MIINIIÑ 24 - NITI GONTU N.T. (BSI)

Pol mika Lugo Luliiniiñ

¹ Ho allo longohe dala la bukuñ nyibu Ananias totii amiabañ atañ la lugiibo agiñho, Tertulus hiiniiñbo. Mohlu govonor ko ahtii bitii Pol mi chekhola lugomi;

² ho mo gyokele, Tertulus mohmi halii ribiido, lubiidola: “Niiko hokii ngunu abuje chimie mi hempyo biitiike, ho niika miikobiko hopa, hempḛr khiiniiñ Felix, lyiguhnii niimi lukolumetii hikha siika ganda kiipa,

³ kapakohe lemboho ho kapakohe ngunu siika siimi taliido hikha payapacho lubiidola.

⁴ Hojalo, niimi lutiñ lubyañ tama, ngo niimi yardu malokalohe ngunuka luniiñmi iche tatope.

⁵ Niimpalukoda ngunu kappatii siika lubyunii miyu mi, hikha Jew atañka punkoho hikha dohadolo so mo chegiinii, ho Nazarene hoka dungunii tonge.

⁶ Mo piniiude miilañmi miibḛrpa miine, hojalo ngunu mohmi latutii.

⁷ hojalo akhoja kepten Lisias ahtii ho hempḛr uro payagaya biidola mohmi ngunuka alah hokii sebii neku,

⁸ No atohpa mohmi taka dokoda chinkiñ doke mohkokii amane drih mi mohmi niimpa ngunu haliitii hiila.”

⁹ Jew atañ tiirḛ haliiko hambo montii, lubiidola hikha siika atañsi hiilake hiila.

Pol ka Lupya siiniiñ Felix ka hataho

¹⁰ Ho govonor mohmi lutote hiila hohe kiile, Pol lusitii: “Abuje anyañ no siika ganda ka ayakacho kaniipa dune ku hiila hembiidola, ngo hempyo biidola ngiipa lupya siichi.

¹¹ Rongkoda no chindudo, siikasi allo lolyañlenye mi abu yama rañ ngiika Jerusalem hoka herii dupa chaniiñ;

¹² ho mohlu kone hetrḛ ngiimi chesuresu dopa mika agiñho kapa ma malo miyu atañmi luru dopa, piniiude ho malo sinagog ho, malo citi ho.

¹³ Mohlutrḛ kakiñ lakiñma niimi nii mohlu siisi ngiimi haliitii.

¹⁴ Hojalo siimi ngo niimi luko biilyi ke, miijuho lusudokoda, nii mina mohlu dungunii hiila ludunii, ngo ngunuka aba atañka Pinii misu herii siidu nii, hiila henje biidola kapane dopa malo nyibuhenii atañka keto laka donii sii,

¹⁵ Pinii mi hentiñ biidola nii mina mohlutrḛ talii mondonii, hiiko turiturku rikiñ doku anyeru denki ho diimmah tiirḛ.

¹⁶ Hopa ngo kiirañ heru bidu didḛrpa hembiidola Pinii kii dalyiho miyuatañ kii dalyi tiirḛ.

¹⁷ Siisi anyañ iche nyanku lala ngo ngiika ganda pa biliñ keliñ niimi ho biniiñ mi biilii bichi ke.

¹⁸ Ngo hiila siimi miila dokele, mohlu ngiimi piniiude hoka darii lyiniiñmi kapa, hang miyu taropa malo chesuresu mapa. Hojalo Jew tonge Asia hokii

¹⁹ mohlu so niika hataho ahla ho hang halii sanii dokoda halii lakiñ doke, mohluko matiirḛ hang ngiimi halii sanii dokoda.

²⁰ Malo hiila makoda siika miyu atañmi mohlumi Luk nento niihna mohlu ayamapa miiniiñmi kapa tiinii ngiimi bulyañ ka hataho,

²¹ siika drih kone kontii mi apalala nii mina ngo gyuko tiinii mohluka punkoho dala, ‘Shiiniiñ hokii ka turiturku mika khiiko hopa siilo ngiimi niiko ahgii bitii.’”

²² Hojalo Felix, Lembo aya loda chimbii tola, mohlumi yalotii, lubiidola, “Niida Lysias akhojabo tochi, ngo nunuka lugo siimi ludḛr bichi ke.”

²³ Ho mo sipahi sabii mi mohmi lutii patiihude ho atiito hojalo mohmi mo henko dadopa bito, ho mohka ajiñ atañ kone mitrḛ lutiñ yayo mohka anna mika biilii bisa niimi.

Pol Felix la Drusilla ka Hata ho

²⁴ Allo lonye lohiñhe daku lala Felix mohka mihie Drusilla ka agiñho ahtii, mo Jew henju henii; ho Pol mi gyobii lula la mohmi Kristo Jisu mika henjenii piigo mi luke nembiido.

²⁵ Ho mo ahiñ paka heniiñmi, ho hendimiidi ho piijo daka ayakacho kasa niimi cherii kiile, Felix herilala ho lutii, “Siisi ingeku; niida ngiiko myodu dochi ngo niimi gyochike.”

²⁶ Hiika myodu ho mo hiila hentii mohmi Pol tiicko bilyi do hiila. Hopa mo kiirañ mohmi gyola lala ho mohmi lurii la miitii.

²⁷ Hojalo anyañ nyanye inku kiile, Felix ka duko ho Porcius Festas dusi hatii; ho Jew atañmi hensañ mola, Felix Pol mi patiihude ho apatela intii.