MIINIIÑ 3 - NITI GONTU N.T. (BSI)

Liichanii Myadonii Kone mi Miipya Biido

¹ Siisi Pitar la Jon nyi piniiude ho kuniiñ myodu ho intii, alyiñdalyi ka gunta tahiñho.

² Ho miyu kone bulyi hokii ka liichanii jolii biitii, humina allo dadu mi mohlu piniiude ka hagya Anokapyo lunii ho atiitii piniiude hoka ahnii atañ kokii myado kiine dupa.

³ Pitar la Jon nyimi piniiude ho ila dopa kapa lala, mo myatii.

⁴ Ho Pitar mohka amee mi mohmi kadi dopa kapa lala, Jon ka agiñho, ho lutii, “Ngiinyi mi kato.”

⁵ Ho mo mo anye mi mo kaditii, hang ako bilyido hiila mo anye kokii.

⁶ Hojalo Pitar lutii, “Ngiiko rupu la ayyiñ nyi nyima, hojalo ngiiko nii do ngo niimi bichi; Nazaret daka Jisu Kristo ka armyañ pa, into.”

⁷ Ho mo mohmi lahbi alah lo gala lala ho mohmi seritii; ho ohepada mohka alih la liigḛr nyi tamo ritii.

⁸ Ho gurila mo datii ho intii ho mo anye agiñho piniiude ho ahbo montii, imbiidola ho pobiidola ho Pinii mi assañtii.

⁹ Ho hikha miyu mohmi indopa ho Pinii mi assañdopa,

¹⁰ ho mohmi kala nyatii piniiude aruñ daka Hagya Kapyo hoka myado laka dunii bo hiila; ho mohlu kahotamo nyatii ho aluñ tii mohkoka lyiniiñmi.

Pitar ka Piniiude Hoka Puyu

¹¹ Mohka Pitar la Jon nyimi poba la dorañpa, hikha miyuatañ mohluko haratii Solomon kii lunii lembo ho, aluñbiidola.

¹² Ho Pitar hiimi kapa lala mo miyu atañmi luriitii, Isrel daka miyuatañ, niimpa nunu kahotamo nyadu siimi, malo niimpa nunu ngunumi kadi nyada, ngunuka atoh harchichike lo malo darii henju loka mohmi indo pa miitiinii hiilyañ?

¹³ Abraham ho Isak ho Jakob ka Pinii, ngunuka aba-apa ka Pinii, mohka miira Jisu mi assañdiilañ tii, humina nunu bipatiinii ho Pailet kado pa mapa tiinii, mohka mohmika apa paka miilyiho.

¹⁴ Hojalo nunu Darii ho Denki kone mi mapa tiinii, ho miyu menii miya nunupa kutii,

¹⁵ ho sango mika Keniiñ bomi ya mentii, humina Pinii shiiniiñ hokii turidopa miitii. Siimi ke ngunu haki bidu nii.

¹⁶ Ho mohka armyañ pa, mohka armyañ mi henje biidola, siika miyu siimi tamo dopa miitii humina nunu siisi kapa biido nii ho chindonii; ho henje hii Jisu kokiila siika miyu mi hempḛr aya dopa miitii hikha nunuka kadopa.

¹⁷ Ho siisi, anubarmii atañ, ngo chindo nunu chima pa miitii, nunu mika sangii botrḛ.

¹⁸ Hojalo niihna Pinii hikha nyibuhenii atañlo lutii nii, mohka Kristo heru henkiñdo, mo hiimi miipetii.

¹⁹ Henkurto hopa, ho ahkur toku, niimpalukoda nunuka ingyamiigya niimi hello kodu kupa, jojo myodu ahkiñ doke Attoh ka dabo monii hokii.

²⁰ ho mo Kristo mi nunupa kiiniñ bikiñ doke, Jisu mi,

²¹ mohmi dariiganda ho atiibiikiñ do hikha miipe menda hemi Pinii ka darii nyibuhenii atañ mika lugiñ nala luniiñmi kolyuñkolo hoka.

²² Mose lutii, “Attoh Pinii nunupa nyibuhenii seri bikiñ doke nunuka anubarmii hokii niihtañpa mo ngiimi seritii. Nunu mohka luniiñmi tatolya niijalo mo nunumi luchi.

²³ Ho hiila lyikiñdo yallo kone abi siika nyibuhenii ka luniiñmi tama koda pyadu lokiñdo miyuatañ kokii.

²⁴ Ho hikha nyibuhenii atañ hutiina lutiinii, Samuel kokii khiiri biila ho huna hiika hiiba ho ahtii nii, siilo jalo gyuko dorañ.

²⁵ Nunu nyibuhenii atañka oho atañ ho hemmesiiniiñ nunuka aba atañ mika Pinii ka biniiñ, Abraham mika luniiñ, ‘Ho niika ohoasi hokii hikha kiiddiapiñ daka uru atañmi lyankiñdo.’

²⁶ Pinii, mohka miira mi seritii, kapyopa nunuka kiiniñ bitii, nunumi lyandupa nunu kone abimi nunuka diimmah hokii henkur kiine dupa.”