiiko mika pyadula miilyiho Pinii ka mohlumi ka nempa lyiho ngunuka aba atañ hataho. Hopa hiika hii David ka allo lohepa dotii.

⁴⁶ huna Pinii ka kata ho kaji kotiinii ho kutii Jakob ka Pinii ka dugii nanko pa meto hiila.

⁴⁷ Hojalo hiika hii Solomon tii huna ude mi mohpa peniiñ.

⁴⁸ Hojalo Hempḛr Kayeja alah loka ude peniiñ ho duma ke; nyibuhenii ka luchañ ho,

⁴⁹ Dariiganda hii ngiika duta nangko, ho kiiddiapiñ hii ngiika alih dagiñ nangko. Niitañ ude nunu ngiipa pempa, Attoh lutii, malo niihtañ ka dumo ko ngiika dumo sako?

⁵⁰ Hikha siika drih atañsi ngiika alah loka puniiñ masuha?

⁵¹ “Nunu henje manii miyuatañ, mitupipakomanii ahha ho yaroo atañ, nunu kiirañ Darii Yajiyallo mi mompa siida. Nunuka aba atañ miichañ ho, nunu tiirḛ.

⁵² Nii nyibuhenii atañmi nunuka aba atañ miihimiire mane? Ho mohlu mempa biine huna lupyo la luko nenii Denki Kone ka ahsa niimi, humina nunu siisi talubalo tiinii ho mentiinii,

⁵³ nunu huna dapo mi larii tiinii miidopopi ka biniiñmi ho hiimi atiima.”

Stepen mika Yalañ Kuniiñ

⁵⁴ Siisi mohlu siika drih atañmi tapa lala mohlu hadii ritii, ho mohlu mohluka aih mi mohlumi hadiila nyensutii.

⁵⁵ Hojalo mo, Darii Yajiyallo poteje giitola, yapuñhaho ho kachatii ho Pinii ka hudakhada mi kappatii, ho Jisu Pinii ka lahbi alah ho datii;

⁵⁶ ho mo lutii, “Kato, ngo dariiganda mi miiko dopa kapa do, ho miyu ka Oho Pinii ka lahbi alah ho dapa.”

⁵⁷ Hojalo mohlu hempḛr uropa gyutii ho mohluka yaroo mi tage mapa ho bulu hiido tongepa mohko haratii.

⁵⁸ Ho mohlu mohmi citi ka agoho jopa limbiido ho mohmi yalañ kubiido; ho haki atañ mohka abitarii atañmi yapa atu koneka alih ho atiitii Sol hiiniiñboko.

⁵⁹ Ho mohluka Stepen mi yalañ kula dopa, mo kutii, “Attoh Jisu, ngiika yajiyallo mi larii to.”

⁶⁰ Ho mo liibañ khangatii ho hempḛr uropa gyutii, “Attoh, siika mohluka ingyamiigya mi mohlumi halii lyayo.” Ho mo hiila siimi lula la, mo shiihi tiiku.