MIINIIÑ 21 - NITI GONTU N.T. (BSI)

Pol Jerusalem ho Intii

¹ Ho ngunu mohluko hokii impe sukula ho khoriku, ngunu parda Kos ho khobo, ho allo lohe yaho Rhodes ho, ho hiiko hokii Patara ho.

² Ho yasiejaji Poinisia ho khobo pa kapa lala, ngunu ho ducha, ho khobo.

³ Ho ngunu Saiprus mi kapa kulala, hiimi lahchi dalyiho apa tela ngunu Sairia ho khobo, ho Tayer ho damo; niimpalukoda hiiko yasiejaji hii hiika drih atañmi jolo kentola.

⁴ Ho henjeajiñ tonge kapa tola, ngunu allo lokanuhe hiiko dutiihe. Yajiyallo lo lukokola mohlu Pol mi Jerusalem ho iyo lutii.

⁵ Ho hiiko ngunuka allo loja kukele, ngunu inku ho ngunuka myodi bonii bokañsii; ho mohlu hikha, mihie oho atañ agiñho, ngunumi ngunuka lembo ho linkuñ citi ka ago lohepa; ho yasie siilo ho liibañ khangala kuhii ho kone anyañ mi aya inge tiika ah hiila lusu.

⁶ Ho ngunu inkula yasiejaji ho chaku, ho mohlu ude ho inkur neku.

⁷ Ho ngunu Tayer hokii bobiikula, ngunu Ptolemais ho ahchi; ho anubarmii atañmi ayahelyi la ho mohluka agiñho allo lohe dutiihe.

⁸ Allo lohe yaho ngunu inku ho Kaesarea ho ahhii; ho ngunu puyubakobo Pilip ka ude ho ahhii, mo midiñkanuhe hokii kone, ho mohka agiñho dutiihe.

⁹ Ho mohkii piilye milo imaraniiñ wiinga dune, hii mihukahii.

¹⁰ Ngunu ka allo lonye lohiñhe durañho, nyibuhenii Agabas hiila armyañ Judia hokii tohii.

¹¹ Ho ngunuko ahbiila mo Pol ka pulye mi lala la ho mo attoh alih la alah nyimi rasu lala, ho lutii, “Hiila ke Darii Yajiyallo ludonii, ‘Si chulipa Jew atañ Jerusalem ho rakiñdo siika pulye ka atohmi miyumi ho Midomiyu atañmi nembi kendo.’”

¹² Ngunu siimi tapa lala, ngunu la miyuatañ mohmi Jerusalem ho chayo hiila lyartii

¹³ Ho Pol lusitii, “Niina nunu mudunii, khela ho ngiika ahha mi tatu kiine la? Ngo pattiih kontii tunko pamake hojalo Jerusalem ho siidu pajalo hendi duke Attoh Jisu Kristo ka armyañ pa.”

¹⁴ Ho mohmi lyarla masu lyiniiñ, ngunu apatoku ho lutii, “Attoh ka henko jaho dokiñ cho.”

¹⁵ Siika allo atañka hiibaho ngunu henju lala ho Jerusalem ho chahii.

¹⁶ Ho henjeajiñ tonge Kaesarea hokii ngunu agiñho chabo mongii, ngunumi Saiprus daka Mnason ka ude ho ahgii, khu henjeajiñ kone, huka agiñ hona ngunu dutii henii.

Pol Jems ko Ahtii

¹⁷ Ngunu Jerusalem ho ahbii kiile, anubarmii atañ hempyo biidola karii.

¹⁸ Allo lohe yaho Pol ngunu agiñho Jems ko ahbo; ho hikha amiabañ atañ dane.

¹⁹ Mohlumi ayahelyi luku lala, mo kone kone luri biila Pinii ka Midomiyu atañka punko hoka mohmi miigiñ nala drih miiniiñ atañmi lukotii.

²⁰ Ho mohlu siimi tapa lala, mohlu Pinii mi assañtii. Ho mohlu mohmi lutii, “No kato, abañsi, harje jane da Jew atañka punkoho hutii na henje nyado kunii; mohlu hikha dapo ma lotii henje nii adiñ,

²¹ ho mohlu lukoda niika piigomi mohlumi ka hikha Jew atañ mika tonsḛr niimi Mose mi apatoku hiila hutiina Midomiyu atañka punkoho danii, mohlumi lukola mohluka hemme oho atañmi mitupipa koma jalo malo muju mi miima jalo luniiñmi.

