MIINIIÑ 19 - NITI GONTU N.T. (BSI)

Pol Ipisia ho

¹ Apollos ka Korint hoka daho, Pol ayoh dalyi ka ganda mi impobiila ho Ipisia ho ahtii. Hiiko mo henjeajiñ tonge kappatii.

² Ho mo mohlumi lutii, “Nunu Darii Yajiyallo larii tiikuha nunuka henje lyiho?” Ho mohlu lutii, “Ma ngunu hiilaya tapa mapa hiiko Darii Yajiyallo do hiila.”

³ Ho mo lutii, “Hokoda Niilo nunu baptisma lato?” Mohlu lutii, “Jon ka baptisma lo.”

⁴ Ho Pol lutii, “Jon baptisma bitii henkur niika baptisma, miyu atañmi lukola henjeto hiimi huna ngiika kiiliñ ho ahkiñ donii, hiika hii, Jisu.”

⁵ Hiimi tapa lala, mohlu baptisma latii Attoh Jisu ka armyañ pa.

⁶ Ho Pol mohka alah mi mohluko tencha kiile, Darii Yajiyallo mohluko ahtii; ho mohlu pongelya aguñ lutii ho mihu katii.

⁷ Hiiko alyañlenye pahe mohlu hikha datii.

⁸ Ho mo sinagog ho ahtii ho piilo bariñhepa haro loda luda datii, cheriila ho lyarla Pinii ka raddeganda ka piigo mi;

⁹ hojalo tonge henjematii ho tajematii, diima paya lula miyu atañmi diima paya lukola Lembo mi, mo mohluko hokii insa giitii, henjeajiñ atañmi mo agiñho ingiila, ho allo karmyañmi cheriitii Tyrannus daka ude peroho.

¹⁰ Siikasi danyi nyanye pahe nyikala dotii, hopa hikha Asia daka dunii atañ Attoh ka aguñmi tapa tii, Jew atañ la Grik atañ nyi.

Sceva ka Oho Atañ

¹¹ Ho Pinii miikamanii loda miimalyanii Pol ka alah lo miitii,

¹² hopa alah nyusu nanii malo pulye tiigii naniimi mohka apo hokii achih nii atañmi, ho achih-ahe mohlumi apatiiku ho diimmah yajiyallo mohluko hokii limpa tiiku.

¹³ Ho gyajonii Jew diimmah igii mi mompa dupa Attoh Jisu ka armyañ mi luta nambiido huko hona kacho yajiyallo giitiinii, lubiidola, “Ngo niimi lubii lyike Pol ka tonsḛr nii Jisu armyañ pa.”

¹⁴ Jew bukuñ nyibu ka kanunii oho armyañ Sceva hiiniiñbo siimi miido.

¹⁵ Hojalo diimmah yajiyallo mohlumi lusitii, “Jisu mi ngo chindu, ho Pol mi ngo chindu; hojalo no hu?”

¹⁶ Ho hiika miyu huko hona diimmah yajiyallo giitiinii mohlumi payatii, mohlumi lumiñ biitii, ho mohlumi pamiñtii, hopa mohlu hargii nyatii hiika ude hokii ahuarapa ho uneagii konyatii.

¹⁷ Ho siimi hikha Ipisia daka dunii atañ chimpa nyatii, Jew atañ ma Grik atañma; ho hikha miilañru biiso nyatii; ho Attoh Jisu ka armyañ mi uro yapa khiitii.

¹⁸ Abuje hutiina henje nyatiinii siisi ahnyatii, pyakosiibii dokula ho mohluka muju mi apa biido kula.

¹⁹ Ho abuje hutiina ashu miinya tiinii mohluka miina nanii kheta atañmi biiliitii ho rompatii hiimi miilañruka kadopa; ho mohlu hiika arie mi khiikatii ho hiikahii jar alyañlyangohe rupu posa kane khiiniiñ pa lyitii.

²⁰ Hopa Attoh ka aguñ saritii ho hempḛr uropa tapa nyatii.

Ipisia Hoka Chesuresunii

²¹ Siisi siika lyiniiñ ka hiiba ho Pol hentii yajiyallo ho Masedonia la Akaia mi impo biila Jerusalem inchi hiila, lubiidola, “Hiiko ngo datii hela, ngo Rom mitrḛ kate kendo.”

²² Ho Masedonia ho mohka hembyuñ anye mi kiiniñtii, Timoti la Erastas nyimi, mo attoh ya Asia ho myodu iche pa dutii.

²³ Hiika myodu ho hiiko lama uropa chesuresuma Lembo ka piigomi.

²⁴ Niimpalukoda miyu kone Demetrius hiila, hii rupu hokii Artemis piniiude punii, lama kiiri miilii biima bitie miinii atañpa.

²⁵ Siika atañmi mo lakuñlapatii, hii chuli miyu miiniiñ atañmi, ho lutii, “Miyu atañ, nunu chindo siika kiiri miiko sokii ngunuko ngunuka mingo hii ahdo.

²⁶ Ho nunu kapado ho tapado Ipisia ho kontiima hojalo hikha Asia ho siika Pol luru biido ho abuje miyu atañmi inkur dokupa, lubiidola alah loka pinii miichinii hii pinii make hiila.

²⁷ Ho hiila miikoda ahiare kendo, ngunuka kiiri miiniiñ hii byalyido hojalo hii kontii mapa Artemis pinii ka piniiude kahe bomi tiirḛ hang khiikiñ kuma, ho rongkoda mohka tatu katu hiitiirḛ lyuhi nedo, humina hikha Asia ho dohadolo heriida la miitiinii.”

²⁸ Mohlu siimi tapa lala mohlu hadii ritii, ho gyuritii, “Ipisia daka Artemis kaheke!”

²⁹ Hopa citi ho hempuhenka nyatii; ho mohlu tongepa udeperoho haratii, mohluka agiñho Pol agiñ hoka myodi imbo monii Gayas, Aristarkas, ho Masedonia mi selii biila.

³⁰ Pol tiirḛ hentii miyuatañ agiñho imbo nala, hojalo henjeajiñ atañ mohmi imbo kiine ma;

³¹ Asiarchs hokii miilañ tonge, hiika mohka ajiñ, mohmi kiiniñtii ho mohmi udepero ho ahyo hiila lyarbiido.

³² Siisi tonge drih konepa gyudo, tonge pongeyapa; hopa miyuatañ hempuhenka nyatii, ho mohlu abuyahii chimatii niimpa mohlu tongepa ahtii hiila.

³³ Miyu tonge Alejandar mi halii biido, humina Jew atañ kapyopa atii tiinii. Ho Alejandar mohka alah mi yucha biidola, miyu atañmi lyardu pa miido.

³⁴ Hojalo mohlu mohmi Jew hiila kala kula la, mohlu gunta tanye pahe mohlu tonge pa gyutii, “Ipisia daka Artemis kahe!”

³⁵ Ho taun daka babu miyu atañmi lyarlo kiile, mo lutii, “Ipisia daka miyuatañ, niihtañ miyu ho da huna chimanii Ipisia citi hii kahe Artemis piniiude mika kabiinii hiila, ho khiiniiñ yalañ yapuñ hoka huhi niimi?

³⁶ Siimi kabiidola siika drih atañsi ponsa siila kema hiila, nunu apa dopa lyikiñ doke ho nyibya miichi miiyo.

³⁷ Niimpalukoda nunu siika miyu atañmi so selii biitii mohlu piniidrih mi miibḛr ma malo ngunuka pinii atañmi nipakoya ma.

³⁸ Hopa Demetrius la bitiemiinii atañ matiirḛ mo agiñ hoka dabo nii kone mijalo halii lyimilo, gondu lusuko ude hii miiko tola doke, ho hiiko govonor duke; mohlu kone anyañ mi halii siike nento.

³⁹ Hojalo nunu matiirḛ piijoda hang lukiñ lyimilo, hiimi dumiñka dukuñ ho lulyañ siisi.

⁴⁰ Niimpalukoda ngunumi siilo ka chesuresu halii biichike, hiiko hang lyima siiko da ngunu siika drih sokii lupya siila kendoke.”

⁴¹ Ho mo siimi luku lala, mo miyuatañ nempe nense biidoku.