MIINIIÑ 20 - NITI GONTU N.T. (BSI)

Masedonia la Akaia nyi

¹ Chesuresu hii yanu hiku kiile, Pol henjeajiñ atañmi gyobiido ho mohlumi harolupatela mohluko hokii indoku ho Masedonia ho intii.

² Mo hikha siika gandaho intii patii lala ho mohlumi abuje harolupatela, mo Greece ho ahtii.

³ Hiiko mo piilo bariñhe datii, ho mohmi latu dupa hiila Jew atañ miikele mohka Sairia indupa hiila heniiñmi, mo Masedonia hopa ya ahkur talyiku hiila hentii.

⁴ Beroea ka Sopatḛr, Pyrrhus ka oho, mohmi imbo montii; ho Tesolonia miyuatañ miilañ, Aristarkas la Sekundas; ho Derbe daka Gayas, ho Timoti; ho Asia atañ, Tychicus la Trophims.

⁵ Siika atañsi inkatii ho ngunumi kalya Troas do dami,

⁶ hojalo ngunu Pilipi hokii khoboku Ipomiiyo manii Yatañ dituñ allo hiiba, ho allo longo niiho ngunu mohluko Troas ho ahtii he, hiiko ngunu allo lokanuhe dutiihe.

Pol ka Kamijapa Troas hoka Kahanii

⁷ Kanualo ka kapyoja allo ho, ngunu tonge pa dakuñla yatañ mi petu dupa miikele, Pol mohlumi luriitii, allo loyeyaho indu kupa hiila; ho mo mohka luniiñmi ayoh liipa lohe lukañtii.

⁸ Hiiko hempḛr abuje muru done ayoh chidii ho nohna ngunu duto nii.

⁹ Ho yapa atu kone Eutychus hiila armyañ ugo ka aruñho dune nii. Mo hempḛr uro imi niitetii Pol ka lukañ siilyinii; ho imi niite hajala, mo hingenii ayoh chidii hokii hupayutii ho shiido pa jocha biitii.

¹⁰ Hojalo Pol akañ ho totii ho mohka aruñ chuki hala, ho poba biidola mohmi lutii, “Ahialuñ nyayo, mo tudo ranke.”

¹¹ Ho Pol ayoh ho chakula ho yatañ mi petu lala ho diitii, mohlumi diiriihe luriila miitii hela, hutoh menda hemi, ho intiiku.

¹² Ho mohlu milobomi turdo pa jobiidoku, ho lama aroh matii.

Troas Hokii Miletas Lohe

¹³ Hojalo yasiejaji ho ahchibiila, ngunu Assos ho khobopa khohii, Pol mi hokii khobo giidupa; hopa mo miimyotii, mo attoh kiiddi pa indu pa hiila.

¹⁴ Ho mo ngunumi Assos ho kapalala, ngunu mohmi ingiila ho Mitylene ho ahhii.

¹⁵ Ho hiiko hokii khori biila ngunu allo lohe yaho Chios ka pache dalyi ahtiihe; allo lohe yaho ngunu Samos ho ahtiihe; ho hiika allo hiiba ho ngunu Miletas ho ahtiihe.

¹⁶ Niimpalukoda Pol Ipisia mi khopo biila bochi hiila hentii, niimpalukoda mo myodu mi pakhii kiine namatii Asia ho; niimpalukoda mo nyibya pa Jerusalem ho ahchi nantii, ahla lyimilo, Penticost ka allo ho ahchi dupa hiila.

Pol Ka Indu Kupa Ipisia Amiabañ Atañ Mika Luniiñ

¹⁷ Ho Miletas hokii mo Ipisia ho botii ho mo gyoliñkonii daka amiabañ atañmi gyotii.