²² Niihpe ho miikiñ dota nii? Mohlu no ahdo hiila tapa dudo loda.

²³ Miito hopa niihna ngunu niimi luko talyinii. Ngunu kii miyu piilye da hutiina hemme nyatiinii;

²⁴ siika miyu atañmi ingiihe ho no attohmi mohluka agiñho darii miisuto ho mohluka miipaniimi bibito, niimpalukoda mohlumi mohluka dinta mi lyangur siidopa. Hiila miikoda hikha chinkiñ doke hiiko hang nyima niihna mohlu niika piigo mi luko tiinii, hojalo no atohlya dapo mi miido.

²⁵ Hojalo Midomiyu atañ pakoda hutiina henje nyadonii, ngunu siiti bilii bulyi ke ngunu ayakacho kasaniisi, mohlumi diilya yo hiila puchi niimika membi niimi ho ai mi ho garkhii niimi ho ipfyo diipyo hokii.”

²⁶ Ho Pol miyu atañmi ingiitii, ho allo lohe yaho mo attohmi mohluka agiñho darii miikotii ho piniiude ho intii, luko dupa lonena dariimiiko dupa dakiñ donii ho mohlu kone abipa membi dupa.

Pol mi Piniiude ho Latutii

²⁷ Allo lokanunii loja tapa miikele, Asia hokii Jew atañ, huna mohmi piniiude ho kapa tiinii, hikha miyu atañmi lurutii, ho mohmi latutii,

²⁸ gyutii, “Isrel daka miyuatañ, hembyuñpe! Siika miyu sike huna tonsḛr tonjola miyu atañmi kapa kohe ngunumi chekhola ho dapo mi ho siika lengo siimi; hiika hahoho Grik atañ miilañmi piniiude ho ahgiida, ho mo siika darii lengo mi kacho miipada.”

²⁹ Niimpalukoda mohlu kapyo ho Ipisia daka Trophims mi kappatii mo agiñho citiho, ho mohlu hentii Pol mohmi piniiude ho ahgiitii hiila.

³⁰ Ho hikha citi atañ hadii ritii, ho hikha miyuatañ tonge pa haratii; mohlu Pol mi latutii ho piniiude hokii sepa lintii, ho nyibya loda hagya mi miipiñtii.

³¹ Ho mohlu mohmi mendupa miikele, puyu hii sipahi akhoboko tapatii hikha Jerusalem hii hempuhenka nyado hiila.

³² Mo nyibya loda sipahi atañ la sabii atañmi ingiitii, ho mohluko haritii; ho mohlu akho bomila ho sipahi atañmi kapa lala, mohlu Pol mi hiku matii.

³³ Ho akhobo ahtii ho mohmi pattiih botii, ho mohmi dachañ ranyi lo rato lutii. Mo takatii mo hu hiila ho mo niihna miitiinii hiila.

³⁴ Tonge miyuapur hoka danii drih kone gyutii, tonge pongepa; ho mo tadḛr lamatii miyu atañka rukha adu kopa, mo lubiido mohmi patiihude ho selii bii hiila.

³⁵ Ho mo abya aruñho ahchi kiile, mo sipahi atañ la jobii kotii niimpalukoda miyu atañka chesuresu kopa;

³⁶ niimpalukoda miyu taropa imbo montii, gyubii dola, “Mohmi mento!”

Pol Attohmi Lupya siido

³⁷ Pol mi patiihude ho ahchi giipa miikele, mo akhobomi lutii, “Ngo hang ako niimi lula kendo peha?” Ho mo lutii, “No Grik chindupo?

³⁸ No Egip hoka miyu masuha, hokoda, huna ayumada pa chekho rigiinii ho miyu harje jarpe mi Meniipanii pa lyargiila zabyo ho Hargiiniiñ?”

³⁹ Pol lusitii, Ngo Jew, Cilicia daka Tarsus hokii, hempḛr khiiniiñ citi hokii; ngo niimi lyarlyi ke, ngiimi miyu atañmi lurii kiinepe.

⁴⁰ Ho mo mohmi apa kiile, Pol, abya ho dala, mohka alah lo miyu atañmi hohe biidola; ho hiiko hempḛr taro dalyinii, mo mohlumi Hebrew aguñpa luriitii, lubiidola: