MIINIIÑ 6 - NITI GONTU N.T. (BSI)

Kanuhe Hembyuñnii

¹ Siisi hiika allo atañ ho henjeajiñ atañ taro yaya kiile, grik aguñ lunii atañ budubudu luritii Hebrew atañmi niimpalukoda mohluka hiimi atañmi allokamya diigo biko bigo dola hiila.

² Ho alyañlenye henjeajiñ atañka apur mi gyotii ho lutii, “Siikasi aya make ngunu Pinii ka aguñ mika tonsḛr niimi ka apa niisi diigo tango hodupa.

³ Hopa, anubarmii atañ, nunuka punko hokii kanuhe denki miyu hokii kaheto, poteje Yajiyallo ho chila giinii hokii, hiimi ngunu siika miigo pa kahesa.

⁴ Hojalo ngunu attohmi kuniiñ sola ho piniipota lugo soya hengasa.”

⁵ Ho mohluka niihna lutiinii hikha miyuatañ mi hempyo lupa tii, ho mohlu Stepen mi kahetii, poteje henje ho Darii Yajiyallo giinii miyu, ho Pilip, ho Prokorus, ho Nikanor, ho Timon, ho Parmenas, ho Nikolaus, Antiok hoka Midomiyu.

⁶ Siika atañmi kiiniñkonii atañka hataho nelii bitii, ho mohlu kubitii ho mohluka alah mi mohluko tengatii.

⁷ Ho Pinii ka aguñ uroyaya tapatii; ho Jerusalem ho henjeajiñ khiikako hempḛr uropa taroyaya tii, ho hempḛr abuje nyibu atañ luniiñ taliitii henje mi.

Stepen mika Latuniiñ

⁸ Ho Stepen, poteje aroh-aya ho harchichike giitii, abuje kahotamo ho kagiñnanii atañmi miitii miyu atañka punkoho.

⁹ Ho tonge hutiina sinagog hoka dubonii dasḛrmiyu hiila gyoko nii atañ, ho Sairenian atañ, ho Alejandar daka dunii atañ, ho Asia daka Silisia hokii, guritii ho Stepen mi cheritii.

¹⁰ Hojalo mohlu chemi lamatii mohka chila ho Yajiyallo agiñ hoka mohka luniiñmi.

¹¹ Ho mohlu chimpa mapa miyu atañmi luto lutii, hiika lutii, “Ngunu tapato mohmi Mose la Pinii nyimi aya mapa ludo pa.”

¹² Ho mohlu miyu atañmi ho amiabañ atañmi ho pagenii atañmi luhu luhatii, ho mohlu mohko ahtii ho mohmi latutii ho mohmi bulyañ ka hataho selii biitii,

¹³ ho amuh hakibinii pa atiitii hii lutii, “siika miyu si siika darii lengo la dapo nyimi chekhola lula lungu ma lodake;

¹⁴ niimpalukoda ngunu tapato mohka lunii mi siika Nazaret daka Jisu siika lengo siimi pyadu lokiñ do hiila, ho Mose ka ngunu mika muju lujju biniiñ mi miigu kendo hiila.”

¹⁵ Ho mohmi kaditii, hikha bulyañ hoka dunii atañ kappatii mohka nyimo hii miidopopi ka nyimo hiilyañtii.