¹⁸ Ho mohlu mohko ahkele, mo mohlumi lutii: “Nunu attoh chindo niihtañpa ngo nunu agiñho santii hikha myodu myolo mi nii allo hokii ngiika alih Asia ho daha tii

¹⁹ Attoh mi miiho la hikha chimie yanupa ho khebii dola ho tenkalarka kobii dola Jew atañka ngiimika piirii laka miinii hokii;

²⁰ niihtañpa ngo lama yapa luko talyi nunumi nii niihokiina abuyapa lingii kendonii, ho nunumi butii kadopa tonsḛr biidola ho ude pinge abi imbii dola,

²¹ Jew atañ ma Grik atañ mima pyako biidola Pinii mika henkur sanii mi ho Attoh Jisu Kristo mika henje saniimi.

²² Ho siisi, kato, ngo Jerusalem ho ilyi ke, Yajiyallo lo kiiniñ kotola, hang chima hiiko nii ngiiko lyikiñdo hiila;

²³ Darii Yajiyallo ka ngiimika pyako niimi kontiisii citi kone abi pattiih tundupa ho herumyanka hii ngiimi kalyala do hiila.

²⁴ Hojalo ngo ngiika sango mi hang khiiniiñ pa hensuma malo ngo attohmi, ngo matiirḛ miipe dokoda ngiika miigomi ho miigolugo mi nii mina ngo Attoh Jisu kokii larii tiinii, Pinii ka aroh-aya ka ayapuyu mika pyako niisimi.

²⁵ Ho siisi, kato, ngo chindo hikha nunu hutii kona ngo ahla raddeganda mi tonsḛrkhenyo tiinii hii ngiika nyitumoru mi kapa keñkuma.

²⁶ Hopa ngo siilo ka allo so nunumi lubii lyike ngo nunuka ai bisa nii hokii ngiimi hang halii sanii giima lyike,

²⁷ niimpalukoda ngo nunumi Pinii ka lyarniiñ mi lama hepa lukoma.

²⁸ Nunu attohpa hendi nyatolya ho hikha subuñ atañmi, nunumi Darii Yajiyallo mohlumi kabii niipa miitii, Pinii ka gyoliñkonii atañmi kage niipa humina mo mohka attoh Oho ka ai lo riitii nii.

²⁹ Ngo chindo ngiika inekuho siipya atañ ahkiñdo nunuka punkoho, subuñ dore mitrḛ apa kema;

³⁰ ho nunuka punko hokii nunuka attoh miyuatañ chekho rila diimmah drih atañmi lukiñdo, mohluka kiiliñ ho henjeajiñ atañmi segii dupa.

³¹ Hopa hendi nyatolya, hempa biidola danyi nyahiñ hemi ngo ayoh yohe hetrḛ yopa mapa malo allo lohe tiirḛ lopa mapa kone abimi mila bibii dola lukotii.

³² Ho siisi ngo nunumi Pinii mi lubii lyikuke ho mohka aroh-aya aguñlo, niihna nunumi sangii kendonii ho nunumi pendokupa hikha nunumi hutii mina darii miitii kunii.

³³ Ngo kone katrḛ rupu mi malo ayyiñmi malo giijugiimyo mi kapyo malyi ke.

³⁴ Nunu attoh chindo siika alah atañsi ngiika anna niimi miihotii, ho hiimi tiirḛ hutiina ngiika agiñho dabo danii.

³⁵ Hikha drih atañ ho ngo nunumi kakiñtii heru biidola kone mi hembyuñ tolya huna ajjudonii, Attoh Jisu ka aguñ luniiñ atañmi hempa biidola, niihtañpa mo lune, ‘Siikasi abuyapa lyanko kendo binii hii lanii mi hentola.’”

³⁶ Ho mo hiila luku lala, mo liibañ khangala ho hikha mohluka agiñho kutii.

³⁷ Ho mohlu hikha khetii ho Pol mi poba la ho mohmi mochutii,

³⁸ miilañru herutii niimpalukoda mohka aguñ luniiñ kiipa, mohlu mohka nyitumoru mi kapa keñkuma hiila. Ho mohlu mohmi yasiejaji ho ahgii tii.